«داۋدىڭ باسى دايرابايدىڭ كوك سيىرى» دەپ قايران بي-اعاڭ, بەيىمبەت مايلين جازعانداي بىرقاتار تۇسىنبەستىك پەن كەلىسپەۋشىلىكتىڭ باسى ەلىمىزدەگى ۇلكەندى-كىشىلى قالالارداعى كوشەلەرگە قويىلاتىن اتاۋلاردان باستاۋ الاتىنى بار.
وسىنداي كەيبىر كەرەعارلىقتىڭ الدىن الۋ ءۇشىن سوڭعى كەزدەرى وبلىس ورتالىعىندا كوشە مەرەكەلەرىن وتكىزۋ ءۇردىسى قولعا الىندى. بۇل ءىس-شارالار تەك قۇر دۇرمەك پەن كونتسەرتتىك نومىرلەردى قىزىقتاۋ ءۇشىن وتكىزىلمەيدى. نەمەسە بەلگىلى ءبىر قولونەر بۇيىمدارىن تۇرعىنداردىڭ نازارىنا ۇسىنۋ ءۇشىن جاسالمايدى. ءسوز جوق, كوشە مەرەكەلەرى كەزىندە ونى ودان ءارى كوركەيتۋ مەن اباتتاندىرۋ ماسەلەلەرى تالقىلانادى. ونى شەشۋدىڭ جولدارى ورتاعا تاستالادى. بۇعان قوسا كوشە مەرەكەسىنىڭ بۇدان دا گورى تەرەڭىرەك ءمانىسى بار دەۋگە بولادى.
ەڭ الدىمەن كوشە مەرەكەسىنىڭ مازمۇن مەن ءتۇر جاعىنان تىعىز ۇيلەسىم تابۋىنا جاعدايلار جاسالادى. كوشە ەسىمى بەرىلگەن قايراتكەردىڭ كىم بولعانى, وسى توپىراققا قاتىسى مەن وعان شاپاعاتىن تيگىزگەنى جونىندە كەڭ اۋقىمدى تۇسىنىك جۇمىستارى جۇرگىزىلەدى. بۇعان ەسىمدەرى ەلگە تانىمال تاريحشىلار مەن ولكەتانۋشىلار, ونوماستيكا مەن ءتىل سالاسىندا ەڭبەك ەتىپ جۇرگەن عالىمدار مەن لينگۆيست ماماندار قاتىسادى.
− كوشەلەرگە ۇسىنىلعان اتاۋلارعا ساراپتاما مەملەكەتتىك مەكەمە ارقىلى جۇرگىزىلەدى. ودان كەيىن ونى رەسپۋبليكالىق ونوماستيكالىق كوميسسيا مۇشەلەرى بەكىتەدى. قايتكەندە دە كوشەلەرگە اتاۋ بەرۋ جونىندە كەشەندى كوزقاراس ۇستانعاندى ءجون كورەمىز. وسىنداي قاعيدات كەيىنگى كەزدەرى ءداستۇر مەن تاجىريبەگە ەنە باستاعان كوشە مەرەكەلەرىنە دە ءتان. ونداعى اشىق اڭگىمەدەن سوڭ كەيبىر ەكىۇشتى وي مەن كوزقاراس تۋعىزىپ جۇرگەن ماسەلەلەر دە ءوز ىڭعايىن تابا باستاعانىنا كوز جەتكىزىپ كەلەمىز, − دەدى گازەت تىلشىسىنە اقتوبە وبلىستىق تىلدەردى دامىتۋ باسقارماسىنىڭ باسشىسى گۇلايىم تولەباەۆا.
جەرگىلىكتى ءتىل باسقارماسى باسشىسىنىڭ مالىمدەۋىنشە, جاڭا كوشەلەرگە تەك قازاق ۇلتىنان شىققان تۇلعالاردىڭ ەسىمدەرىن بەرۋ شارت ەمەس. كەرىسىنشە, اقتوبە قالاسىندا وسى ەلدىڭ داڭقىن اسىرعان وزگە ۇلت وكىلدەرىنىڭ اتىنداعى كوشە اتاۋلارى جەتكىلىكتى. ونى نيكولاي ونوتريەنكو, ميحايل پروحوروۆ, الەكسەي ماريسەۆ جانە ۆيكتور پاتساەۆ دەپ جالعاستىرا بەرۋگە بولادى. بۇلاردىڭ العاشقىلارى كەڭەس وداعىنىڭ باتىرلارى بولسا, كەيىنگىسى اقتوبە ايماعىندا تۋىپ-وسكەن عارىشكەر ەكەنى كوپشىلىككە بەلگىلى, دەدى ول ودان ءارى.
اقتوبە كۇن سايىن ءوسىپ-وركەندەپ, قاناتىن كەڭگە جايىپ كەلە جاتقان رەسپۋبليكانىڭ باتىس وڭىرىندەگى ءىرى قالا. مۇندا جاڭادان بوي تۇزەپ جاتقان كوشەلەر مەن ورامدار جانە شاعىن اۋداندار جەتەرلىك. قازىر اتاۋ ءالى بەرىلە قويماعان 200-گە تارتا كوشە بار. اقتوبەلىك كوشە جاناشىرلارى ونىڭ بارىنە كوشەلى كوزقاراس تۇرعىسىنان كەلۋدى كوزدەيدى.
تەمىر قۇسايىن, «ەگەمەن قازاقستان»
اقتوبە