استانادا «ايەلدەر بولاشاقتىڭ ەنەرگياسىن قولدايدى» اتتى حالىقارالىق فورۋم ءوز جۇمىسىن باستادى. فورۋمدا تازا ەنەرگەتيكاعا كوشۋدى قامتاماسىز ەتۋ ماسەلەلەرى, سونداي-اق مەملەكەتتىڭ, بيزنەستىڭ جانە ازاماتتىق قوعامنىڭ ءتيىمدى سەرىكتەستىگى نەگىزىندە بالامالى ەنەرگەتيكا مەن جاسىل ەكونوميكا سالاسىنداعى يننوۆاتسيالىق يدەيالاردى ىلگەرىلەتۋ ىسىندە ايەلدەردىڭ اتقاراتىن ءرولى مەن ۇلەسى تالقىلاندى.
شاراعا مەملەكەتتىك حاتشى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گۇلشارا ابدىقالىقوۆا قاتىستى. اشىلۋ سالتاناتىندا مەملەكەتتىك حاتشى ارۋلاردىڭ «جاسىل ەنەرگيا» وندىرۋدەگى رولىنە توقتالدى. «وسى كولەمدى شارانى تالانتتى ونەرتاپقىش يلون ماسكتىڭ ء«بىزدىڭ ماقساتىمىز الەمنىڭ ەنەرگيانى قولدانۋىن تۇبەگەيلى وزگەرتۋىمىز كەرەك» دەگەن سوزىمەن باستاعىم كەلىپ وتىر. بۇگىنگى تاڭدا ادامزات 4.0 يندۋسترياسىنىڭ ترانسفورماتسيالىق كەزەڭىنە اياق باستى. تەحنولوگيالىق يننوۆاتسيا مەن تسيفرلىق ونىمدەردىڭ دامىعاندىعىنان, الەمدە قۇرىلىمدىق وزگەرىستەر بولىپ جاتىر. ولار «جاسىل» ەكونوميكانى جاھاندىق دەڭگەيدە تۇبىرىمەن وزگەرتەدى», دەدى گ.ابدىقالىقوۆا.
مەملەكەتتىك حاتشىنىڭ سوزىنە سۇيەنسەك, «جاسىل» ەنەرگيانىڭ دامۋىنا اسەر ەتىپ وتىرعان الەمدىك بەس ءۇردىس بار. اۋەلى, ەنەرگيانى جيناۋ مەن ونىڭ قۇنىنىڭ ءوسۋى. ەكىنشى, قارجىلاي قولداۋدى اشىق تۇردە جۇرگىزۋ. كەلەسى باعىت اتالعان سالانى دامىتۋعا ارنالعان ساياسي باستامالار. كليمات وزگەرۋىنە قاتىستى تۋىندايتىن اپاتتاردىڭ الدىن الۋ – ءتورتىنشى ماسەلە. سوڭعىسى – دامۋشى ەلدەردەگى ەنەرگياعا دەگەن قاجەتتىلىكتىڭ ارتۋى.
سونىمەن قاتار, مەملەكەتتىك حاتشى كەلەشەكتە ەنەرگەتيكاعا دەگەن سۇرانىستىڭ وزگەرۋىنە توقتالدى. ونىڭ ايتۋىنشا, 2050 جىلعا قاراي الەمدە «جاسىل» ەنەرگيا كوزدەرىنە دەگەن سۇرانىس ۇلعايادى. سوندىقتان, ونى وندىرەتىن قۇرىلعىلاردىڭ باعاسى ارزاندايدى.
«تاياۋدا ەلىمىزدىڭ ەنەرگەتيكا مينيسترلىگى «فورسايت-2050» جاڭا الەم ەنەرگياسى جانە قازاقستاننىڭ سونداعى ورنى» دەپ اتالاتىن زەرتتەۋ جۇرگىزىپ, 139 ەلدەن جينالعان 6 ميلليونعا جۋىق دەرەك تالداندى. وندا 2050 جىلعا قاراي ەنەرگياعا دەگەن سۇرانىس 3 پايىزعا ازاياتىنى ايتىلعان. كومىر تۇتىنۋ كولەمى 2 ەسەگە دەيىن ازايادى. ال مۇنايعا قاجەتتىلىك كۇنىنە 95 ميلليون باررەلگە دەيىن جەتەدى», دەدى گ.ابدىقالىقوۆا.
