وڭتۇستىك قازاقستان وبلىسىنىڭ اكىمى جانسەيىت تۇيمەباەۆ اتالعان وبلىستىڭ استانا قالاسىنداعى كۇندەرى اياسىندا وتكەن ايماق اقىن-جازۋشىلارىنىڭ شىعارماشىلىق كەزدەسۋى مەن «تۇلعا. تاۋەلسىزدىك. تاريح», «جاھان تانىعان جەتى تۇلعا» اتتى كىتاپ كورمەسىنىڭ تۇساۋكەسەرىندە وسىلاي دەپ اتاپ كورسەتتى.
ۇلتتىق اكادەميالىق كىتاپحانادا وتكەن كەزدەسۋدىڭ ماقساتى تاۋەلسىز ەلىمىزدىڭ بىرەگەي جەڭىسىنىڭ, حالىقارالىق ارەناداعى جەتىستىگىنىڭ ءبىرى, تورتكۇل دۇنيە كوز تىككەن دۇنيەجۇزىلىك باستى وقيعا – ەكسپو-2017 حالىقارالىق مامانداندىرىلعان كورمەسىنە قولداۋ كورسەتۋ. وسىناۋ ايتۋلى وقيعاعا وراي, وڭتۇستىكقازاقستاندىق قالامگەرلەر استانالىق وقىرمان قاۋىممەن ەلباسىنىڭ «بولاشاققا باعدار: رۋحاني جاڭعىرۋ» ماقالاسىن تالقىلاپ, سىر-سۇحبات قۇرىپ, وي ءبولىستى.
«رۋحاني جاڭعىرۋ – بولاشاقتىڭ كەپىلى» اتتى ءىس-شاراعا باس قالادان مەيمان رەتىندە بەلگىلى تۇلعالار ورازكۇل اسانعازى, عاريفوللا ەسىم, مىرزاگەلدى كەمەل, قالقامان سارين, گۇلعايشا ساعيدوللا قاتىسسا, كۇنگەيلىك رۋحاني توپتىڭ باسى-قاسىندا ەركىنبەك تۇرىسوۆ, مارحابات بايعۇت, ءحانبيبى ەسەنقارا, اسەلحان قالىبەكوۆا, باقىتجان الديار, داۋرەن ايمانبەتوۆ جانە مۇقاعالي كەنجەتاي ۇلى بولدى. كەشتى اقىن قابىلبەك تورەتاي جۇرگىزىپ وتىردى.
جيىندا ءسوز باستاعان وبلىس باسشىسى جانسەيىت تۇيمەباەۆ ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى جايلى ويىن ءبىلدىرىپ, تۇساۋى كەسىلىپ وتىرعان كىتاپتار كورمەسىندەگى ءاربىر شىعارماعا ەرەكشە توقتالىپ ءوتتى.
ء«بىز كەزىندە ەرىكتى, ەرىكسىز الىستاپ كەتكەن ءوز رۋحاني قۇندىلىقتارىمىزعا قايتا ورالىپ جاتقان جۇرتپىز. «رۋحاني جاڭعىرۋ» سونىڭ كورىنىسى. قازىرگى كەزدە رۋحاني جاڭعىرۋ اياسىندا ادەبيەت ماسەلەسىنە قاتىستى ورەلى ويلار ورتاعا سالىنىپ جاتىر. ءاربىر ءوڭىر ءۇشىن ادەبي ورتانىڭ شىعارماشىلىق الەۋەتىن كوتەرۋ ولارعا تىڭ سەرپىن بەرەدى. ايماقتا ءتۇرلى رەسپۋبليكالىق دەڭگەيدەگى مەرەكە, ايتۋلى كۇندەرگە وراي, سونداي-اق, ولكەنى تانىتۋ ماقساتىندا دا ءتۇرلى كىتاپتار شىعارىلىپ تۇرادى. بۇگىن تۇساۋى كەسىلگەلى وتىرعان ەكى كىتاپ سوعان دالەل», دەدى ول.
سونىمەن, «جاھان تانىعان جەتى تۇلعا» كىتابى جايلى تولىعىراق تارقاتساق, ونىڭ ءوزى بولەكشە ءبىتىمدى, مازمۇنى مەن ماڭىزى وزگەشە تۋىندى. وندا جان-جاقتى تانىعان, كۇللى جەر ءجۇزى كەمەڭگەرلەر رەتىندە مويىنداعان, ادامزاتتىڭ, الەمدەگى مەرەيلى مەملەكەتتەردىڭ تاعدىرى مەن تاريحىندا تەڭدەسسىز ءرول اتقارعان جانە اتقارىپ كەلە جاتقان جارقىن دا جاسامپاز تۇلعالار بەينەلەنگەن. جەتى الىپ تا – ايرىقشا الىپتار, قايتالانباس قۇبىلىستار. ولار: نۇرسۇلتان نازارباەۆ, دجوردج ۆاشينگتون, ماحاتما گاندي, ۋينستون چەرچيلل, مۇستافا كەمال اتاتۇرىك, شارل دە گولل جانە لي كۋان يۋ. كىتاپتا «عيبرات عۇمىر ۇزدىكتەرى» دەگەن تاقىرىپپەن تيتان تۇلعالاردىڭ ارقايسىسىنا ءمانىسى تەرەڭ مىنەزدەمەلەر بەرىلگەن. ارينە, ولاردىڭ ورتاسىنان ويىپ تۇرىپ ورىن العان ۇلى دالا پەرزەنتى, ەلباسى نۇرسۇلتان ءابىش ۇلى نازارباەۆتىڭ تاۋەلسىز قازاق ەلىن قالىپتاستىرۋداعى قيىن دا كۇردەلى كەزەڭدەردەن جول تاۋىپ شىققاندىعى ايرىقشا باياندالادى. اۆتورى اباي ەسكەندىروۆ 656 بەتتەن تۇراتىن بۇل كىتاپتى 4 جىلدا جازىپ شىققان.
ال «تۇلعا. تاۋەلسىزدىك. تاريح» – «ليچنوست. نەزاۆيسيموست. يستوريا» كىتابى ءۇش بولىمنەن تۇرادى. اتالعان تۋىندىداعى «ورداباسىعا ورالۋ» دەگەن العاشقى بولىمدە ەلباسىنىڭ قاسيەتتى مەكەنگە تابان تىرەگەنى تۋرالى تولعاناتىن تۇستار جان-جاقتى قامتىلعان. كىتاپتىڭ ەكىنشى بولىمىندە ەلباسىمىزدىڭ شەتەل باسشىلارىمەن وڭتۇستىكتەگى كەزدەسۋلەرى ءساتتى سۋرەتتەرىمەن اڭگىمەگە ارقاۋ بولعان. ال ءۇشىنشى بولىمدە مەملەكەت باسشىسىنىڭ وڭىرگە 1991 جىلدان باستالعان ساپارلارى جان-جاقتى باياندالادى. باسىلىمعا تاياۋداعى وڭتۇستىك وڭىرىنە جاساعان ساۋىردەگى ساپارى دا ەنگىزىلىپ وتىر. كىتاپ ەكى تىلدە شىققان.
ايگۇل سەيىل, «ەگەمەن قازاقستان»