بىرەۋدىڭ قوراسىنا ءتۇسىپ, اق ادال مالىن ۇرلاپ كەتكەندەر «ساقپىن, وسىنىمدى ەشكىم بىلمەيدى» دەپ ويلايتىن بولۋى كەرەك. ايتپەسە, ءبىر تۇسكەن ۇيىنە ەكىنشى مارتە كەلەر مە؟!
سايرام اۋداندىق ىشكى ىستەر ءبولىمىنىڭ كەزەكشىسىنە قوڭىراۋ شالعان قۇتارىس اۋىلىنىڭ تۇرعىنى قوراداعى ءۇش جىلقىسىنىڭ ۇرلانعانىن ايتادى. جەدەل ىزدەستىرۋ ناتيجەسىندە كۇدىكتى ەكى ازامات ۇستالعان. ابدەن دانىككەن ۇرىلار ساقتىقتى ۇمىتسا كەرەك. سول اۋىلدىڭ جۇك ماشيناسى بار تۇرعىنىنا ءۇش جىلقىنى وزدەرىنىڭ تۇراعىنا اپارىپ بەرۋىن وتىنەدى. ولاردىڭ ءىس-ارەكەتتەرىنەن سەزىك العان الگى ازامات پوليتسياعا حابارلاسادى.
ماقتاارال جانە وتىرار اۋدانىنىڭ تۋماسى, ورىمدەي ەكى جىگىت قىلمىس ۇستىندە ۇستالعان. ولاردان ءۇش جىلقى قايتارىلىپ, زاڭدى يەسىنە بەرىلگەن. كۇدىكتى ازاماتتار بىرەۋدىڭ مۇلكىن يەمدەنۋدى ار كورمەيدى ەكەن. ءۇش جىلقىسىن الدىرعان ازامات تامىز ايىندا جيىرما شاقتى ۇندىگىنەن ايىرىلىپ, ويبايلاپ قالعان. زاتى قۇس قوي دەپ ونشالىقتى ىندەتپەسە كەرەك. ءۇي يەسىنىڭ قاتتى ىزدەۋ سالماعانىنا دانىككەن ەكەۋ ەندى جىلقىلاردى ايداپ كەتەمىن دەپ ءجۇرىپ قولعا تۇسكەن.
ءبىر ۇيگە ەكى مارتە تۇسكەن ۇرىلار قۇنى 2 ميلليون تەڭگە شىعىن كەلتىرگەن. قازىعۇرت اۋدانىندا دا 15 مالدى ۇرلاعان توپتاسقان باۋكەسپەلەر قولعا ءتۇستى.
ولار قاماۋعا الىندى. اتالعان فاكتىلەر بويىنشا قىلمىستىق كودەكسىنىڭ 188-ءشى «ۇرلىق» بابى بويىنشا ءىس قوزعالدى. قازىر سوتقا دەيىنگى تەرگەۋ امالدارى جۇرگىزىلىپ جاتىر.
باقتيار تايجان, «ەگەمەن قازاقستان»
وڭتۇستىك قازاقستان وبلىسى