بۇگىن استانادا قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆ پاكىستان يسلام رەسپۋبليكاسىنىڭ پرەزيدەنتى مامنۋن حۋسسەينمەن كەزدەستى, دەپ حابارلايدى primeminister.kz.
كەزدەسۋ بارىسىندا ەكى ەلدىڭ ساۋدا-ەكونوميكالىق, عىلىمي-تەحنيكالىق, مادەني-گۋمانيتارلىق قاتىناستار, سونداي-اق, وتىن-ەنەرگەتيكالىق كەشەن, اۋىل شارۋاشىلىعى, دەنساۋلىق ساقتاۋ سالالارىنداعى ىنتىماقتاستىعىن نىعايتۋ ماسەلەلەرى تالقىلاندى.
ءوزارا ءىس-قيمىلدىڭ باسىمدىقتى باعىتتارى رەتىندە تاۋ-كەن ءوندىرىسى, ءتۇستى مەتاللۋرگيا, ماشينا جاساۋ, ەنەرگەتيكا, جەڭىل ونەركاسىپ, كولىك جانە كوممۋنيكاتسيالار سالالارى اتالدى.
شانحاي ىنتىماقتاستىق ۇيىمى كەڭىستىگىنىڭ حالىقارالىق كولىك-لوگيستيكا جۇيەسىنە ىقپالداسۋى تۇرعىسىنان قازاقستاننىڭ «نۇرلى جول» جاڭا ەكونوميكالىق باعدارلاماسى مەن «جىبەك جولىنىڭ ەكونوميكالىق بەلدەۋى» قىتاي باستاماسىن ىسكە اسىرۋ تاقىرىبى قوزعالدى.