جيىندا ءسوز العان سىرتقى ىستەر ءمينيسترى قايرات ءابدىراحمانوۆ نازىك جاندىلاردى ەنەرگەتيكا سالاسىندا بەلسەندى بولۋعا شاقىردى. ونىڭ پىكىرىنشە, ارۋلاردىڭ «جاسىل ەنەرگياعا» ارالاسۋى ولاردىڭ ءتيىمدى بيزنەس-مودەل قۇرۋىنا جاعداي جاسايدى. مينيستر كەيبىر دامۋشى ەلدەردىڭ «جاسىل» ەنەرگيا كوزدەرىنە وتۋىنە قارجى تاپشى بولاتىنىنا توقتالدى. ونىڭ ايتۋىنشا, قازىردىڭ وزىندە 3 ميللياردقا جۋىق ادام ەكولوگيالىق تازا تەحنولوگيانى پايدالانبايدى ەكەن. سولاردىڭ كوبى – نازىك جاندى ادامدار.
«اۋىلدىق جەرلەردە ايەلدەردىڭ تۇتىنۋعا قاجەتتى ەنەرگياعا وڭاي قول جەتكىزۋىنە جاعداي جاسالۋى ءتيىس. بۇل سالاعا نازىك جاندىلاردىڭ قاتىسۋى بۇكىل دەڭگەيدە ءجۇرۋى كەرەك. ءبىز ادامزاتتىڭ جارتىسىن قۇرايتىن ايەل زاتى بەلسەندى ارەكەت ەتەتىن ەنەرگەتيكالىق رەۆوليۋتسيا جاساۋىمىز قاجەت. پرەزيدەنت نۇرسۇلتان نازارباەۆ گەندەرلىك تەپە-تەڭدىكتى, ساياساتتا, ەكونوميكادا جانە تەحنولوگيالىق ۇدەرىستە ايەلدەر مەن ەرلەر اراسىنداعى تەڭدىكتى تولىق قولدايدى. بۇگىنگى فورۋم ارۋلاردىڭ بارشا قيىندىقتى جەڭىپ, بالامالى ەنەرگيا كوزىنە قولجەتىمدى بولۋىنا مۇمكىندىك جاساپ وتىر. الەم بويىنشا ايەلدەر وسى قوزعالىستىڭ الدىڭعى قاتارىندا ءجۇر», دەدى ق.ءابدىراحمانوۆ.
سونىمەن قاتار, شارا اياسىندا مەملەكەتتىك حاتشى شەتەلدىك رەسمي دەلەگاتسيالار مەن حالىقارالىق ۇيىمدار باسشىلارىمەن ەكىجاقتى كەزدەسۋلەر وتكىزىپ, «جاسىل» ەكونوميكاداعى جانە بالامالى ەنەرگەتيكاداعى ايەلدەردىڭ مۇمكىندىكتەرىن كەڭەيتۋ سالاسىنداعى قارىم-قاتىناستى دامىتۋ پەرسپەكتيۆالارىن تالقىلادى.
فورۋم جۇمىسىنا الەمنىڭ 25 ەلىنەن 300-دەن استام دەلەگات كەلدى. ولاردىڭ اراسىندا رەسەي فەدەرالدى جينالىسى فەدەراتسيا كەڭەسى ءتورايىمىنىڭ ورىنباسارى گالينا كارەلوۆا, بەلارۋس پرەزيدەنتى اكىمشىلىگىنىڭ باسشىسى ناتاليا كوچانوۆا, جاھاندىق ايەلدەر ءسامميتىنىڭ پرەزيدەنتى يرەن ناتيۆيداد, ونەرتاپقىش جانە كاسىپكەر ايەلدەردىڭ دۇنيەجۇزىلىك قاۋىمداستىعىنىڭ پرەزيدەنتى مي-يونگ-حان سەكىلدى بىرقاتار تانىمال تۇلعالار بار. ءىس-شارا قورىتىندىسى بويىنشا, الەمدىك قوعامداستىقتى قورشاعان ورتاعا قىسىمدى تومەندەتۋگە, كليماتتىق وزگەرىس جانە تابيعات رەسۋرستارىنىڭ ازايۋىن باسەڭدەتۋ جونىندەگى حالىقارالىق قاعيدالاردى ساقتاۋعا شاقىرعان, «جاسىل» ەكونوميكاعا كوشۋ ءىسىن جەدەلدەتىپ, حالىقتىڭ ءال-اۋقاتىن ارتتىرۋعا سەپتىگىن تيگىزەتىن قارار قابىلداندى.
جيىننان كەيىن ارنايى شاقىرىلعان مەيماندار ەكسپو-2017 كورمەسىنىڭ پاۆيلوندارىن, استانا قالاسىنىڭ كورىكتى جەرلەرىن ارالاپ, ۇلتتىق مۋزەيگە, «استانا وپەرا» تەاترىنا بارادى.
اباي اسانكەلدى ۇلى, «ەگەمەن قازاقستان»