– قاۋىننان ءبىر ءتىلىم بولسا دا, اۋىز ءتيىڭىز, ويتكەنى, باقشا پاتشايىمى سىزگە باقىت اكەلەدى, – دەيدى وبلىس ورتالىعىنداعى ساياباقتا ء«بىر شاڭىراق – بارىمىزگە ورتاق» اتتى فەستيۆال وتكىزگەن تاجىكتەر. اتاۋىنىڭ ءوزى قىزىقتىرا شاقىرىپ تۇرعان مەرەكەگە وڭىردەگى ەتنومادەني بىرلەستىكتەر, قالا تۇرعىندارى, قوناقتار جينالدى.
مەرەكەنى ۇيىمداستىرۋشى – وبلىستاعى «سيتوراي سومون» تاجىك ەتنومادەني بىرلەستىگى. ال «سيتوراي سومون» دەگەن ءسوز تاجىك تىلىنەن اۋدارعاندا «جارىق جۇلدىز» دەگەن ماعىنا بىلدىرەدى ەكەن. تاجىكتەر دە وتكەنىن كونە شەجىرەدەن ىزدەيدى. ءداستۇر بويىنشا, تامىزدىڭ سوڭىنا قاراي ەرتەلەتىپ كارنايدان اۋەندەر قالىقتاپ, جۇرتتى قاۋىن مەرەكەسىنە شاقىراتىن بولعان. ءسويتىپ, سوگدي ديقاندارى وسىرگەن ءارتۇرلى قاۋىن تۇرلەرىن اكەلىپ, دامدىلىگىمەن قۋانتادى. ولار قاۋىنعا دەگەن وزدەرىنىڭ ريزاشىلىقتارىن وسىلاي بىلدىرگەن ەكەن. ءتىپتى, تاجىكستاننىڭ گيسسار دەگەن كەنتىندە قاۋىن ۇلگىسىندە جاسالىنعان شايحانا دا اشىلىپتى.
مەرەكەگە جينالعاندارعا ابدەن پىسكەن قاۋىندى قالاي تاڭداۋ كەرەكتىگى, قانداي ەمدىك قاسيەتتەرى بار ەكەندىگى ايتىلدى. ساياباق ىشىندە جاسالعان ۇستەل باسىندا ءدامدى قاۋىندار ءتىلىنىپ, جاڭا پىسكەن پالاۋمەن قوسىپ جەپ, جينالعاندار ءبىر جىرعاپ قالدى. ءبىر-بىرىمەن قاۋىندى جىلدام جەۋدەن جارىس وتكىزىپ, ءتۇرلى ويىندار ۇيىمداستىرىلدى.
– قازىرگى ۋاقىتتا وڭىردە 500-دەي تاجىك ۇلتىنىڭ وكىلى تۇرامىز. نەگىزى, تاجىكتەردىڭ كوبى وڭتۇستىك قازاقستان وبلىسىن مەكەندەيدى. قازىر سولتۇستىككە قاراي كوشۋ جايلى ەستىپ, وسى جاققا كەلگىسى كەلەتىندەر دە بار. وسىدان ءتورت جىلداي ۋاقىت بۇرىن وبلىس ورتالىعىندا تاجىك زيالىلارىنىڭ قولداۋىمەن «سيتوراي سومون» ەتنومادەني بىرلەستىگى قۇرىلدى. ءبىزدىڭ بىرلەستىك تە باسقالار سەكىلدى, ايماقتاعى بارلىق مادەني شارالارعا قاتىسامىز. بۇگىنگى مەرەكە بارىسىندا ۇلتىمىزدىڭ سالت-ءداستۇرى, ۇلى ادامدارى, تاعامدارى, مادەنيەتى, قولونەرى, مۋزىكالىق اسپاپتارى, قاۋىننىڭ وزىندىك قۇپيالارى جايلى ايتىپ, ومار حايامنىڭ رۋباياتتارىن جىرلادىق, – دەيدى بىرلەستىك جەتەكشىسى حۋساين گۋلوۆ.
وبلىسىمىزدا اينالىمنان ات وزدىرعان تاجىك ازاماتتارى كوپ. مىسالى, 90-جىلدارى قاشىر اۋدانى, تەرەڭكول اۋىلىنا كەلىپ, تۇراقتاپ قالعان ياكۋب دجابينوۆ تاجىكستاننىڭ ونەر ينستيتۋتىن ءبىتىرىپتى. ءشامشىنىڭ اندەرىن ناقىشىنا كەلتىرە شىرقايدى. وڭىرلىك اسسامبلەيانىڭ بەلدى مۇشەسى. قازىر وسى اۋىلدا ماماداليۆتەردىڭ وتباسى دا ءوز كاسىپتەرىن اشىپ, جىلىجايدا قيار, قىزاناق وسىرۋدە. قاۋىن مەرەكەسىنىڭ سوڭىندا ياكۋب دجابينوۆ, دوستىق ءۇيىنىڭ حورەوگرافيالىق انسامبلدەرى تۋعان جەر, ەل, دوستىق, بىرلىك تۋرالى اندەر شىرقاپ, بي بيلەدى.
فاريدا بىقاي, «ەگەمەن قازاقستان»
پاۆلودار
سۋرەتتەردى تۇسىرگەن ماقسات ايتباي