باعاسىنا قاراپ ويلارسىز. «موسكۆيچ» بولعاندا ابدەن ءمىنىلىپ, ەرقاشتى بولعان, سالاباسى شىعىپ كۇرەسىندە قالعان, توت جەگەن ەسكى قاڭقاسى عوي دەپ. ولاي ەمەس. جاپ-جاڭا. قازىر ەمەس, ارينە, بۇرىن. العان كەزىندە.
ول كەزدە كەڭەس وداعىنىڭ دۇرىلدەپ تۇرعان شاعى. باسشى, قوسشىدان قاراپايىم ەڭبەك ادامى جوعارى قۇرمەتتەلەدى. سوزاقتىق ديقان اساۋباي باقيەۆ شارۋاقور, ەگىستىك باسىندا كۇن-ءتۇن جۇرۋگە بار ازامات بولاتىن. جۇگەرىلىگى اتتىلى كىسى كىرسە تاپتىرمايدى. سوتسياليستىك جارىستا جۇگەرىسىنىڭ ءار گەكتارىنان 129 تسەنتنەردەن ءونىم الادى. وداقتان كەلگەن كوميسسيا توبەسىمەن كوك تىرەگەن جۇگەرى القابىن كورىپ تاڭعالعاندارىنان ءبىراز ۋاقىت باستارىن شايقاپ تۇرىپتى.
بۇل – 1980-جىلداردىڭ اياعى. ول كەزدە اساۋباي اعامىزدىڭ جالىنداپ تۇرعان شاعى. وعان كوميسسيانىڭ باعاسى ەمەس, ءوز جۇمىسىنىڭ راحاتى كەرەك. وتباسىن ەشنارسەدەن تارىقتىرماۋى كەرەك. جىلدار وتەدى. ءونىم جوعارى. ءبىر كۇنى حابار كەلەدى. سوتسياليستىك جارىستىڭ جەڭىمپازدارىن قورىتىندىلاعان بايگەدە اساۋباي باقيەۆكە «موسكۆيچ» اۆتوكولىگى سىيعا بەرىلىپتى. تەگىن.
اساۋباي باقيەۆ اقساقال: «پوشتاعا تۇبىرتەك ءۇشىن 1 سوم 50 تيىن تولەدىم. «موسكۆيچتى» بازاردان ايداپ قايتتىم», دەيدى.
سوزاق اۋدانىنداعى قۇمكەنت اۋىلىنىڭ ازاماتى اساۋباي اقساقال بۇگىندە سەكسەننىڭ سەڭگىرىنە شىقسا دا ەڭبەكتەن قالماعان. ءۇي ىرگەلىك باۋ-باقشاسى كوز قىزىقتىرادى.
– بۇگىندە اگروتەحنيكانىڭ دامىعان زامانى. تىڭايتقىشتاردىڭ ءتۇرى دە كوپ. سوندا دا باۋ-باقشاسىنا قاراي الماي, ارامشوپكە باستىرىپ الاتىندار جەتەدى. ال مەن تىڭايتقىشتى ءبىر-اق رەت بەرەتىنمىن. كۇن ىستىقتا سۋارۋعا بولمايدى. جۇگەرى القابىنا كۇزدە دە, قىستا دا سۋ جىبەرىپ, قۇنارلاندىرىپ وتىردىم. وسى داقىلدى باپتاۋدىڭ جاقسى تاجىريبەسىن جيناقتادىم. قازىر كەڭەس سۇراعان ديقاندارعا بىلگەنىمدى ۇيرەتىپ كەلەمىن. «ەڭبەك ەتسەڭ ەرىنبەي, تويادى قارنىڭ تىلەنبەي», دەگەن عوي ۇلى اباي اتامىز. ال ەڭبەك جاساعان ادامنىڭ ۇيىندە بەرەكە بار, نەسىبەسى مول. جۇمىس جوق دەگەن جاستارعا قارنىم اشادى, – دەيدى اساۋباي اقساقال.
باقتيار تايجان, «ەگەمەن قازاقستان» وڭتۇستىك قازاقستان وبلىسى