كەشە كونستيتۋتسيا كۇنى قارساڭىندا جەرگىلىكتى پوليتسيا قىزمەتى ۋچاسكەلىك ينسپەكتورلارىنا اقتوبە وبلىسىنىڭ اكىمى بەردىبەك ساپارباەۆ 180 قىزمەت اۆتوكولىگىنىڭ كىلتىن تابىس ەتتى.
بۇعان ايماقتىق بيۋدجەتتەن ميلليارد تەنگەگە جۋىق قوماقتى قاراجات جۇمسالعان. ءبىر مەزگىلدە ءتارتىپ ساقشىلارىنا وسىنشاما مول كولەمدە ماتەريالدىق-تەحنيكالىق جاعداي تۋعىزۋ ءىسى ءوڭىردىڭ ارعى-بەرگى تاريحىندا بولىپ كورمەپتى. ءتىپتى مۇنىڭ ءوزى تۇتاستاي ەل وڭىرلەرى بويىنشا العاندا دا سيرەك كەزدەسەتىن جاعداي دەسە دە بولادى.
ەگەر بۇعان دەيىن وڭىردە ۋچاسكەلىك پوليتسيا قىزمەتكەرلەرىنىڭ قىزمەت كولىگىمەن قامتىلۋ دەڭگەيى نەبارى 20 پايىز قۇراپ كەلگەن بولسا, مەرەكە قارساڭىنداعى مول تارتۋدان كەيىن ونىڭ مولشەرى 100 پايىزعا ءبىر-اق كوتەرىلدى.
«وتكەن جىلدىڭ وسى كەزەگىمەن سالىستىرعاندا وڭىردەگى قىلمىستار سانى قازىر 32 پايىزعا ازايدى. سونىمەن بىرگە قوعامدىق قاۋىپسىزدىكتى ساقتاۋ ماسەلەلەرىندە دە كەڭ كولەمدەگى كەشەندى سالالار جۇزەگە استى. بۇگىنگى ماقساتىمىز جەرگىلىكتى اتقارۋشى ورگاندار تۋعىزىپ وتىرعان قامقورلىققا وراي اتا زاڭىمىزدا قاراستىرىلعان تالاپتار دەڭگەيىندە جەرگىلىكتى پوليتسيا مارتەبەسىن ودان ءارى كوتەرە ءتۇسۋ», دەدى قىزمەت كولىگىن تاپسىرۋ راسىمىنەن كەيىن اقتوبە وبلىستىق ىشكى ىستەر دەپارتامەنتىنىڭ باسشىسى, پوليتسيا پولكوۆنيگى ماحامبەت ءابيساتوۆ.
تەمىر قۇسايىن, «ەگەمەن قازاقستان»