جامبىل وبلىسى كاسىپكەرلەر پالاتاسىنىڭ سۇيەمەلدەۋىمەن جاڭا وقىتۋ ورتالىعى اشىلدى بۇگىندە مەكتەپ باعدارلاماسىندا بولسىن, كوللەدج بەن جوعارى وقۋ ورىندارىندا بولسىن ءبىلىم بەرۋ باعىتى تەوريادان پراكتيكاعا بەت الۋدا, دەپ حابارلايدى «اتامەكەن» ۇلتتىق كاسىپكەرلەر پالاتاسىنىڭ ءباسپاسوز قىزمەتى.
«نارىق زامانىندا باسەكەگە قابىلەتتى بيزنەس پەن وندا قىزمەت ەتەتىن بىلىكتى ماماندار عانا سۇرانىسقا يە. بۇل رەتتە بيزنەس پەن بيلىك اراسىنداعى التىن كوپىرگە اينالعان كاسىپكەرلەر پالاتاسى قوس تاراپقا دا قولايلى جاعداي جاساۋدىڭ جولىن قاراستىرىپ, پالاتادا «وقۋ ورتالىقتارىنىڭ وبلىستىق رەەسترى» قۇرىلعان بولاتىن», – دەيدى جامبىل وبلىسىنىڭ كاسىپكەرلەر پالاتاسىنىڭ ادامي كاپيتالدى دامىتۋ ءبولىمىنىڭ باسشىسى گۇلميرا مىرزا-عالي.
2017 جىلعى 4 شىلدەدەگى «اتامەكەن» ۇلتتىق كاسىپكەرلەر پالاتاسى تەحنيكالىق جانە قىزمەت كورسەتۋ ماماندىقتارى ءۇشىن كاسىپتىك دايارلاۋ, قايتا دايارلاۋ, بىلىكتىلىگىن ارتتىرۋ جانە بىلىكتىلىكتى بەرۋ بويىنشا وقۋ ورتالىقتارىنىڭ رەەسترلەرىن قۇرۋ تۋرالى بۇيرىعىنا سايكەس قۇرىلعان تىزىلىمگە وڭىردە كاسىپورىندار جانىنان اشىلىپ, جۇمىس جۇرگىزىپ جاتقان 4 وقۋ ورتالىعى ەندى. ولار «قازفوسفات» جشس فوسفور زاۋىتى, «قازفوسفات» مينەرالدى تىڭايتقىشتار» زاۋىتى, «ەلبا» جشس مەن «ينتەنسيۆ-ءبىلىم» قوردايلىق قوسىمشا ءبىلىم بەرۋ ورتالىعى» جشس. ال, بۇگىن ءتىزىلىم قاتارى جەڭىل ونەركاسىپ سالاسىنداعى «دانا دەل» تىگىن ءۇيىنىڭ جانىنان اشىلعان وقىتۋ ورتالىعىمەن تولىعىپ وتىر. اتالمىش وقىتۋ ورنىن تىكەلەي كاسىپكەرلەر پالاتاسىنىڭ ءتول تۋىندىسى دەپ ايتۋعا تولىق نەگىز بار. ەلىمىزدە جەڭىل ونەركاسىپ, ايقىنداپ ايتقاندا, توقىما ونەركاسىبى, تىگىن تىگۋ مەن قازاقى ناقىشتاعى كيىم كەشەكتەردى دۇنيەگە اكەلۋ تۇتىنۋشىلار تاراپىنان ۇلكەن سۇرانىسقا يە بولىپ وتىر. وتاندىق ءونىمدى ىشكى نارىقتا ىلگەرىلەتۋ ءۇشىن اتالعان سالاعا بىلىكتى ماماندار قاجەت. كاسىپكەرلەر پالاتاسىمەن تۇساۋى كەسىلگەن «دانا دەل» تىگىن ءۇيى ءوزىن-ءوزى جۇمىسپەن قامتىپ, ءوز كاسىبىن دوڭگەلەتەم دەۋشىلەرگە كاسىبي كومەك كورسەتۋگە, كاسىبي بىلىكتىلىگىن ارتتىرۋعا, تىگىن-تىگۋدىڭ قىر-سىرىن مەڭگەرتۋگە باعىتتالعان.
