كەشە, 28 تامىزدا وبلىس اكىمى نۇرلان نوعاەۆتىڭ توراعالىعىمەن «بولاشاققا باعدار: رۋحاني جاڭعىرۋ» مەملەكەتتىك باعدارلاماسىن جۇزەگە اسىرۋ جونىندەگى ساراپتاما كەڭەسىنىڭ ءبىرىنشى وتىرىسى ءوتتى, دەپ حابارلايدى اتىراۋ وبلىسى وڭىرلىك كوممۋنيكاتسيا قىزمەتى.
بۇگىنگى كۇنى بەلگىلەنگەن 86 جوبانىڭ 21-ءى جۇزەگە اسىرىلعان, قالعان 65-ءىن جىل سوڭىنا دەيىن اياقتاۋ جوسپاردا بار. وسى ماقساتقا جەرگىلىكتى بيۋدجەتتەن 155 ميلليون تەڭگە ءبولىندى. 2021 جىلعا دەيىنگى قارجىلاندىرۋدىڭ جالپى سوماسى 1,7 ميللارد تەڭگە.
ساراپتاما كەڭەسىنىڭ باستى مىندەتى – باعدارلاماعا ەنەتىن جوبالاردى قاراۋ, بەكىتۋ. كەڭەس قۇرامىنا ايماقتاعى بەلگىلى عالىمدار, ولكەتانۋشىلار, تاريحشىلار مەن قوعام قايراتكەرلەرى كىرگەن.
86 جوبا العا قاراي جاڭا يدەيالارمەن, قىزىقتى ۇسىنىستارمەن تولىعادى.
بۇگىنگە دەيىن جوبالىق كەڭسەدە ءتۇرلى دەڭگەيدەگى اكىمدىك, باسقارما, مەكەمەلەر ۇسىنعان 162 جوبا قارالدى.
وتكەن ماجىلىستە 43 ماڭىزدى جوبا ورتاعا سالىندى. ولاردىڭ اراسىندا «اقمەشىت» قورىمىن جاڭعىرتۋ, اتىراۋ قالاسىندا «قازاق ەلى» ورتالىعىن سالۋ جوبالارى بار. باستامالاردى جەرگىلىكتى بيۋدجەتپەن قاتار دەمەۋشىلەر دە قارجىلاندىرادى.
- مەملەكەت باسشىسى اتالعان باعدارلاما اياسىندا قازاقستاندىق قوعامدى جاڭعىرتۋعا قاتىستى كەزەڭدىك قادامداردى ۇسىندى, - دەدى ءماجىلىستى قورتىندىلاعان وبلىس اكىمى نۇرلان نوعاەۆ. – ءبىز حالىقتىڭ بارلىق توپتارىن قامتۋعا ءتيىسپىز, جۇمىسقا قوعامدىق ۇيىمدار دا تارتىلادى, وبلىستىڭ ءار تۇرعىنى باعدارلامانىڭ ءبىر مۇشەسى بولا الادى. سول كەزدە عانا وسى باعىتتاعى جۇمىستارىمىزدا جاقسى ناتيجەلەرگە قول جەتكىزەمىز.