بۇگىن «ەگەمەن قازاقستان» گازەتى ۇجىمى كورنەكتى جازۋشى, مەملەكەتتىك سىيلىقتىڭ لاۋرەاتى تولەن ابدىكتى رەداكتسياعا شاقىرىپ, مەرەيلى 75 جاسقا تولۋىمەن ارنايى قۇتتىقتادى.
قابىرعالى قالامگەردىڭ شىعارماشىلىق ءارى ومىردەگى ۇستانىمدارى مەن ۇلگىلى ىستەرىن كەڭىنەن تىلگە تيەك ەتكەن «ەگەمەن قازاقستان» رگ» اق باسقارما توراعاسى دارحان قىدىرالى: «بىزگە تولەن اعامەن ءبىر كەڭسەدە وتىرىپ جۇمىس ىستەۋ, ءتىپتى شىعارماشىلىق بايلانىس ورناتۋ باقىتى دا بۇيىردى. ءار كىتابىن استىن سىزىپ وقىدىق. شىعارمالارى تۇرىك تىلىنە اۋدارىلعاندا ەرەكشە سۇرانىسقا يە بولعانىن, قازاق قالامگەرىنىڭ الەمدىك دەڭگەيدەگى تۋىندىلارىن وقىعان جۇرتتىڭ تاڭدانىسىن دا كورىپ ەدىك. سول ءۇشىن دە تۇركى الەمى جازۋشىلارى اراسىندا «جىل ادامى» اتاندىڭىز. الدا وقىرمانعا بەرەر دۇنيەلەرىڭىز ارتا بەرسىن» دەگەن تىلەكپەن ابزال اعانىڭ يىعىنا شاپان جاۋىپ, قۇرمەت كورسەتتى.
ادەبي تالقى سيپاتىندا وتكەن اسەرلى كەزدەسۋ جازۋشى, مەملەكەتتىك سىيلىقتىڭ لاۋرەاتى قاجىعالي مۇحانبەتقالي ۇلىنىڭ تولەن ابدىك شىعارماسى توڭىرەگىندەگى تىڭ ويلارىمەن ءورىلدى. «تولەن, شىعا شاپقان جۇيرىك بولعانىمەن, ونىڭ شىعارمالارىنىڭ مويىندالۋى, انىعى قابىلدانۋى كەشتەۋ بولدى. بىرگە وقىپ, بىرگە ءجۇرىپ, ءتىپتى ءبىر بولمەدە تۇرىپ ادەبيەتتىڭ تالاي-تالاي اڭگىمەسىن تاڭعا جالعاعان جاقىن دوس رەتىندە ونىڭ شىعارماشىلىعىن ءبىر كىسىدەي بىلەمىن دەپ ايتا الامىن» دەپ ءسوز باستاعان قاجەكەڭ تولەن شىعارماشىلىعىنىڭ ىشكى قۋاتىنا, ونى قابىلداۋعا ءوز كەزىندە ادەبي ورتانىڭ ءوزى دايىن بولماعانىن ناقتى مىسالدار كەلتىرە وتىرا اڭگىمەلەدى.
وسى ويدىڭ ۇشىعىن ارى قاراي جالعاعان بەلگىلى جۋرناليست جانبولات اۋپباەۆ: «راس, سول جەتپىسىنشى جىلدارى تىڭ تاقىرىپتى وزگەشە بايانداعان تولەن اعانىڭ كەي شىعارمالارىن قابىلداۋ قيىن بولدى. وعان وقىرماندار كىنالى ەمەس, قوعام كىنالى. ول كەزدە سىقيعان سحەماتيزم بولدى. بالالاردىڭ ءبارى شەتىنەن ءتارتىپتى, ۇلگىلى سيپاتتالاتىن ادەبيەتكە ب.سوقپاقباەۆ سومداعان قوجا ناعىز بۇزىق بولىپ كورىندى. سول ءۇشىن دە پوۆەست ءوز ۋاقىتىندا شىقپاي, كەيىن ماسكەۋدىڭ كوزى ءتۇسىپ, ارى قاراي جولى اشىلعانى سونىڭ دالەلى. تولەن اعا دا سونداي سحەماتيزمدى بۇزعان جازۋشى», دەدى.
قالامگەردىڭ «توزاق وتتارى جىمىڭدايدى», «تۇعىر مەن عۇمىر» شىعارمالارىن ارقاۋ ەتە ءسوز سويلەگەن ارىپتەسىمىز سۇلەيمەن مامەت از جازسا دا ساز جازعان جازۋشىنىڭ تالعامپازدىعىن اڭگىمەگە تۇزدىق ەتتى. اقىن ءىنىسى قورعانبەك امانجول جازۋشى اعاسىنا ارناعان جىرىن وقىدى.
كەزدەسۋ سوڭىندا ءسوز العان مەرەيلى كۇن يەسى تولەن ابدىك قازىرگى ادەبيەت جايىندا اڭگىمە ءوربىتتى. جاس اقىن-جازۋشىلاردىڭ قادامىن ۇنەمى قاداعالاپ وتىراتىنىن, جاقىندا ساكەن سىبانبايدىڭ بىرنەشە اڭگىمەسىن وقىعانىن ايتتى. «بۇگىنگى زاماندى ىشتەن كورە بىلەتىنى, وزىق يدەيالاردى كوتەرە الاتىنى ءتانتى ەتتى. ساۋاتتى جازادى ەكەن», دەپ ريزاشىلىعىن ءبىلدىردى.
«جاقسى اقىندار دا از ەمەس, جاقىندا اسكەرحان اقتاي دەگەن جىگىتتىڭ ولەڭىن وقىدىم.
ەسەنسىڭ بە, ەسكى جۇرت؟, ەسەيتكەن ءبىزدى ەستى عىپ. قىلتا قىردى قىمتايدى, قىرعاۋىل قانات كەشكى بۇلت», دەيدى. وقىعان بويدا جاتتالىپ قالدى. مىنە, كەرەمەت سۋرەت ەمەس پە؟. ەندى بۇلار, وسىنداي ءساتتى, دارا جولدارمەن عانا قالىپ قويماي, تۇتاس, ۇلكەن, كونتسەپتۋالدى دۇنيەلەر تۋدىرۋى كەرەك. امان بولسا ول دا بولادى. مەن ادەبيەتكە ارقاشان وتە ۇلكەن سەنىم, جارقىن ۇمىتپەن قارايمىن. ءالى كورەسىڭدەر, ەۋروپانىڭ ۇلكەن ادەبيەتىمەن يىق تىرەسەر كۇن دە كەلەدى. ادەبيەتكە ۇلكەن يدەيالار كەرەك. حالىق امان بولسا, مىقتى ادەبيەت تۋدىرماي وتىرا المايدى», دەپ تۇيىندەدى ءسوزىن.
ۇلاربەك نۇرعالىم ۇلى, «ەگەمەن قازاقستان»