استانادا IPMA جوبالارىن باسقارۋ جونىندەگى ححح دۇنيەجۇزىلىك كونگرەسس ءوتتى. وعان الەمنىڭ 60 ەلىنەن 300-دەن استام دەلەگات قاتىستى. ۇيىمداستىرۋشىلار نازارباەۆ ۋنيۆەرسيتەتىندە كونگرەسس جۇمىسىن قورىتىندىلادى.
ححح دۇنيەجۇزىلىك كونگرەستى جوبالاردى باسقارۋ جونىندەگى قازاقستان قاۋىمداستىعى, «نۇرسۇلتان نازارباەۆتىڭ ءبىلىم بەرۋ قورى» قوعامدىق قورى جانە «نازارباەۆ ۋنيۆەرسيتەتى» دەربەس ءبىلىم بەرۋ ۇيىمى ۇيىمداستىردى. IPMA (جوبالاردى باسقارۋ جونىندەگى حالىقارالىق قاۋىمداستىق – اۆت.) پرەزيدەنتى رەينحارد ۆاگنەردىڭ ايتۋىنشا, العاش رەت مۇنداي كونفەرەنتسيا 1967 جىلى ۆەنادا وتكىزىلگەن. ال 2015 جىلى پانامادا مەرەيتويلىق شارانى وتكىزۋ قۇقىعى قازاقستانعا بۇيىرعان. جوبالاردى باسقارۋ جونىندەگى قازاقستان قاۋىمداستىعىنىڭ ۆيتسە-پرەزيدەنتى, ححح دۇنيەجۇزىلىك كونگرەستىڭ ۇيىمداستىرۋ كوميتەتىنىڭ توراعاسى ماقسات ماماشەۆ جوبالىق مەنەدجمەنت سالاسىندا اتالعان شارانىڭ پوستكەڭەستىك كەڭىستىكتە العاش رەت وتكىزىلىپ وتىرعانىن ايتادى.
ەكى جىلدا ءبىر رەت ۇيىمداستىرىلاتىن كونگرەستە بيىل الەمنىڭ تۇكپىر-تۇكپىرىنەن كەلگەن ماماندار ءوزارا تاجىريبە الماستى. ال «وزگەرىستەردى باسقارۋداعى الدىڭعى قاتارلى قۇزىرەت» تاقىرىبى ەكسپو كورمەسىنە وراي تاڭدالىپتى. «كونگرەسس تاقىرىبى تۋرالى ويلانعان كەزدە الدىمەن بۇكىل الەم نازارى ەكسپو-دا ەكەنىن ەسكەردىك. وندا الدىڭعى قاتارلى تەحنولوگيالار مەن ەنەرگەتيكاعا باسا نازار اۋدارىلعاندىقتان, وسى تاقىرىپقا توقتادىق», دەدى دۇنيەجۇزىلىك كونگرەستىڭ استاناداعى باعدارلامالىق كوميتەتىنىڭ توراعاسى سەرگەي بۋشۋەۆ.
ءباسپاسوز كونفەرەنتسياسىندا IPMA پرەزيدەنتى رەينحارد ۆاگنەر جوبالىق مەنەدجمەنتتى كوپ ادام تۇسىنە بەرمەيتىنىن ايتتى. «ادامدا الدىمەن يدەيا پايدا بولادى. ال ونى جۇزەگە اسىرۋ ءۇشىن جوسپار قۇرىلادى. مىسالى, ەكسپو كورمەسىنىڭ نەگىزگى تاقىرىبى – «بولاشاق ەنەرگياسى». ال بۇل جوبالار ارقىلى جۇزەگە اسىرىلادى. جوبالىق مەنەدجمەنت وسىمەن اينالىسادى», دەپ ءتۇسىندىردى ول.
ءبىر ايتا كەتەرلىگى, جوبالاردى باسقارۋ جونىندەگى قازاقستان قاۋىمداستىعى جىل سايىن ترەنينگتەر وتكىزگەنىمەن, جوبالىق مەنەدجمەنت ەلىمىزدە ماماندىق رەتىندە وقىتىلمايدى. م.ماماشەۆتىڭ ايتۋىنشا, كەلەسى جىلى نازارباەۆ ۋنيۆەرسيتەتىندە وسى سالا بويىنشا كافەدرا قۇرۋ جوسپارلانىپ وتىر.
كونفەرەنتسيا بارىسىندا تەحنيكالىق عىلىمدار كانديداتى حيروشي تاناكا جوبالاردى باسقارۋ جونىندەگى قازاقستان قاۋىمداستىعىنىڭ العاشقى ۇلتتىق سيمپوزيۋمىنا قاتىسقان ءساتىن ەسكە الدى. «2007 جىلى الماتىداعى سيمپوزيۋمدا سپيكەر بولعان ەدىم. سوڭعى ون جىلدا قازاقستاندا كوپ نارسە وزگەرگەنىن كورىپ وتىرمىن. حالىقارالىق كونگرەسس باعدارلاماسى دا كوڭىلىمنەن شىقتى», دەدى حيروشي تاناكا.
مەرەيتويلىق كونگرەسس اياسىندا ۇزدىك جوبالىق مەنەدجەرلەر مەن ۇزدىك جوبالاردى IPMA Awards جوبالارىن باسقارۋ سالاسىنداعى بەدەلدى IPMA سىيلىعىمەن ماراپاتتاۋ سالتاناتى ءوتتى. قۋانارلىعى نازارباەۆ ۋنيۆەرسيتەتى ۇزدىك الەۋمەتتىك جوبا نوميناتسياسىندا ەكىنشى, ورتا كولەمدى ۇزدىك جوبالار ساناتى بويىنشا ءبىرىنشى ورىن العان.
بيىل العاش رەت دۇنيەجۇزىلىك كونگرەسس اياسىندا ICB4 جوبالارىن باسقارۋ بويىنشا قۇزىرەتتىلىك ستاندارتىنا نەگىزدەلگەن «Sea Wolf - Competent PM» ويىنى ۇيىمداستىرىلدى. سونىمەن قاتار كونگرەسس بارىسىندا پانەلدى ديسكۋسسيالار, اكادەميالىق باياندامالار مەن تاجىريبەلىك سەكتسيالار ءوتتى. پانەلدى سەسسيالاردا گەرمانيا, قىتاي, وڭتۇستىك كورەيا, جاپونيا, ۇلىبريتانيا, يتاليا, شۆەيتساريادان كەلگەن سپيكەرلەر ءبىلىم, عىلىم, ەكونوميكانىڭ نەگىزگى سالالارىن, الدىڭعى قاتارلى تەحنولوگيالاردى, اەروعارىش ونەركاسىبىن, باعدارلامالىق قامتاماسىز ەتۋ, بانك ىستەرىن جانە مەملەكەتتىك باسقارۋدى دامىتۋدىڭ سەرپىندى تاسىلدەرى تاقىرىپتارىن قامتىدى. سونداي-اق, ماماندار بيزنەستى باسقارۋدىڭ كۇردەلى پروتسەستەرىن اۆتوماتتاندىرۋ بارىسىندا جوبالاردى باسقارۋ ادىستەرىن قولدانۋ ماسەلەلەرىن دە كوتەردى.
ۇيىمداستىرۋشىلاردىڭ ايتۋىنشا, كەلەسى كونگرەسس 2019 جىلى مەكسيكادا وتەدى دەپ بولجانىپ وتىر.
گۇلنۇر قۋانىشبەكقىزى,
«ەگەمەن قازاقستان»