باستى ماقسات – وڭىردەگى جۇمىسسىزدىق دەڭگەيىن تومەندەتۋ. ورتالىقتا مامانداردى كاسىپتىك دايارلىقتان, قايتا دايارلاۋ مەن ساناتتىق بىلىكتىلىگىن ارتتىرۋ بويىنشا قىسقا مەرزىمدى ءۇش ايلىق وقىتۋ كۋرستارى قاراستىرىلعان. كولەمى 600 شارشى مەتردى قۇرايتىن تىگىن ورتالىعىنىڭ ەسىگى قالانىڭ, وبلىستىڭ كەز كەلگەن تۇرعىنى ءۇشىن اشىق.
تىگىن تىگۋدىڭ, ويىپ-ءپىشۋدىڭ قىر-سىرىن مەڭگەرەم دەۋشىلەرگە بارلىق جاعداي قاراستىرىلعان. 15 جىل بويى جەڭىل ونەركاسىپ نارىعىندا وزىندىك ورنىن قالىپتاستىرىپ, تالاي بيىك بەلەستەردى باعىندىرىپ, جەكە برەندىن قالىپتاستىرا بىلگەن بيزنەسۆۋمەن باقىت توقتىباەۆا, ەندىگى كەزەكتە قىز-كەلىنشەكتەردىڭ تىگىن ءىسىن مەڭگەرىپ, ءوز كاسىبىن اشىپ شىڭدالۋىنا ىقپال ەتكىسى كەلەتىنىن ايتتى.
«ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ» 2017-2021 جىلدارعا ارنالعان باعدارلاماسىن جۇزەگە اسىرۋدا جامبىل وبلىسىنىڭ كاسىپكەرلەر پالاتاسى وقۋ ورتالىقتارى رەەسترىنە «دانا دەل» وقۋ ورتالىعىنىڭ ەنۋى قۋانتارلىق. ءبىز پالاتا تاراپىنان قويىلعان تالاپتارعا ساي تىگىن شەبەرحاناسىن زاماناۋي قۇرىلعىلارمەن جابدىقتاۋعا تىرىسىپ باقتىق. 20 تىگىن ماشيناسى ورنالاستىرىلعان ەكى وقىتۋ ءبولىمى بار, مەتوديكالىق سىنىپتار مەن ورتالىقتىڭ ءوز جەكە كىتاپحاناسى دا قاراستىرىلعان. ءبىلىم بەرەتىن پەداگوگيكالىق قۇرام دا وسى سالانى جەتىك مەڭگەرگەن مامان يەلەرىنەن تۇرادى. قىسقا مەرزىمدى كۋرستار بىرنەشە اۋىسىممەن وقىتىلادى. وقىتۋ سىيىمدىلىعى ءبىر لەكتە 25-30 ادامعا دەيىن».
باقىت ەگەمبەردىقىزىنىڭ ايتۋىنشا, ەندى وقىتۋ بازاسىندا ەسىمدەرى بۇكىل رەسپۋبليكاعا بەلگىلى «اسىل-ديزاين» ءسان ءۇيىنىڭ ديرەكتورى ايدارحان قاليەۆ, قازاقتىڭ ۇلتتىق كيىمدەرىن تىگۋمەن اينالىساتىن ايگىلى ديزاينەر يرينا نابوكو سىندى شەبەر يەلەرىنىڭ قاتىسۋىمەن اي سايىن جاس تىگىنشىلەرگە ارناپ شەبەرلىك سىنىبىن وتكىزۋدى نيەت ەتىپ وتىر. اشىلۋ سالتاناتىندا كوبىنە نازىكجاندى كاسىپكەرلەر, جەرگىلىكتى اتقارۋشى ورگاندارمەن مەن قاتار جۇمىسپەن قامتۋ ورتالىعىنىڭ وكىلدەرى جىلى لەبىزدەرىن ءبىلدىرىپ, الداعى ۋاقىتتا تىعىز ارىپتەستىك قارىم-قاتىناستى بەكىتۋدى كوزدەيتىندەرىن جەتكىزدى.