دۇيسەنبى كۇنى وتكەن «مەملەكەتتىك ءتىلدىڭ لاتىن گرافيكاسىنداعى ءالىپبيدىڭ بىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋدان كەيىن, كەشە وسى سالانىڭ ماماندارى ورتالىق كوممۋنيكاتسيالار قىزمەتىندە ءباسپاسوز ءماسليحاتىن ۇيىمداستىردى.
اتالمىش شارانىڭ ماڭىزى جايلى جۋرناليستەرگە بايانداعان ش.شاياحمەتوۆ اتىنداعى تىلدەردى دامىتۋ رەسپۋبليكالىق ۇيلەستىرۋ-ادىستەمەلىك ورتالىعىنىڭ ديرەكتورى ەربول تىلەشوۆتىڭ پايىمى بويىنشا, پارلامەنت قابىرعاسىندا ماقۇلدانعان لاتىن ءالىپبيىنىڭ جاڭا جوباسىن ءتىل جاناشىرلارى دۇرىس قابىلداپ جاتىر. ورتالىق قىزمەتكەرلەرى جوبا تالقىلانعان ساتتەن باستاپ, تاۋلىك بويى الەۋمەتتىك جەلىلەردەگى پىكىرلەردى جيناپ, ارنايى ساراپتاعان. ءتىپتى كەيبىر باعالى ۇسىنىستاردى جيناقتاپ, جۇمىس توبىنا جولداۋ ۇستىندە ەكەن.
ءالىپبي ماسەلەسى تۇسىنگەن جانعا ءارىپتىڭ تاڭباسىن اۋىستىرۋ ەمەس. بۇل ۇلتتىق رۋحاني رەفورما. ياعني كەلەشەكتىڭ كەمەلدىگى ءۇشىن جاسالىپ جاتقان شارۋا. كەز كەلگەن رەفورما قيىندىقسىز ىسكە اسپايدى. سوندىقتان دا, بۇل ماسەلەدە قوعامدىق تۇرعىدان اسقان بايىپتىلىق پەن سالماقتىلىق, عىلىمي تاراپتان تولىق زەردەلەنگەن ارەكەت قاجەت دەيدى, جيىندى ۇيىمداستىرۋشىلار.
ەلباسى تاپسىرماسىمەن لاتىن ءالىپبيىن جاساۋعا بايلانىستى قۇرىلعان جۇمىس توبىنا جۇزدەگەن نۇسقا كەلىپ تۇسكەن. وسىلاردىڭ ىشىنەن – ۇلتتىق جانە زاماناۋي ينتەرنەت نۇسقا اتتى ەكى جوبا تاڭداپ الىنىپ, ولار پارلامەنتكە ۇسىنىلعان بولاتىن. پارلامەنت وسىنداعى ەكىنشى نۇسقانى ماقۇلداعان. «ماقۇلدانعان نۇسقانىڭ ۇتىمدى جاعى, مۇنداعى لاتىن ارىپتەرى كۇندەلىكتى قولدانىپ جۇرگەن پەرنەتاقتا ۇستىندەگى تاڭبالاردىڭ ورنالاسۋ رەتىنە ءدال سايكەستەندىرىلگەن. سول سەبەپتى, ەش قيىندىق تۋعىزبايدى. ال ۇلتتىق نۇسقانىڭ ەرەكشەلىگى – ءتىلدىڭ ىشكى دىبىستالۋ ۇيلەسىمىنە ورايلاستىرىپ جاسالعانىمەن, كەيبىر تاڭبالار ءۇشىن ارنايى باعدارلاما قۇرۋ قيىنعا سوقتى», دەيدى ءباسپاسوز ءماسليحاتىن ۇيىمداستىرۋشىلار.
وسى ورايدا, «لاتىن الىپبيىنە كوشۋ شاراسى – قوعامعا, حالىققا, ۇلتىمىزعا نەندەي پايدا اكەلەدى؟» دەگەن سۇراقتى فيلولوگيا عىلىمدارىنىڭ دوكتورى ءالىمحان جۇسىپبەكوۆ مىرزاعا قويىپ كوردىك. عالىم:
– ءارىپ دەگەنىمىز – حالىقتىڭ تىلدىك بولمىسىن ءوز الدىنا ايشىقتاپ تۇراتىن ۇلتتىق بەينە. وسى بەينەنى دىبىستايتىن ۇلتتىق تاڭبا تاڭدالۋى كەرەك. بۇل تاڭبا ءتىلدىڭ قورعانىس-قاۋىزى بولۋى ءتيىس. وسى تاڭبا-دىبىستاردىڭ باسىن قوسىپ ۇلتتىق ەملە-ەرەجە جاسالادى. ءبىز لاتىن ءالىپبيىن قابىلداۋ ارقىلى بۇرىنعى وقۋلىقتارداعى باسى ارتىق 40-50 ءتۇرلى ەملە-ەرەجەدەن قۇتىلامىز ءارى الەمدىك اقپارات كەڭىستىگىنە كىرۋگە كەڭ جول اشىلادى, – دەپ جاۋاپ بەردى.
لاتىن الىپبيىنە كوشۋ ماسەلەسى كوتەرىلگەلى حالىق اراسىندا كوپ ايتىلىپ جۇرگەن تاعى ءبىر سۇراق «بۇعان دەيىنگى كيريلليتسامەن جارىق كورگەن دۇنيەلەر وقىلماي قالماي ما؟». بۇل سۇراقتىڭ شەشىمى دە تابىلىپتى. «Attila group» اتتى كومپانيا وكىلدەرى قازىرگى تاڭدا پايدالانىپ وتىرعان الىپبيلەر – كيريلليتسا, لاتىن, اراب ارىپتەرىمەن جازىلعان ماتىندەردىڭ ەلەكتروندى نۇسقاسىن ءبىر تۇيمەنى باسىپ قالىپ قانا بار-جوعى 3-4 سەكۋندتا ءسىز قالاعان جازۋمەن وقۋعا دايىنداپ بەرەتىن كەرەمەت باعدارلامانى جاساپ قويىپتى. بۇل جوبا جايلى جۇمىس جەتەكشىلەرىنىڭ ءبىرى قۋانىش ءبىلال كوپشىلىكتى حاباردار ەتتى.
بەكەن قايرات ۇلى, «ەگەمەن قازاقستان»