اقتوبەدە قازاقستان رەسپۋبليكاسى مەن قىتاي حالىق رەسپۋبليكاسىنىڭ مۇناي-گاز سالاسىنداعى ىنتىماقتاستىعىنىڭ 20 جىلدىعىنا ارنالعان سالتاناتتى شارا ءوتتى. وعان وبلىس اكىمى بەردىبەك ساپارباەۆ, ەنەرگەتيكا ۆيتسە-ءمينيسترى اسەت ماعاۋوۆ, «KAZENERGY» اسسوتسياتسياسى توراعاسىنىڭ ورىنباسارى ۇزاقباي قارابالين مەن CNPC كورپوراتسياسىنىڭ ۆيتسە-پرەزيدەنتى ۆان دۋن تسزين قاتىستى.
1997 جىلى ەكى ەل اراسىنداعى كەلىسىم اياسىندا قىتاي ۇلتتىق مۇناي-گاز كورپوراتسياسىنىڭ (CNPC) العاشقى ينۆەستيتسيالىق جوباسىنا اينالعان «اقتوبەمۇنايگاز» اق قۇرىلدى. وسىلايشا, قازاقستان مەن قىتايدىڭ مۇناي-گاز سالاسىنداعى ىنتىماقتاستىقتىعىنىڭتاريحى باستالدى.
- تاۋەلسىزدىك العان العاشقى جىلدارى قازاقستان ءۇشىن نەگىزگى مىندەتتەردىڭ ءبىرى - حالىقتىڭ ءال-اۋقاتىن قامتاماسىز ەتۋ بولدى, بۇل ءۇشىن جەر قويناۋىنىڭ بايلىعىن يگەرۋ تالاپ ەتىلدى. پرەزيدەنتىمىز جۇرگىزىپ وتىرعان دانا ساياساتىنىڭ ارقاسىندا سول ءبىر قيىن جىلدارى ءبىز Chevron, Agip, British Petroleum جانە تاعى باسقا ءىرى الەمدىك كومپانيالاردى تارتا الدىق. ولار ەكونوميكاعا, حالىققا كومەكتەستى. اقتوبە جەرىنە العاش بولىپ كەلگەن ينۆەستور كومپانيالاردىڭ قاتارىندا CNPC كورپوراتسياسى بولدى. تاۋەلسىزدىك العان ساتتەن باستاپ قىتاي قازاقستاننىڭ نەگىزگى سەرىكتەستەرىنىڭ ءبىرى بولدى جانە سودان بەرى ءبىزدىڭ ەلدەردىڭ ساياسي, ەكونوميكالىق بايلانىسى نىعايا تۇسۋدە,-دەدى ب.ساپارباەۆ.
وبلىس اكىمى وتكەن 20 جىلدىڭ ىشىندە «سنپس-اقتوبەمۇنايگاز» اق ءوڭىردىڭ ەكونوميكاسىن دامىتىپ, حالىقتىڭ ءال-اۋقاتىن جاقسارتۋ ءۇشىن كوپ نارسە جاساعانىن اتاپ ءوتتى. بۇعان ەلىمىزگە كەلگەن ينۆەستيتسيالار, جاڭا تەحنيكا مەن تەحنولوگيالار, سالىنعان زاۋىتتار دالەل. سونىمەن, ىنتىماقتاستىق ەتكەن جىلداردىڭ ىشىندە كومپانيا 100 ملن توننا مۇناي مەن 51 ملرد تەكشە مەتر گاز ءوندىرىپ, ينۆەستيتسيا 13 ملرد تەڭگەنى قۇرادى.
سونداي-اق, كومپانيا بيزنەستىڭ الەۋمەتتىك جاۋاپكەرشىلىگى اياسىندا اقتوبەدە قۇنى 1,5 ملرد. تەڭگە بولاتىن جاستار سارايىنىڭ قۇرىلىسىن اياقتاماق. وبلىس اۋداندارىندا جۇزەگە اسىرىلعان الەۋمەتتىك نىساندار از ەمەس.
- ءبىز ەكونوميكانى دامىتۋ ءۇشىن ينۆەستيتسيا كولەمىن ارتتىرۋدىڭ ماڭىزدى ەكەنىن تۇسىنەمىز. كومپانيانىڭ بيىلعى ينۆەستيتسيالىق جوسپارى 90 ملرد تەڭگەنى قۇرايدى, بۇل 2016 جىلعى كورسەتكىشتەن ەكى ەسە كوپ. وبلىس باسشىلىعى اتىنان قازاقستان مەن قىتاي حالىق رەسپۋبليكاسى اراسىنداعى مۇناي-گاز ىنتىماقتاستىعىنا 20 جىل تولۋىمەن قۇتتىقتايمىن. باستى تىلەك – ەلدەرىمىزدىڭ بايىرعى تاتۋ كورشىلىك قارىم-قاتىناسى وركەندەپ, نىعايا بەرسىن,-دەپ ءسوزىن تۇيىندەدى وبلىس اكىمى.
جيىن سوڭىندا قازاقستان مەن قحر-نىڭ مۇناي-گاز سالاسىنداعى 20 جىلدىق ىنتىماقتاستىعىنا ارنالعان سيمۆوليكالىق ەسكەرتكىش اشىلدى.