جامبىل وبلىسىندا بۇگىنگى كۇندە ورىلۋعا ءتيىس 257,8 مىڭ گەكتار ءداندى داقىلداردىڭ بارلىعى ءساتتى ورىلىپ, ءوڭىر ەگىن ورۋ ناۋقانىن العاشقىلاردىڭ ءبىرى بولىپ ءتامامدادى.
ايماق بويىنشا 623,5 مىڭ توننا ءدان باستىرىلىپ, وبلىستىڭ ورتاشا ونىمدىلىگى گەكتارىنا 24,1 تسەنتنەردى قۇرادى. بۇل كورسەتكىش بىلتىرعى جىلدىڭ وسى مەزگىلىمەن سالىستىرعاندا 2,1 پايىزعا ارتىق. وسىلايشا, بيداي, ارپا جانە باسقا دا ءداندى داقىلداردى جيناۋ ناۋقانى بۇگىنگى كۇنگە اياقتالدى.
وبلىس اكىمدىگىنىڭ مالىمەتى بويىنشا, اۋىل شارۋاشىلىعى داقىلدارىنىڭ ەگىستىك القابى 630,2 مىڭ گەكتاردى قۇراعان. بۇل كورسەتكىش وتكەن جىلعىمەن سالىستىرعاندا 42,2 مىڭ گەكتارعا ارتىق بولىپ وتىر. ەسەپتى ارالىقتا ەگىن ورۋ ناۋقانىن ت.رىسقۇلوۆ جانە مەركى اۋداندارى ءساتتى اياقتاپ, ناتيجەسىندە گەكتارىنان 25 تسەنتنەردەن استام استىق ءونىمى الىندى.
ەگىن ورۋ ناۋقانىندا كوشباسشى اۋدانداردىڭ قاتارىن قورداي جانە شۋ اۋداندارى تولىقتىرىپ وتىر. سونداي-اق, ەگىن جيناۋ جۇمىستارىنا وبلىس بويىنشا بارلىعى 911 استىق ورۋ كومبايندارىنىڭ 701-ءى قاتىستى.
ايتا كەتەرلىگى, وبلىس بويىنشا استىق جيناۋ ناۋقانى بۇگىندە 100 پايىزعا ورىندالدى. ال كارتوپ ءونىمىنىڭ 74,8 مىڭ تونناسى جينالىپ, قالعان 5,6 مىڭ گەكتارىن جيناۋ جوسپارلانۋدا. كارتوپتىڭ ورتاشا ونىمدىلىگى گەكتارىنا 223,3 تسەنتنەردى قۇراپ وتىر.
سونىمەن بىرگە, كارتوپ ونىمىمەن قوسا مايلى داقىلداردى جانە كوكونىستەردى جيناۋ جالعاسۋ ۇستىندە. الداعى قىركۇيەك ايىنىڭ سوڭىنا دەيىن جيناۋ جۇمىستارىن اياقتاۋ ماقساتىندا جۇمىس جۇيەلى تۇردە جۇرگىزىلىپ كەلەدى.
حاميت ەسامان, «ەگەمەن قازاقستان»