قر كونستيتۋتسيا كۇنىنە وراي «رۋحاني جاڭعىرۋ» مەملەكەتتىك باعدارلاماسىن جۇزەگە اسىرۋ ماقساتىندا اقتاۋدا «مەلوۆوي» سپورتتىق-ەمدەۋ كەشەنى اشىلدى.
سپورت كەشەنىن قايتا جاڭارتۋ مەن جوندەۋگە 224,13 ملن. تەڭگە, ال قۇرال-سايماندارعا, تۇرمىستىق تەحنيكا, جيھاز جانە باسقا دا قاجەتتى جابدىقتارعا 102,948 ملن.تەڭگە قاراجات جۇمسالعان. سپورت كەشەنى بەس فۋنكتسيونالدىق بولىمنەن تۇرادى. اۋدانى 470 شارشى مەتر بولاتىن فۋتبول, ۆولەيبول, باسكەتبول جانە كوركەم گيمناستيكادان جاتتىعۋلارعا ارنالعان زاماناۋي سپورتتىق قۇرالدارمەن جابدىقتالعان امبەباپ سپورت زالى بار. سونداي-اق, الاڭى 216 شارشى مەتر بولاتىن شىعىس جەكپە-جەگى زالى, جابىق ءجۇزۋ باسسەينى, زاماناۋي قۇرالدارمەن, فيتنەسس ترەناجەرلەرمەن جابدىقتالعان, اۋدانى 300 شارشى مەتر بولاتىن ترەناجەر زالى, اۋدانى 648 شارشى مەتر رەزەڭكە جابىنى بار شاعىن فۋتبول اشىق الاڭى جانە جەكە شەشىنۋ بولمەلەرى بار.
ءاربىر زال سانيتارلىق توراپپەن جابدىقتالعان, شەشىنۋ بولمەلەرى, دۋش, باسسەين بار. اكىمشىلىك-تۇرمىستىق عيماراتى, رەسەپشن, گاردەروب, كىر جۋاتىن ورىن, مەدكابينەت, جاتتىقتىرۋشىلار بولمەسى قاراستىرىلعان.
-بۇل اۋقىمدى جانە جارقىن سپورتتىق مەرەكە قازاقستان مەملەكەتى ساياساتىنىڭ ماڭىزدى باسىمدىقتارىن ىسكە اسىرۋعا - سالاۋاتتى ءومىر سالتىن ناسيحاتتاۋعا, دەنى ساۋ ۇرپاقتى تاربيەلەۋ مەن بۇقارالىق سپورتتى دامىتۋعا ءوز ىقپالىن تيگىزەدى. ءبىزدىڭ ايماقتاعى سپورت مادەنيەتىن جانداندىرۋ جولىندا اتقارىپ جاتقان جۇمىستارى ءۇشىن «كاسكور-ترانسسەرۆيس» اق اكتسيونەرلەرى مەن باسقارماسىنا العىسىمدى بىلدىرەمىن. سپورت كەشەنىنىڭ اشىلۋى ءبىزدىڭ مەملەكەتىمىزدىڭ بۇقارالىق سپورت قوزعالىسىن كەڭەيتۋ ساياساتىنا سايكەس كەلەدى. قازاقستان حالقىنا جولداۋىندا ن.ا. نازارباەۆ 2020 جىلعا دەيىن ەل حالقىنىڭ 30 پايىزىن دەنە شىنىقتىرۋ مەن سپورتقا تارتۋعا شاقىردى. تەك سالاۋاتتى ۇلت باسەكەگە قابىلەتتى بولۋى مۇمكىن, دەمەك, مەملەكەتتىك باعدارلامانى جۇزەگە اسىرۋ اياسىندا كەشەندى قايتا قۇرۋ وتە وزەكتى, دەدى ماڭعىستاۋ وبلىسىنىڭ اكىمى ە. توعجانوۆ كەشەننىڭ اشىلۋ سالتاناتىندا.
گۇلايىم شىنتەمىرقىزى, «ەگەمەن قازاقستان»