قىزىلجاردا سالاماتتى ءومىر سالتىن ناسيحاتتاۋدى ماقسات ەتكەن جەكپە-جەك تۇرلەرىنەن تۇڭعىش رەت حالىقارالىق تۋرنير ۇيىمداستىرىلدى. «رينگ كورولى-2017» حالىقارالىق جارىسىنا استانا, الماتى, جامبىل, قوستاناي, پەتروپاۆل, قىرعىزستاننىڭ بىشكەك قالالارىنان جاسى 35-تەن اسقان جيىرماعا جۋىق ارداگەر سپورتشى قاتىسىپ, قولعاپ ءتۇيىستىردى.
وبلىستىق دەنەشىنىقتىرۋ جانە سپورت باسقارماسىنىڭ باسشىسى رۋسلان ەسەناليننىڭ ايتۋىنشا, شارشى الاڭدا جۇدىرىقتاسۋعا نيەت بىلدىرگەن ۇمىتكەرلەرگە جاس مولشەرىنىڭ شەكتەۋلىگى جانە دەنساۋلىعىنىڭ مىقتىلىعىمەن قوسا, سوڭعى ءۇش جىل بويى ۇلتتىق قۇراماعا مۇشە بولماۋ سەكىلدى جەڭىلدەتىلگەن شارت-تالاپتار قويىلعان. سول سياقتى سپورت شەبەرلەرىنە قاتىسۋعا دا تىيىم سالىندى. دەسەك تە, بۇرىنعى اتاق-ماراپاتتارىنان ات ۇركەتىن گۇرزى جۇدىرىق يەلەرى ارنايى ات ارىتىپ كەلىپ, ىرىكتەۋ كەزەڭدەرى جان الىسىپ, جان بەرىسكەن كەزدەسۋلەرگە تولى بولدى. ماسەلەن, قىزىلجارلىق جاباي احمەتوۆ جەرلەسى رۋسلان كانافيندى ءبىرىنشى راۋندتا تەحنيكالىق نوكاۋتقا جىبەرسە, 52 جاستاعى اندرەي تسارەۆ تاەكۆوندودان قارا بەلبەۋ يەسى, پانكراتيوننان الەم جۇلدەگەرى, «ارلان گريپ» ءتۋرنيرىنىڭ بىرنەشە مارتە جەڭىمپازى 37 جاستاعى الماتىلىق كارەن پاشەكيانعا اجەپتاۋىر قارسىلىق كورسەتە ءبىلدى.
ال فينالدىق سايىسقا ىركىلمەي جەتكەن كىل مىقتىلار بەس سالماق دارەجەسى بويىنشا كۇش سىناستى. شارشى الاڭعا ءبىرىنشى بولىپ جاباي احمەتوۆ پەن قوستانايلىق راۋف اليەۆ كوتەرىلدى. راۋف قارسىلاسىن سوققىنىڭ استىنا العانىمەن, جاباي ءابجىل قيمىل تانىتىپ, جەڭىستى ۋىسىنان شىعارمادى. پەتروپاۆل قالاسى زاۋىتتارىنىڭ بىرىندە تەمىر جونۋشى بولىپ جۇمىس ىستەيتىن سانات ماقانوۆ اتاعى جەر جاراتىن بىشكەكتىك قارسىلاسى تۋردىوگلى ابدىلاحاتتان ەش ىققان جوق. تاجىريبەلى بوكسشىعا قارسى جاستىق قايراتىن قارسى قويا ءبىلدى. 80 كيلو سالماق دارەجەسىندە ەمىل يمانبەكوۆ ەربول جۇلىمبەكوۆتەن ايلاسىن اسىردى.
بوكسسۇيەر قاۋىم سپورتتىڭ بىرنەشە ءتۇرىن كاسىپقويلىقپەن مەڭگەرگەن كارەن پاشەكيانعا ەرەكشە قۇرمەت كورسەتىپ, ونىڭ جەڭەتىنىنە ەش ءشۇبا كەلتىرمەگەن ەدى. بىراق, ول ءبىرىنشى راۋندتا كۇتپەگەن جەردەن جاراقات الىپ, جەڭىس اندرەي ستەپۋراعا بۇيىردى. اسا اۋىر سالماقتا پەتروپاۆلدىق الىپ كۇش يەلەرى ءادىل نۇرجاۋىپوۆ پەن اندرەي بەيسەنباەۆ جۇدىرىقتاسىپ, الدىڭعىسى ءسال-ءپال باسىمدىقپەن جەڭىسكە جەتتى. بايگەگە تىگىلگەن 1, 2 ميلليون تەڭگە ءار سالماق بويىنشا انىقتالعان «رينگ كورولدەرىنە» سالتاناتتى تۇردە تابىس ەتىلدى.
قىزىلجار تورىندە ەلىمىز بويىنشا تۇڭعىش رەت ۇيىمداستىرىلعان حالىقارالىق «رينگ كورولى» ءتۋرنيرىن داستۇرگە اينالدىرۋدى سپورت جانە دەنەشىنىقتىرۋ باسقارماسى ءوز موينىنا الدى.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى