يسپانيا جەرىندە ءوتىپ جاتقان «ۆۋەلتا» ۆەلوكوپكۇندىگىندە «استانا» كومانداسىنىڭ ەكى بىردەي شاباندوزى ۇزدىك 10-قاتارىندا ءجۇر.
ميگەل لوپەس پەن فابيو ارۋدان بولەك وسى جولى 25 جاسقا تولعان الەكسەي لۋتسەنكو دا كوزگە ءتۇستى. ول 18 كەزەڭدە مارە سىزىعىن ەكىنشى بولىپ كەستى. «ۆۋەلتانىڭ» 18-كەزەڭى بىردەن قازاقستاندىق شاباندوزدىڭ شابۋىلعا شىعۋىمەن باستالدى. ءا دەگەننەن اۋدەمجەرگە وزىپ كەتكەن الەكسەي لۋتسەنكو شىرماۋى كوپ شىڭعا قاراي بەت الدى. «استانا» كومانداسىنىڭ سپورتتىق ديرەكتورى دميتري سەدۋن بۇل جارىستا شابۋىلدار سانى كوپ بولاتىنىن مەڭزەگەن ەدى. «بۇگىنگى جارىس سۋرەتتە قاراپايىم كورىنگەنىمەن, وتە اۋىر كەزەڭ سانالادى. تەگىس جەرى وتە از. بۇرىلىس-قيىلىسى دا جەتىپ ارتىلادى. سوندىقتان دا, مۇنداي جارىس كۇنىندە شابۋىلدار وتە كوپ بولادى».
20 سپورتشىدان تۇراتىن الدىڭعى لەك 10 مينۋتتان استام ۋاقىت باسىمدىلىق الدى. ليدەرلىك توپتىڭ كوش باسىندا بولعان الەكسەي لۋتسەنكو سوڭىنا دەيىن شىداعان ەكى شاباندوزدىڭ ءبىرى ەدى. الايدا, سوڭعى 600 مەتر قاشىقتىق قالعاندا بەلگيالىق ساندەر ارمي وتانداسىمىزدى ارتقا تاستاپ, كەزەڭ جەڭىمپازى اتاندى. ال الەكسەي بولسا ءوز تۋعان كۇنىنە كۇمىس مەدال سىيلادى. «كۇشتى كوبىرەك شىعىنداپ قويعانىمدى بايقادىم. سوڭعى 600 مەتر قالعاندا ءبىر ورىندا تۇردىم دا قالدىم. اياقتا تۇك كۇش قالماپتى. دەگەنمەن, ەكىنشى ورىننىڭ ءوزىن دە قاناعات تۇتامىن. باپكەرلەر, كوماندا جەتەكشىلەرى بارلىعى ريزا بولىپ جاتىر», دەيدى ول.
بۇگىن جارىستىڭ 19-كەزەڭى وتەتىن بولادى. تاۋلى ايماقتا, تاعى دا استانالىق شاباندوزدار قارسىلاستارىنا شاڭ قاپتىرادى دەپ سەنەمىز.
ەرمۇحامەد ماۋلەن,
يسپانيادان ارنايى egemen.kz ءۇشىن