وسى جىلدىڭ باستى جەكپە-جەگىنە دە ساناۋلى كۇندەر قالدى. الدىمىزداعى جەكسەنبىدە وتانداسىمىز گەننادي گولوۆكين كوپتەن كۇتكەن قارسىلاسى مەكسيكالىق ساۋل الۆارەسپەن جۇدىرىقتاسادى. بۇل كەزدەسۋ جايلى ايگىلى سپورتشىلار دا ءتۇرلى پىكىرلەرىن ايتىپ, كىمنىڭ جەڭىسكە جەتۋ ىقتيمالدىعى كوبىرەك ەكەنىنە بولجام جاسادى. سولاردىڭ بىرقاتارىن نازارلارىڭىزعا ۇسىنۋدى ءجون كوردىك.
مايك تايسون, امەريكالىق بوكسشى, اسا اۋىر سالماقتاعى ءابسوليۋتتى الەم چەمپيونى:
«گولوۆكين مەن الۆارەستىڭ ايقاسىن اسىعا كۇتىپ ءجۇرمىن. بۇل مەيۋەزەر-ماكگرەگور كەزدەسۋىنە قاراعاندا الدەقايدا قىزىعىراق. كىمنىڭ جەڭىسكە جەتەتىنىن ءدوپ باسىپ ايتۋ وڭاي ەمەس. بىراق باسىمدىقتى «كانەلوعا» بەرەر ەدىم. ول قازىر ءوز بابىندا», دەدى اتى اڭىزعا اينالعان بوكسشى Globo Esporte باسىلىمىنا بەرگەن سۇحباتىندا.«كانەلو» 27 جاستا, گولوۆكين 35-تە. ونىڭ ۇستىنە مەكسيكالىق بوكسشى جاس تا بولسا, وتانداسىمىزعا قاراعاندا كوبىرەك جەكپە-جەك وتكىزىپ ۇلگەردى. مايك تايسون بالكىم وسى جاعىن قاپەرىندە ۇستاپ, ءارى گەنناديدىڭ سوڭعى ايقاسىنا قاراپ وسىلاي دەگەن بولار. قىزىق مالىمەت. مايك تايسون ەڭ العاشقى جەڭىلىسىنە دەيىن 37 جەكپە-جەك وتكىزىپ, 33-ءىن نوكاۋتپەن جەڭگەن ەكەن. وتانداسىمىز گەننادي گولوۆكين دە وسىعان دەيىن 37 مارتە رينگكە كوتەرىلىپ, 33-ىندە قارسىلاسىن ەسىنەن تاندىرعان. ارينە, گەناعا تايسوننىڭ جولىن قايتالاماۋىن تىلەيمىز.
كارل فروچ, بريتان بوكسشىسى, ەكىنشى ورتا سالماقتاعى الەمنىڭ ەكس-چەمپيونى:
«مەن گولوۆكيننىڭ ۇزدىك جىلدارى ارتتا قالدى دەپ ويلايمىن. ول قارتايىپ بارادى, سوندىقتان الۆارەس جەڭىسكە جەتەدى دەپ سانايمىن. بىراق گولوۆكين دە وسال ەمەس, «كانەلونى» نوكاۋتقا ءتۇسىرۋى ابدەن مۇمكىن. قانشا دەگەنمەن بۇل بوكس ەمەس پە؟! ەگەر كىمنىڭ جەڭەتىنىنە بولجام جاساۋىم كەرەك بولسا, الۆارەستى تاڭدايمىن. مەكسيكالىقتىڭ نوكاۋتپەن جەڭەتىنىنە كۇمانىم بار. سوندىقتان ۇپاي بويىنشا باسىم ءتۇسۋى عاجاپ ەمەس. گولوۆكين قازىر بۇرىنعىداي ەمەس. GGG مەنى تاڭ قالدىرا الماي ءجۇر. سەبەبى, كوپ سوققىلار جىبەرەتىن بولدى», دەدى كارل فروچ IFL TV-عا بەرگەن سۇحباتىندا.دەننيەل دجەيكوبسقا قارسى كەزدەسۋىنەن كەيىن بىرقاتار ساراپشىلار قازاقستاندىق بوكسشىنىڭ 35 جاسقا كەلۋىن العا تارتىپ, جاسى كەلگەنىن مالىمدەدى. ال گولوۆكيننىڭ باپكەرى ابەل سانچەس مۇنداي پىكىرمەن مۇلدەم كەلىسپەيدى. ول قايتا دجەيكوبستى ورتا سالماقتاعى GGG-دان كەيىنگى ەكىنشى بوكسشى ەكەنىن, شاكىرتىنىڭ وعان قارسى لايىقتى دەڭگەيدە جۇدىرىقتاسقانىن ايتتى.
