جاستار اراسىندا سالاماتتى ءومىر ءسۇرۋ سالتىن ناسيحاتتاۋدى دىتتەگەن «رينگ كورولى-2017» حالىقارالىق جارىسىنا استانا, الماتى, جامبىل, قوستاناي, پەتروپاۆل, قىرعىزستاننىڭ بىشكەك قالالارىنان جاسى 35-تەن اسقان جيىرماعا جۋىق ارداگەر جينالدى.
سپورت جانە دەنە شىنىقتىرۋ باسقارماسىنىڭ باسشىسى رۋسلان ەسەناليننىڭ ايتۋىنشا, شارشى الاڭدا جۇدىرىقتاسۋعا نيەت بىلدىرگەن ۇمىتكەرلەرگە جاس شەكتەۋلىگىمەن, دەنساۋلىعىنىڭ مىقتىلىعىمەن قوسا, سوڭعى ءۇش جىل بويى ۇلتتىق قۇراماعا مۇشە بولماۋ سەكىلدى جەڭىلدەتىلگەن شارت-تالاپتار قويىلعان. سول سياقتى سپورت شەبەرلەرىنە قاتىسۋعا دا تىيىم سالىنعان. دەسەك تە, بۇرىنعى اتاق-ماراپاتتارىنان ات ۇركەتىن گۇرزى جۇدىرىق يەلەرى ارنايى ات ارىتىپ كەلىپ, ىرىكتەۋ كەزەڭدەرى جان الىسىپ, جان بەرىسكەن كەزدەسۋلەرگە تولى بولدى. ماسەلەن, قىزىلجارلىق جاباي احمەتوۆ جەرلەسى رۋسلان كانافيندى بىرىنشى راۋندتا تەحنيكالىق نوكاۋتقا جىبەرسە, 52 جاستاعى اندرەي تسارەۆ تاەكۆوندادان قارا بەلبەۋ يەسى, پانكراتيوننان الەم جۇلدەگەرى, «ارلان گريپ» ءتۋرنيرىنىڭ بىرنەشە مارتە جەڭىمپازى 37 جاستاعى الماتىلىق كارەن پاشەكيانعا اجەپتاۋىر قارسىلىق كورسەتە ءبىلدى.
ال, اقتىق سايىسقا القىنباي جەتكەن كىل مىقتىلار 5 سالماق دارەجەسى بويىنشا كۇش سىناستى. شارشى الاڭعا ءبىرىنشى بولىپ جامبىل اۋدانىنىڭ وكىلى جاباي احمەتوۆ پەن قوستانايلىق راۋف اليەۆ كوتەرىلدى. ەكى مينۋتقا ءسوزىلاتىن ۇش راۋندتىڭ باسىندا راۋف قارسىلاسىن سوققىنىڭ استىنا العانىمەن,ء جاباي ابجىل قيمىل تانىتىپ, جەڭىستى ۋىسىنان شىعارمادى. پەتروپاۆل قالاسى زاۋىتتارىنىڭ بىرىندە تەمىر جونۋشى بولىپ جۇمىس ىستەيتىن سانات ماقانوۆ اتاعى جەر جاراتىن بىشكەكتىك قارسىلاسى تۋردىوگلى ابدىلاحاتتان ەش ىقققان جوق. تاجىريبەلى بوكسشىعا قارسى جاستىق قايراتىن قارسى قويا ءبىلدى. 80 كيلو سالماق دارەجەسىندە ەمىل يمانبەكوۆ ەربول ج ۇلىمبەكوۆتەن ايلاسىن اسىردى.
بوكسسۇيەر قاۋىم سپورتتىڭ بىرنەشە ءتۇرىن كاسىپقويلىقپەن مەڭگەرگەن كارەن پاشەكيانعا ەرەكشە قۇرمەت كورسەتىپ, جەڭەتىنە ەش ءشۇبا كەلتىرمەگەن ەدى. بىراق ول ءبىرىنشى راۋندتا جاراقات الىپ قالىپ, جەڭىس اندرەي ستەپۋراعا بۇيىردى. اسا اۋىر سالماقتا پەتروپاۆلدىق الىپ كۇش يەلەرى ءادىل نۇرجاۋىپوۆ پەن اندرەي بەيسەنباەۆپەن جۇدىرىقتاسىپ, الدىڭعىسى سال-ءپال باسىمدىق تانىتتى. بايگەگە تىگىلگەن 1,2 ميلليون تەڭگە ءار سالماق بويىنشا انىقتالعان رينگ «كورولدەرىنە سالتاناتتى تۇردە تابىس ەتىلدى.
قىزىلجار تورىندە ەلىمىز بويىنشا ءبىرىنشى رەت ۇيىمداستىرىلعان حالىقارالىق «رينگ كورولى» تۋرنيرىن داستۇرگە اينالدىرۋدى سپورت جانە دەنە شىنىقتىرۋ باسقارماسى ءوز موينىنا الدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى