شىتىرمان وقيعاعا قۇرىلعان كومەديا, بوەۆيك جانرىنداعى «Kingsman: التىن ساقينا» ءفيلمى وسى ۋاقىتتا قازاقستان كينوتەاترلارىندا كورسەتىلىپ جاتىر. فيلم رەجيسسەرى مەتتيۋ ۆون مەن دجەين گولدمان بىرلەسىپ جازعان ستسەناري جەلىسى «Kingsman: قۇپيا قىزمەت» (2014) ءفيلمىنىڭ جالعاسى رەتىندە كورىنىس تابادى.
جىل: 2017
ەل: اقش , ۇلىبريتانيا
رەجيسسەر: مەتتيۋ ۆون
باستى رولدەردە: تەرون ەدجەرتون, كولين فەرت, مارك سترونگ, دجۋلياننا مۋر, حوللي بەرري, پەدرو پاسكال,چەننينگ تاتۋم, دجەفف بريدجەس, ەدۆارد حولكروفت, حاننا السترەم جانە باسقالار
ستسەناري: مەتتيۋ ۆون , دجەين گولدمان
پروديۋسەر: مەتتيۋ ۆون , ادام بولينگ , دەۆيد رەيد
جانر: كومەديا , بوەۆيك
الەمدىك پرەمەرا: 20 قىركۇيەك 2017
قازاقستانداعى پرەمەرا: 21 قىركۇيەك 2017
جاس شەكتەۋى:R رەيتينگى - 17 جاسقا دەيىنگى تۇلعالار ءۇشىن ەرەسەكتەردىڭ قاداعالاۋى مىندەتتى
ۇزاقتىعى: 141 مينۋت
ء«فيلمنىڭ جالعاسىن تۇسىرگىم كەلە مە, جوق پا بىلمەي ءجۇردىم, – دەيدى مەتيۋ ۆون. – ءفيلمنىڭ كىلتى سانالاتىن زالىم بەينەسى ۇزاق ويلاندىردى. ءبىر كۇنى تاڭەرتەڭ ويانعاندا انتوگونيسكە قاتىستى سيۋجەتتەر مەن پلاندار دايىن تۇرعانىن ءتۇسىندىم. سىزدەرگە بۇرىن-سوڭدى كورمەگەن ەپيزودتاردى كورسەتۋدى جوسپارلادىم».
بۇل - مەتتيۋ ۆوننىڭ رەجيسسەرلىك قىزمەتىندەگى العاشقى سيكۆەلى. دجۋلياننا مۋر, حوللي بەرري, دجەفف بريدجەس, كولين فەرت پەن ەلتون دجون سىندى بەس بىردەي وسكار سىيلىعىنىڭ يەگەرلەرىنىڭ باسىن قوسقان فيلم كوپتىڭ كوڭىلىنەن شىعا الدى ما؟
فيلم سيۋجەتى Kingsman ۇيىمىنىڭ امەريكالىق جاقتاستارىمەن بىرلەسە وتىرىپ, الەمدى ز ۇلىمدىقتان اراشالاۋ جولىنداعى قيىنشىلىققا تولى كۇرەسىنەن ءوربيدى. ۆالەنتايننىڭ نەۆرالوگيالىق تولقىنىنان الەمدى قۇتقارىپ قالعان ەگگسيدىڭ (تەرون ەدجەرتون) شۆەتسيا حانشايىمىمەن جاراستىقتاعى وتباسىلىق ومىرىنەن باستالادى. Kingsman ۇيىمىنىڭ ءبىر كەزدەگى وقۋشىسى بولعان, كەۋدەسى وشپەندىلىككە تولى قاسكوي چارلي (ەدۆارد حولكروفت) الاپات كۇشتى كيبەرنەتيكالىق قولعا يە. ول بۇل كۇندەرى «التىن ساقينا» اتتى ەسىرتكى بيزنەسىمەن اينالىساتىن قىلمىستىق توپتىڭ جەتەكشىسى پوپپي ادامستىڭ (دجۋلياننا مۋر) سەنىمدى جەندەتىنە اينالعان.
