بيۋدجەتتىڭ ۇكىمەتتىك جوباسى تانىستىرىلدى

قارجى ءمينيسترى بيۋدجەت تۇسىمدەرى قۇرىلىمىنىڭ ساپالى وزگەرۋى; مۇناي تۇسىمدەرىنىڭ 1902,3 ملرد تەڭگەگە ازايۋى; مۇنايلىق ەمەس تۇسىمدەردىڭ 852 ملرد تەڭگەگە ءوسۋى كوزدەلگەنىن جەت­كىزدى. ۇلتتىق قوردىڭ قارا­جاتىن قالىپتاستىرۋدىڭ جانە پايدالانۋدىڭ جاڭا تۇجى­رىم­داماسىنا سايكەس كەپىلدەن­دىرىلگەن ترانسفەرت مولشەرى 2018 جىلعى 2,6 ترلن تەڭگەدەن 2020 جىلى 2 ترلن تەڭگەگە دەيىن تومەندەيتىن بولادى.

رەسپۋبليكالىق بيۋدجەت شى­عىستارى 2018 جىلعا 9 217,9 ملرد تەڭگە, 2019 جىلعا 9798,2 ملرد تەڭگە, 2020 جىلعا 10219,7 ملرد تەڭگە كولەمىندە جوسپارلا­نىپ وتىر. بيۋدجەت جوباسى الەۋمەتتىك باعىتتى ساقتايدى. الەۋمەتتىك بلوكتىڭ شىعىستارى 2018 جىلى 4101,3 ملرد تەڭگەنى نەمەسە شىعىستاردىڭ جالپى كولەمىنىڭ 44,5 %-ىن قۇرايدى. 

ءۇش جىلدىق كەزەڭدە ەكو­نو­ميكالىق ءوسۋدىڭ جاڭا مودەلىن قۇرۋ بويىنشا مىندەتتەردى ىسكە اسىرۋ – ەكونوميكانى تەح­نو­لوگيالىق جاڭعىرتۋ جانە تسيفر­لاندىرۋ, كاسىپكەرلىكتى جاپپاي قولداۋ, سونداي-اق ءداستۇرلى بازا­لىق سالالاردى – اگرارلىق سەك­توردى, كولىك جانە لوگيستيكا ين­فراقۇرىلىمىن دامىتۋ ارقىلى جۇزەگە اسىرىلاتىن بولادى.

بيۋدجەت تاپشىلىعى 2019 جىلى ىشكى جالپى ءونىمنىڭ 1 %-نا دەيىن بىرتىندەپ تومەندەيتىن بولادى.

قارجى ءمينيسترىنىڭ ايتۋىنشا ىشكى جالپى ءونىمنىڭ ناقتى ءوسۋى 2022 جىلى 4,2%-عا, 2018 جىلى 3,1% دەڭگەيىندە بولجانۋدا. 2018 جىلى نومينالدى جال­پى ىشكى ءونىم 55 906,2 ملرد  تەڭگەدەن 2022 جىلى 75 875,4 ملرد تەڭگەگە دەيىن وسەدى. جان با­سىنا شاققانداعى ىشكى جالپى ءونىم 2018 جىلى 9,0 مىڭ اقش دول­لارىن قۇراپ, 2022 جىلى 11,7 مىڭ اقش دوللارىنا دەيىن ۇلعايادى. 

مۇناي ءوندىرۋ كولەمى 2018 جىلعى 86 ملن توننادان 2022 جىلى 88,6 ملن تونناعا دەيىن ۇلعايادى. ەكسپورت 2018 جىلعى 47,5 ملرد دوللاردان 2022 جىلى 60,6 ملرد-قا دەيىن, ال يمپورت 2018 جىل­عى 34,0 ملرد اقش دول­لارى­نان 2022 جىلى 45,5 ملرد اقش دوللارىنا دەيىن وسەدى.   ۇلتتىق بانك ينفلياتسيانىڭ جىلدىق ماقساتتى ءدالىزىن 2018 جىلعى 5,0-7,0%-دان 2019 جىلى 4,0-6,0%, ال 2020-2022 جىلدارى 3,0-4,0%-عا دەيىن تومەندەۋ بولجانعان. 

ۇلتتىق ەكونوميكا ءمينيسترى تيمۋر سۇلەيمەنوۆ ۇلتتىق قور قاراجاتىن قالىپتاستىرۋدىڭ جانە پايدالانۋدىڭ جاڭا تۇ­جىرىمداماسىنا سايكەس ۇلتتىق قوردان رەسپۋبليكالىق بيۋدجەتكە بەرىلەتىن كەپىلدەندىرىلگەن ترانس­فەرت 2018 جىلى – 2 ترلن 600 ملرد تەڭگە, 2019 جىلى – 2 ترلن 300 ملرد تەڭگە, 2020 جى­لى – 2 ترلن تەڭگە كولەمىندە اي­قىن­دالعانىن ايتتى.

«قازاقستان رەسپۋب­لي­كا­سىنىڭ ۇلتتىق قورىنان 2018-2020 جىلدارعا ارنالعان كە­پىل­دەندىرىلگەن ترانسفەرت تۋرالى» زاڭ جوباسى ەنگىزىلدى. ول ورتالىق جانە جەرگىلىكتى دەڭ­گەيلەردە 1,5 مىڭنان استام قۇ­جات­تى قىس­قارتۋدى, ورتالىق جانە جەر­گىلىكتى دەڭگەيلەردە بيۋد­جەتتىك باعدارلامالاردى ىسكە اسىرۋدا دەربەستىكتى كەڭەيتۋدى كوزدەيدى. 

ماجىلىستەگى تانىستىرىلىم قارجى جانە بيۋدجەت كوميتەتىنىڭ وتىرىسى شەڭبەرىندە ءوتتى. بيۋدجەتتىك زاڭ جوبالارىنىڭ ودان ارعى تالقىلاۋلارى وسى كوميتەتتىڭ مۇشەلەرى سەرگەي سيمونوۆ پەن ومارحان وكسىكباەۆ باستايتىن جۇمىس توپتارىندا وتەتىن بولادى. 

«ەگەمەن-اقپارات»