كۇرەس افينادا (گرەكيا) ءوتىپ جاتقان كۇرەس تۇرلەرىنەن كادەتتەر اراسىنداعى الەم چەمپيوناتىندا گرەك-ريم كۇرەسىنىڭ بالۋاندارى جارىستى اياقتادى. ەلىمىزدىڭ جاس بالۋاندارى ءبىر كۇمىس جانە ءبىر قولا مەدالعا يە بولدى.
الەم چەمپيوناتىنىڭ ەكىنشى كۇنى كىلەمگە شىققان ءتورت بىردەي بالۋانىمىز قولا مەدال ءۇشىن بەلدەسۋگە شىققان ەدى. وكىنىشكە قاراي, تورتەۋدىڭ اراسىنان تەك ەراسىل مامىربەكوۆ قانا الەم چەمپيوناتىنىڭ جۇلدەگەرى اتاندى. 42 كيلو سالماقتا كۇرەسكەن ەراسىل مامىربەكوۆ جۇبانىش بەلدەسۋدە تۇرىك بالۋانىن 5:3 ەسەبىمەن جەڭدى. قولا مەدالدى ۇندىستاندىق بالۋانمەن ساراپقا سالعان وتانداسىمىز قارسىلاسىن 2:1 ەسەبىمەن جەڭدى.
فۋتزال فۋتزالدان قازاق جانە الەم جانكۇيەرلەرىنە كاكاۋ ەسىمىمەن تانىلعان برازيليالىق جاتتىقتىرۋشى ريكاردو كامارا سوبرال فۋتزالدان قازاقستان ۇلتتىق قۇراماسىن قايتا جاتتىقتىراتىن بولدى. 45 جاستاعى باپكەر ەلىمىزدىڭ باس قۇراماسىن 2013-2016 جىلدار ارالىعىندا جاتتىقتىرعان بولاتىن. وسى جىلدار ارالىعىندا قازاقستان قۇراماسى كاكاۋدىڭ باپكەرلىگىمەن 2016 جىلعى الەم چەمپيوناتىنا قاتىسىپ, 1/8 فينالعا شىقسا, ءدال سول جىلى ەۋروپا چەمپيوناتىندا ءۇشىنشى ورىن يەلەنگەن ەدى.
ەندى ۇلتتىق قۇرامادا كاكاۋعا «قايرات» فۋتزال كلۋبىنداعى كومەكشىلەرى ماريو راۋلينو مەن رابەر كلەيمار كومەكتەسەدى. كاكاۋ «قايرات» كلۋبىنا باسا كوڭىل ءبولۋ ءۇشىن ۇلتتىق قۇراماداعى قىزمەتىن 2016 جىلى وتانداسى الەسيوعا تاپسىرعان بولاتىن.
اۋىر اتلەتيكا اۋىر اتلەتيكادان قازاقستان قۇراماسىنا دوپينگ ەرەجە بۇزۋشىلىقتارىنا بايلانىستى اقش-تىڭ اناحايم (كاليفورنيا) قالاسىندا وتەتىن 2017 جىلعى الەم چەمپيوناتىنا قاتىسۋعا تىيىم سالىندى, دەپ جازادى insidethegames.biz باسىلىمى.
دەرەككوزدىڭ مالىمەتىنشە, دوپينگ ەرەجە بۇزۋشىلىقتارىنا بايلانىستى قازاقستاننان بولەك, تاعى سەگىز مەملەكەتكە دۇنيەجۇزىلىك دودادا ونەر كورسەتۋگە قاتاڭ تىيىم سالىنعان ەكەن. ولار – رەسەي, قىتاي, بەلارۋس, ازەربايجان, ارمەنيا, تۇركيا, ۋكراينا جانە مولداۆيا. وسى اتالعان قۇرامالاردى بەيجىڭ جانە لوندون وليمپياداسىنداعى دوپينگ-سىنامالارىن قايتا تەكسەرۋ ناتيجەسىندە بىرقاتار زىلتەمىرشىلەردىڭ اعزاسىنان تىيىم سالىنعان پرەپاراتتار تابىلعان.
حالىقارالىق اۋىر اتلەتيكا فەدەراتسياسىنىڭ (IWF) اتقارۋ كوميتەتىنە وسى اتالعان قۇرامالارعا قاتىستى قانداي شارا قولدانۋ كەرەكتىگى جايىندا ارنايى كوميسسيا بۋداپەشتتە قورىتىندى شىعارعان.
ازىرلەگەن ءالي بيتورە, «ەگەمەن قازاقستان»