روبەرتو ديۋران, پانامالىق بوكسشى, ءتورت سالماق دارەجەسىندە الەمنىڭ ەكس-چەمپيونى:
«مەنىڭشە, ەكەۋىنىڭ قايسىسى جەكپە-جەك كۇنى ءوز دەڭگەيىندە بولسا, سول جەڭىسكە جەتەدى. ءوز باسىم الۆارەسكە باسىمدىق بەرەر ەدىم. سەبەبى, گەنا دجەيكوبسقا قارسى وتكىزگەن ايقاسىندا ءالسىز تۇستارىن كورسەتىپ قويدى. دەگەنمەن, گولوۆكين دە نوكاۋتپەن جەڭۋى مۇمكىن. «كانەلو» ونىڭ سوققىلارىنا شىداس بەرەر مە ەكەن؟! بىزگە وسى جاعى بەلگىسىز بولىپ وتىر. GGG-ءدى سوققىعا جىعۋ ءۇشىن ونى بارلىق بۇرىشىنان ۇرۋ كەرەك. ەگەر ول ساعان تىكە كەلەر بولسا, نوكاۋتقا تۇسىرۋدەن تايىنبايدى. ونىمەن جۇدىرىقتاسقاندا جىلدام قوزعالىپ, شىر كوبەلەك اينالىپ ءجۇرىپ قارسى سوققى بەرۋ كەرەك», دەدى روبەرتو ديۋران La Prensa باسىلىمىنا بەرگەن سۇحباتىندا.گەننادي گولوۆكين سوڭعى كەزدەسۋىندە دەنيەل دجەيكوبستى نوكاۋتپەن جەڭبەۋىنىڭ ءبىر قۇپياسى بولۋى مۇمكىن. ول ساۋل الۆارەسپەن كەزدەسۋ وتكىزگىسى كەلەتىنىن وسىدان بىرنەشە جىل بۇرىن اشىق ايتقان ەدى. ءوز كەزەگىندە «كانەلو» بۇل ايقاستان قاشپايتىنىن بىرنەشە رەت مالىمدەگەن, الايدا, كەلىسسوزدەرگە كەلمەي ءجۇردى. ءتىپتى, WBC بويىنشا گولوۆكينمەن مىندەتتى جەكپە-جەكتەن دە باس تارتتى. اتالعان بەلبەۋدى ەش قارسىلىقسىز قازاقستاندىق بوكسشىعا قالدىرىپ, ءوزى باسقا سالماققا اۋىسىپ كەتتى. ال دجەيكوبسقا قارسى ايقاسىنان كەيىن گولوۆكيننىڭ وسال تۇستارىن بايقاپ, جەڭەتىنىنە دە سەنىمى ارتقان بولۋى مۇمكىن. قىسقاسىن ايتقاندا 18 ناۋرىزداعى كەزدەسۋ گولوۆكيننىڭ «كانەلوعا» قۇرعان قاقپانى بولۋى عاجاپ ەمەس.
مەنني پاكياو, سەگىز سالماق دارەجەسى بويىنشا الەم چەمپيونى اتانعان جالعىز بوكسشى (59 جەكپە-جەك, 6 تەڭ, 2 جەڭىلىس, 38 نوكاۋت):
«بوكسشىلار ءۇشىن دە, كورەرمەندەر ءۇشىن دە ۇلكەن ايقاس بولارى ءسوزسىز. سوندىقتان ناقتى ءبىر بولجام ايتۋ دا وڭاي ەمەس. گولوۆكين دە, الۆارەس تە مىقتى بوكسشى. بىراق مەنىڭشە, GGG ءسال ىرىلەۋ بولعاندىقتان ازداعان باسىمدىققا يە», دەدى ۆoxingscene.com باسىلىمىنا بەرگەن سۇحباتىندا.ارينە, بوكستا سالماق دارەجەسى ۇلكەن ءرول اتقارادى. دەگەنمەن, قوس سپورتشىنىڭ دا ءبىر سالماقتا جۇدىرىقتاساتىنىن ەستەن شىعارماعان ءجون.
