ساعىنتاەۆ ەكسپو قالاشىعىنداعى پولشا رەسپۋبليكاسىنىڭ ۇلتتىق كۇنىنە قاتىستى

شارانىڭ رەسمي ءبولىمى پولياك اسكەري وركەسترىنىڭ ورىنداۋىنداعى قازاقستان مەن پولشانىڭ مەملەكەتتىك ءانۇراندارىنىڭ شىرقالۋىنان باستالدى. وسى ۋاقىتتا ەكى رەسپۋبليكانىڭ مەملەكەتتىك تۋلارى كوتەرىلدى.

ودان كەيىن باقىتجان ساعىنتاەۆ ءسوز سويلەدى. پرەمەر-مينيستر پولياك پاۆيلونى ءوزىن جاقسى جاعىنان كورسەتىپ, كورمەدەگى تانىمال پاۆيلونداردىڭ بىرىنە اينالعانىن اتاپ ءوتتى.

«قازاقستان پولشانى ورتالىق جانە شىعىس ەۋروپاداعى نەگىزگى ساۋدا-ەكونوميكالىق سەرىكتەسى رەتىندە قاراستىرادى. ءبىز پولياك ۇكىمەتى مەن ىسكەرلىك ورتا وكىلدەرىن بۇۇ قامقورلىعىنداعى «جاسىل ەكونوميكانىڭ» حالىقارالىق ورتالىعى اياسىندا ىنتىماقتاستىقتى نىعايتۋعا شاقىرامىز. ول ەكسپو-2017 مۇراسى نەگىزىندە جۇمىس ىستەيتىن بولادى. بىزدە جاڭارتىلاتىن ەنەرگەتيكا, عىلىم جانە تەحنولوگيالار, يننوۆاتسيالار مەن كوممۋنيكاتسيالار, ورمان شارۋاشىلىعى, تۋريزم سالالارىندا ىنتىماقتاستىق ورناتۋدىڭ ۇلكەن مۇمكىندىگى بار. ەكونوميكامىزدىڭ تسيفرلىق تۇرلەنۋى مەن يندۋستريالاندىرۋ پروتسەستەرىنە قاتىسۋعا شاقىرامىز», — دەدى قر پرەمەر-ءمينيسترى.

سونداي-اق, پولشا رەسپۋبليكاسىنىڭ پرەزيدەنتى اندجەي دۋدا شارا قاتىسۋشىلارىنا ارناپ ءسوز سويلەدى. 

ء«بىز شامامەن ءبىر جىل بۇرىن, ۆارشاۆادا قر پرەزيدەنتى نۇرسۇلتان نازارباەۆپەن «ەكسپو-2017» كورمەسىنە دايىندىق ماسەلەسىن تالقىلاعان ەدىك, ال بۇگىندە مەن شارانىڭ اۋقىمدىلىعىنا تاڭدانا قارايمىن», — دەدى پولشا پرەزيدەنتى.

ول پولشانىڭ ەۋروپالىق وداقتىڭ اسا بەلسەندى دامىپ جاتقان ەلدەرىنىڭ ءبىرى ەكەنىن اتاپ ءوتتى. مىسالعا, 2016 جىلى مەملەكەتتىڭ ءجىو ءوسىمى 3,1% قۇرادى. پرەزيدەنتتىڭ ايتۋىنشا, 2017 جىلدىڭ بولجامى بۇدان دا جاقسىراق, سونداي-اق, جۇمىسسىزدىق دەڭگەيى ايتارلىقتاي تومەندەپ كەلەدى. پولشا باسشىسى قازاقستاندىقتاردى ءتۇرلى سالالاردا, سونىڭ ىشىندە, الدىمەن ەكونوميكا سالاسىندا ىنتىماقتاستىق ورناتۋعا شاقىردى.

«ەكسپو-2017» كورمەسىنە قاتىسقان پولياك بيلىگىنىڭ وكىلدەرى, عالىمدار مەن ساراپشىلار بولاشاقتا قولدانۋعا بولاتىن ۇلكەن تاجىريبە جيناقتادى دەگەن سەنىمدەمىن», — دەدى ا. دۋدا.