بەينەلەۋ ونەرىندە بوياۋلار ۇندەستىگىنە ءوز وكتەمدىگىن جۇرگىزە الاتىن ءبىر الەم بار – بۇل باتيك جانرى. وسى جيىرما جىلداعى تاباندى ەڭبەك اتىراۋدا تۇراتىن باتيك شەبەرى, قازاقستان سۋرەتشىلەر وداعىنىڭ مۇشەسى, سۋرەتشىلەر اكادەمياسىنىڭ كوررەسپوندەنت-مۇشەسى كاميلا جاپالوۆاعا تەك تانىمالدىلىق پەن شىعارماشىلىق ءلاززات اكەلدى. كوپتەگەن حالىقارالىق بايقاۋلاردا كوركەم الەم ارقىلى قازاقستان دەگەن ەلگە شەتەلدىكتەر قۇرمەتىن ارتتىردى.
كاميلا باتيك تەحنيكاسى ارقىلى قايتالانباس تۋىندىلار جاسادى. ونىڭ قولىنان شىققان جاۋھارلار تاماشا قوناقۇيلەردىڭ تورىندە, ونەردى باعالايتىن كوللەكتسيونەرلەردىڭ ۇيىندە تۇر.
كاميلا 5 سىنىپتا وقىپ جۇرگەندە ءبىر كەزدە جۇرتتىڭ ءبارى وقيتىن «بالدىرعان» جۋرنالىنىڭ 3 بىردەي بەتىنە ءوزىنىڭ سۋرەتتەرىن باسقاندا, بۇكىل اۋىل قۋانىپ, ول ءوزىن وسى ءبىر سۇلۋ الەم جەتەكتەپ بارا جاتقانىن سەزبەگەن بولار.
بوياۋ ۇندەستىگىندە بارىنشا كىرپياز قىلقالام شەبەرىنىڭ جۇمىستارىنا قاراپ وتىرىپ, ول باتيك ونەرىنە ايەلدىڭ عانا بويىندا بولاتىن ەرتەگىدەي نازىكتىك پەن بوياۋلاردىڭ قۋاتىن قاتار سىيلادى دەسەك قاتەلەسپەگەن بولار ەدىك. نە قۇدىرەتى بار ەكەنىن, ماتالارعا سالىنعان ءمىنسىز الەم سۋرەتكەردىڭ ەرەكشە تالعام-بولمىسىمەن ۇندەسىپ, كەمپىرقوساقتاي قۇبىلىپ, تالانتپەن سۋارىلعان قۇندىلىققا اينالىپ شىعا كەلەدى. ايتپەسە, بۇل ونەرمەن اينالىساتىندار از ەمەس. الايدا جاپالوۆانىڭ جۇمباعى باسقا, ويتكەنى ول بۇل ونەرگە شەكسىز مۇمكىندىكتەر سىيلاۋمەن كەلەدى.
سول سياقتى سۋرەتشى باتيك ونەرىندەگى تاعى ءبىر ءداستۇرلى ءادىس – ىستىق باتيك تەحنيكاسى نەمەسە «كراكلە» ارقىلى ابدەن ماشىقتانعان فولكلورلىق, دەكوراتسيالىق, ابستراكتسيالىق عاجايىپ تۋىندىلارىن تالاي حالىقارالىق كورمەلەردىڭ تورىنە شىعاردى. استارىنان سىر ىزدەتىپ اۋرە ەتپەيتىن بۇل جۇمىستاردا حاس شەبەردىڭ انىق قولتاڭباسى مەن ءان سالىپ تۇرعانداي الەم بار.
ول كەيدە تاۋىس قۇسىنداي كوركەم, كەيدە كولدە جۇزگەن اققۋداي نازىك. بىردە سامۇرىقتاي كوكتى شارلاسا, بىرەسە جۇماقتىڭ قايىعىندا جۇزگەندەي جاستىقتىڭ باۋ-باقشاسىن شارلاتادى.
كاميلانىڭ بيداي, قوڭىرقاي, التىن دالا ءتۇستى جىلى رەڭكتەرگە تولى تۋىندىلارىندا قازاقي ليريكالىق قولتاڭبا بار. سانكت-پەتەربۋرگتەگى باتيك جانرىنداعى مامانداندىرىلعان سۋرەت كوللەدجىن بىتىرگەن شەبەر رەسەيدە جۇرگەندە اۋىل تىرشىلىگىنە دەگەن ساعىنىشى تۋلاعان تەڭىزدەي جۇرەگىن تەربەپ, وزىندىك باعىتقا يە بولۋعا سەپتەسكەنىن ايتادى.
وڭتۇستىكتە وسكەن قىز كىلەم توقۋدى, كيىز باسۋدى, قىز جاساۋىن قالاي دايىندايتىنىن اناسىنىڭ قاسىندا ءجۇرىپ دارىتىپ, وسى ناقىشتاردى وزىندىك قابىلەتىمەن بايىتىپ وتىر.
كيىم ديزاينىنا قاتار قۇلاش ۇرعان دارىن يەسى كۇندەلىكتى ومىردەگى كيىمدەرگە, بەتاشار ورامالدارعا, ۇزاتىلاتىن قىزدىڭ كويلەگىنە, جەڭگەلەردىڭ كامزولىنا باتيكتىڭ مۇمكىندىكتەرىن دارىتۋعا كوشتى.
حالىقارالىق كورمەلەردە قابىلەتىن مويىنداتقان قىلقالام شەبەرى وبلىستىق اكىمدىكتىڭ دە قولداۋىنا يە بولىپ, «دامۋ» قورى ارقىلى قايتارىمسىز گرانتقا يە بولىپ, ديزاينەرلەردىڭ ءوز ەلىمىزدە, يتاليادا وتكەن جارىستارىندا كوزگە ءتۇستى.
ايناش ەسالي, «ەگەمەن قازاقستان» الماتى