قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اسقار مامين سەربيانىڭ قورعانىس ءمينيسترى الەكساندر ۆۋلينمەن كەزدەستى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەزدەسۋ بارىسىندا قازاقستان مەن سەربيانىڭ قورعانىس-ونەركاسىپ كەشەنى سالاسىنداعى ەكىجاقتى ىنتىماقتاستىعىنىڭ وزەكتى ماسەلەلەرى تالقىلاندى. تاراپتار اسكەري-تەحنيكالىق ىنتىماقتاستىق سالاسىنداعى بىرلەسكەن جوبالاردى دامىتۋعا ءازىر ەكەنىن راستادى.
اسقار مامين ء«سىزدىڭ رەسمي ساپارىڭىز قازاقستان-سەربيا ەكىجاقتى قارىم-قاتىناسىنىڭ دامۋىنا قوسىمشا سەرپىن بەرەدى» دەپ مالىمدەي وتىرىپ, سەرىكتەستىكتى تەرەڭدەتە ءتۇسۋ ءۇشىن بارلىق مۇمكىندىكتەردىڭ بارىن ايتتى.
ءوز كەزەگىندە سەربيانىڭ قورعانىس ءمينيسترى قازاقستانعا كەلگەن ساپارىنىڭ ناتيجەلى ەكەنىن اتاپ ءوتتى. ساپار بارىسىندا اسكەري-تەحنيكالىق سالادا ءوزارا ءتيىمدى ىنتىماقتاستىقتى دامىتۋدىڭ ناقتى كەلىسىمدەرىنە قول جەتكىزىلدى.
الەكساندر ءۆۋليننىڭ باسشىلىعىمەن استاناعا كەلگەن سەربيانىڭ قورعانىس مينيسترلىگىنىڭ دەلەگاتسياسى قورعانىس ونەركاسىبى كەشەنىنىڭ نىساندارىن ارالادى.