كىشى فلويد مەيۋەزەر, امەريكالىق بوكسشى, بەس سالماق دارەجەسىندە الەمنىڭ ەكس-چەمپيونى:
«گولوۆكيننىڭ سوققىلارى جويقىن ەكەنىنە كۇمانىم جوق. بىراق ول باياۋ قوزعالادى, سونداي-اق قاتەلىكتەرى دە كوپ. ونىڭ الۆارەستى جەڭەتىنىنە كۇمانىم بار. «كانەلو» قازىرگى ۋاقىتتا ۇزدىك بوكسشىلاردىڭ ءبىرى. ونى قاتتى سىيلايمىن ءارى GGG-دان ايلاسىن اسىرارىنا سەنىمدىمىن. بۇل جەكپە-جەك 12 راۋندقا دەيىن سوزىلادى دەپ ويلايمىن», دەپ جازدى ونىڭ ءسوزىن Boxingnews24.com باسىلىمى.مەيۋەزەر گولوۆكيننىڭ ايگىلى قارسىلاستارىنىڭ ءبىرى. قازاقستاندىق بوكسشى تۋرالى جاعىمسىز پىكىر ايتقاندى ۇناتادى دەپ تە ايتۋعا بولادى. ال ءوز كەزەگىندە وتانداسىمىز ونى بىرنەشە رەت شارشى الاڭدا كۇش سىناسىپ كورۋگە شاقىرعان بولاتىن. مەيۋەزەرمەن جۇدىرىقتاسۋ ءۇشىن ءتىپتى, سالماعىن ازايتۋعا دەيىن كەلىسەتىنىن ايتقان ەدى. الايدا, فلويد وسىعان دەيىن بىرقاتار اتاقتى بوكسشىلاردى جەڭگەنىن العا تارتىپ, گەنانىڭ ۇسىنىسىنان ءۇزىلدى-كەسىلدى باس تارتقان بولاتىن.
اندرە ۋورد, امەريكالىق بوكسشى, جارتىلاي اۋىر سالماقتا WBA (Super), WBO جانە IBF نۇسقالارى بويىنشا الەم چەمپيونى:
«ەگەر سىرتتاي قارايتىن بولساق, گولوۆكيننىڭ «كانەلودان» ىرىلەۋ ەكەنى انىق كورىنىپ تۇر. بىراق بۇل گولوۆكينگە باسىمدىق بەرە قويار ما ەكەن؟! الۆارەس ونىڭ جويقىن سوققىلارىنا توتەپ بەرە الا ما؟! مىنە, وسى ەكى جايت ماعان دا قىزىق بولىپ تۇر. كىمنىڭ جەڭىسكە جەتەتىنىن ناقتى ايتۋ قيىن. ءبىر عانا جويقىن سوققى كەزدەسۋدىڭ تاعدىرىن عانا ەمەس بوكسشىنىڭ دا كارەراسىن كۇرت وزگەرتىپ جىبەرۋى مۇمكىن. بۇل جەكپە-جەكتە نە بولارىن, كىمنىڭ جەڭىسكە جەتەرىن ءوزىم دە بىلمەيمىن. ءبىر ايتارىم, بۇل ناعىز بوكس بولماق. مۇندا بارلىعى بار. جانكۇيەرلەر ۇزاققا دەيىن وسى كەزدەسۋدى تالقىلايتىنىنا سەنىمدىمىن», دەدى ول. ۋوردتىڭ بۇل پىكىرىن ESPN باسىلىمى حابارلادى.ايتا كەتەر تاعى ءبىر جايت, بوكستا بەلبەۋدى قورعاعاننان, قايتا وعان ۇمىتكەر بولعان جەڭىلىرەك. سەبەبى, گولوۆكين جەڭىلەتىن بولسا, بۇكىل اتاعىنان ايىرىلىپ, ءبارىن باسىنان باستاۋىنا تۋرا كەلەدى. ال الۆارەس ەسە جىبەرسە جوعالتاتىن تۇگى جوق دەپ ايتۋعا بولادى.
كىشى حۋليو سەزار چاۆەس, مەكسيكالىق بوكسشى, WBC نۇسقاسى بويىنشا الەمنىڭ ەكس-چەمپيونى:
«بۇل وتە جاقسى جەكپە-جەك بولماق. بۇل جەردە ءبىر ماسەلە بار, «كانەلو» GGG-ءدىڭ ادىسىنە قارسى تۇرىپ, ءوز ونەرىن كورسەتە الا ما؟ مەنىڭ ويىمشا الۆارەس قارسىلىق تانىتا المايدى. جەكپە-جەكتىڭ باسىندا «كانەلو» گولوۆكينگە سەس كورسەتە الار ما ەكەن؟ ءوز باسىم سوڭعى راۋندتاردا GGG-ءدىڭ نوكاۋتپەن جەڭەتىنىنە ءباس قويامىن», دەپ جازدى كىشى چاۆەس ءوز ينستاگرامىندا.ساۋل الۆارەس سوڭعى كەزدەسۋىن ءدال وسى وتانداسى كىشى چاۆەسكە قارسى وتكىزگەن. ناتيجەسىندە, تورەشىلەردىڭ ءبىراۋىز شەشىمىمەن «كانەلو» جەڭىسكە جەتكەن بولاتىن. سوندىقتان, الۆارەستىڭ باسىم ءارى وسال تۇستارىن وسى بوكسشى جاقسى بىلەدى دەپ ايتۋعا بولادى. ءدال وسى بوكس كەشىنىڭ سوڭىندا الۆارەس كەلەسى ايقاسىن گولوۆكينگە قارسى وتكىزەتىنىن رەسمي تۇردە مالىمدەدى.
