وتكەن سارسەنبى كۇنى الماتىداعى قازاقستان ستراتەگيالىق زەرتتەۋلەر ينستيتۋتىندا بەلگىلى جۋرناليست بيگەلدى عابدۋلليننىڭ « ۇلى كوش» («ۆەليكوە كوچەۆە») اتتى جاڭا كىتابىنىڭ تۇساۋكەسەرى بولىپ ءوتتى.
كەزىندە ولجاس سۇلەيمەنوۆتىڭ وتكەن تاريحتى اقىن كوزىمەن زەردەلەگەنى ءمالىم. مىنا كىتاپتا اۆتور حالقىمىزدىڭ ۇلتتىق مەملەكەت قۇرۋ ورايىنداعى التى عاسىرلىق تاريحىن جۋرناليستىك تۇرعىدان پايىمداۋعا ارەكەت جاساپتى. قازىرگى قوعامنىڭ پروبلەمالارىن, وتكەن تاريحتى دا جاقسى بىلەتىن تالانتتى قالامگەر الدىنا قويعان ماقسات ۇدەسىنەن شىققاندىعىن تۇساۋكەسەر راسىمىنە جينالعاندار تىلگە تيەك ەتتى. ينستيتۋت ديرەكتورى بولات سۇلتانوۆ ءدال وسى كۇنگى نومىرىندە «ەگەمەن قازاقستان» گازەتىنىڭ كىتاپتىڭ «قازاقستان. ءوز جولى. نازارباەۆ ءداۋىرى» دەگەن تاراۋىن شاعىن كىرىسپەمەن جاريالاپ, ارىپتەستىڭ يگى ءىسىن تىلەكتەستىكپەن سۇيىنشىلەگەن سەرگەكتىگىن باسقا جۋرناليست اعايىندارعا ۇلگى ەتە سويلەدى.
كىتاپ «ەدەلۆەيس» باسپا ءۇيىنەن 2000 دانا تارالىممەن شىققان. مۇندا كەرەي مەن جانىبەك حانداردان باستاپ, قازاقتىڭ سوڭعى ۇلى حانى كەنەسارىعا دەيىنگى قاتپارلى تاريح, قازاق ورداسىنىڭ باسىنداعى شىرعالاڭدار كەزەڭ-كەزەڭمەن, الىپ تۇلعالاردىڭ ءومىر تاريحتارىمەن ساباقتاستىرا پايىمدالعان. قازاقستاننىڭ كەڭەستىك داۋىردەگى 14 باسشىسىنىڭ عۇمىرنامالارى ارقاۋ ەتىلگەن ەسسەلەر دە وتە تارتىمدى. سول 14-ءتىڭ ءتورتەۋى عانا قازاق. ەڭبەگىن قازاقستان تاۋەلسىزدىگىنىڭ 20 جىلدىعىنا تارتۋ ەتكەن اۆتور وسىناۋ كىتابى وقىرمانعا جول تارتقان بۇگىنگى كۇندى ءوزىنىڭ باقىتتى ءارى قۋانىشتى كۇنى دەپ ەسەپتەيتىنىن ايتتى.
زامانىمىزدىڭ اسا كورنەكتى جازۋشىسى ءابدىجامىل نۇرپەيىسوۆ جاس دوسىنىڭ قۋانىشىنا قۇتتى بولسىن ايتىپ: «بۇگىنگە دەيىن جارتىسىنان اۋدارا وقىپ شىقتىم. سوندا مۇنىڭ وتە پايدالى كىتاپ ەكەنىنە كوزىم جەتتى. بۇل ءوزى كەڭ تۇردە ءھام ەگجەي-تەگجەيلى جاسالعان ەنتسيكلوپەديالىق ءتۇسىندىرمە سوزدىك سياقتى ەكەن», دەدى. سونىمەن بىرگە, ابەڭ ماسكەۋدىڭ «حۋدوجەستۆەننايا ليتەراتۋرا» باسپاسىنان الداعى ءبىر ايدىڭ بەدەرىندە 9 مىڭ تارالىممەن شىققالى جاتقان اتاقتى «قان مەن تەردىڭ» تۇساۋكەسەرىن ءدال وسى زالدا وتكىزۋ جونىندەگى بولات سۇلتانوۆتىڭ ۇسىنىسىن قابىل العاندىعىن ءمالىم ەتتى. الداعى 22 قازان كۇنى 87 جاستىڭ سەڭگىرىنە شىعاتىن قازاق ادەبيەتى كوريفەيىنىڭ عابدۋللين كىتابىنىڭ تۇساۋكەسەرىنە قاتىسىپ, ءوزىن مۇنداي جيىنداردا سوڭعى كەزدە سيرەك كورەتىن كوپشىلىككە كوزايىم بولۋىنىڭ ءوزى دە ءبىر عانيبەت-اۋ دەپ ويلادىق.
قورعانبەك امانجول,
سۋرەتتى تۇسىرگەن بوريس بۋزين.