سونىڭ ارقاسىندا Kingsman اگەنتتەرىن تىپ-تيپىل قىرىپ سالادى. وسى تۇستا بۇرىن كيىم تاڭداپ پاڭدانىپ جۇرەتىن مۇنتازداي گارري حارد (كولين فەرت) قايتا ورالادى. بۇل جولى قاي قىلىعىمەن سۇيىندىرمەك؟! Kingsman مۇراگەرى ەگگسي مەن ءتىرى قالعان مەرليننىڭ (مارك سترونگ) ارى قارايعى كۇرەسكە تولى ءومىرى جەڭىسكە باستاي ما, الدە قۇمعا سىڭگەن سۋداي ءىز-ءتۇسسىز كەتە مە دەگەن ەكىۇداي وي كورەرمەندى جەتەگىنە قوسا ىلەستىرەدى.
2014 جىلى «Kingsman: قۇپيا قىزمەت» ءفيلمى جارىققا شىققان سوڭ, مارك ميللار مەن مەتيۋ ۆون فيلم تابىستى بولسا, جالعاسى ءتۇسىرىلۋى مۇمكىن ەكەندىگىن ايقان بولاتىن. ءفيلمنىڭ العاشقى ءتۇسىرىلىم جۇمىستارى 2016 جىلى 15 مامىردا بيرمينگەمدە باستالدى. قوسىمشا كادرلار وسى جىلى جەلتوقسان ايىندا لوندوندا ءتۇسىرىلدى. «20th Century Fox» كينوستۋدياسى ءفيلمدى 2017 جىلدىڭ 16 ماۋسىمىندا كوپشىلىككە ۇسىنباق بولعان, الايدا شىعۋ مەرزىمىن 6 قازانعا اۋىستىردى. كەيىن ۇلىبريتانيادا 20 قىركۇيەككە بەلگىلەپ, اقش-تاعى تۇساۋكەسەرىن ەكى كۇن العا ىلگەرىلەتتى. كەي سىنشىلار مۇنى باسەكەدەن جالتارۋ دەپ سانادى. ويتكەن تۋرا سول ۋاقىتتا كانادالىق رەجيسسەر دەني ۆيلنەۆتىڭ «Blade Runner 2049» ءفيلمىنىڭ پرەمەراسى ءوتىپ جاتتى.
كينو تۋرالى سىنشىلاردىڭ پىكىرى ارقيلى. سونىڭ ىشىندە «اتلانتيك» ادەبي جۋرنالىنىڭ باس كينوسىنشىسى كريستوفەر ورر ءفيلمنىڭ كوركەمدىك تۇتاستىعىن ءسوز ەتە كەلە, «فيلم وتە ۇزاق, تىم قاتال. باسقاشا ايتقاندا, ءبىرىنشى رەت – ساتيرا, ەكىنشى قايتالاۋ – فارس» دەپ كينوتۋىندىنىڭ مازمۇنىنا كوڭىلى تولماعانىن جەتكىزەدى. ودان بولەك فيلم بارىسىنداعى ەرسى ازىلدەر مەن قايتا ورالعان كولين فەرتتىڭ توبەلەسىنىڭ ساتسىزدىگى تۋرالى وزگە سىنشىلاردىڭ پىكىرى «توتىقۇستاي تارانعان ەلتون دجوننىڭ اشەكەيلى كەيپى دە ءفيلمدى قۇتقارا المايدى» دەگەنگە سايادى. Rotten Tomates شولۋ اگرەگاتورىندا فيلم رەيتينگىنە ورتا ەسەپتە 5,3/10 بالل بەرىلگەن.
ايا ءومىرتاي,
«ەگەمەن قازاقستان»