كىشى كريس يۋبەنك, بريتان بوكسشىسى, ەكىنشى ورتا سالماقتاعى IBO بەلبەۋىنىڭ يەگەرى:
«ەگەر «كانەلو» رينگكە سەنىمدى تۇردە شىعار بولسا, جەڭىسكە جەتەدى. مەنىڭشە, وتكەن جىلى گولوۆكيننىڭ كۇشىنەن سەسكەنگەندىكتەن بەلىندە تۇرعان بەلبەۋىن ەش قارسىلىقسىز بەردى. بۇل ونىڭ وسىنداي قادامعا بارۋىنىڭ جالعىز سەبەبى. ال ەگەر الۆارەس GGG-ءدىڭ شاما-شارقىن ويلاپ, ىشتەي جۇرەكسىنىپ شىعار بولسا, جەڭىستەن دامەتپەسە دە بولادى», دەدى كىشى يۋبەنك boxingnewstoday.net باسىلىمىنا بەرگەن سۇحباتىندا.ارينە, قانداي بوكسشى بولماسىن شارشى الاڭعا پسيحولوگيالىق دايىندىقپەن شىعۋى كەرەك. ەگەر ءاربىر سپورتشى رينگكە قارسىلاسىنان سەسكەنىپ شىعار بولسا, قانشا جەردەن كۇشتى بولعانمەن, جەڭىسكە جەتۋى ەكىتالاي.
دەنيەل دجەيكوبس, امەريكالىق بوكسشى, گولوۆكيننىڭ سوڭعى قارسىلاسى:
«گولوۆكيننىڭ وسال تۇستارىن مەن اشىپ كورسەتتىم. ءدال وسى كەزدەسۋدەگىدەي گەنانىڭ قولدارىن تومەن ءتۇسىرىپ جۇدىرىقتاسقانىن كورمەگەندەرىڭىزگە سەنىمدىمىن. شىنى كەرەك, بۇل جەكپە-جەكتە كىمنىڭ جەڭەتىنى ماعان ءبارى-ءبىر. بىراق GGG ءسال ىرىلەۋ بولعاندىقتان جەڭىسكە جەتۋى مۇمكىن. وسى ايقاستىڭ جەڭىمپازىمەن كۇش سىناسۋعا دايىنمىن», دەدى Boxingnews24.com تىلشىسىنە بەرگەن سۇحباتىندا.سىرتتاي قاراعان ادام «جەڭىلگەن كۇرەسكە تويمايدى» دەگەن وسى بولار دەگەن پىكىردە قالۋى مۇمكىن. ارينە, دجەيكوبستىڭ اسا قاتەرلى اۋرۋدان جازىلىپ شىعىپ, گولوۆكيندەي بوكسشىمەن لايىقتى دەڭگەيدە جۇدىرىقتاسىپ شىعۋى ەرلىككە پارا-پار. بىراق جوعارىدا ايتىلعانداي بۇل وتانداسىمىزدىڭ الۆارەسكە ارنايى ازىرلەگەن جوسپارى بولۋى ابدەن مۇمكىن.
ەستەرىڭىزگە سالا كەتەيىك, گەننادي گولوۆكين مەن ساۋل الۆارەس اراسىنداعى كەزدەسۋ 16 قىركۇيەك كۇنى, ياعني وسى سەنبىدە (استانا ۋاقىتىمەن 17 قىركۇيەك, جەكسەنبى) لاس-ۆەگاستاعى T-Mobile ارەناسىندا وتەدى. بۇل كەزدەسۋگە GGG ەنشىسىندەگى بارلىق بەلبەۋىن (WBA (Super), IBO, WBC جانە IBF) قويسا, «كانەلو» The Ring اتاعىن ساراپقا سالماق.
ايتا كەتەرلىك تاعى ءبىر جايت, گەننادي وسىعان دەيىن 37 كەزدەسۋ وتكىزىپ, بارىندە جەڭىسكە جەتتى. ونىڭ 33-ءىن نوكاۋتپەن اياقتادى. ال ساۋل الۆارەس 49 ايقاستىڭ 34-ىندە قارسىلاسىن نوكاۋتقا جىبەرسە, بىرەۋىندە جەڭىلىپ, تاعى بىرىندە تەڭ ءتۇستى.
دايىنداعان ايان ءابدۋالي, «ەگەمەن قازاقستان»