قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا قازاقستان رەسپۋبليكاسىنىڭ كونستيتۋتسياسى كۇنىنە ارنالعان «كونستيتۋتسيا جانە قوعام مەن مەملەكەتتىڭ جاڭعىرۋى» اتتى حالىقارالىق عىلىمي-تاجىريبەلىك كونفەرەنتسياعا قاتىستى. بۇل تۋرالى akorda.kz حابارلادى.
ءىس-شاراعا پارلامەنت دەپۋتاتتارى, ورتالىق مەملەكەتتىك ورگاندار جەتەكشىلەرى, حالىقارالىق ۇيىمدار وكىلدەرى, تاياۋ جانە الىس شەت ەلدەردىڭ قۇقىق سالاسىنىڭ ساراپشىلارى, ەلىمىزدىڭ عىلىمي قاۋىم وكىلدەرى قاتىستى.
مەملەكەتتىك حاتشى كونفەرەنتسيادا قازاقستان پرەزيدەنتىنىڭ فورۋمعا قاتىسۋشىلارعا ارنالعان قۇتتىقتاۋىن وقىپ بەردى.
قۇتتىقتاۋدا مەملەكەت باسشىسى كونستيتۋتسيالىق رەفورما ەلىمىز دامۋىنىڭ 25 جىلدىق تاجىريبەسىن جانە جۇرتشىلىق پىكىرىن ەسكەرە وتىرىپ جۇرگىزىلگەنىن اتاپ وتكەن. ونىڭ نەگىزى – بيلىك تارماقتارى اراسىندا بىرقاتار وكىلەتتىكتەردى قايتا ءبولۋ, پارلامەنت پەن ۇكىمەتتىڭ دەربەستىگىن كەڭەيتۋ, كونستيتۋتسيالىق قۇندىلىقتاردى, ادامنىڭ جانە ازاماتتىڭ قۇقىقتارى مەن بوستاندىقتارىن قورعاۋ تەتىكتەرىن نىعايتۋ, سوت جۇيەسى مەن مەملەكەتتىك باسقارۋدى جاڭعىرتۋ.
– كونستيتۋتسيالىق وزگەرىستەر قوعام مەن مەملەكەتتىڭ تىنىس-تىرشىلىگىنىڭ بارلىق سالاسىن ودان ءارى جاڭعىرتۋدىڭ بەرىك نەگىزىن قالايدى. وسى تۇرعىدان قازاقستانداعى كونستيتۋتسيالىق رەفورما جانە ونى ىسكە اسىرۋ قازاقستاندىقتاردىڭ دا, شەتەلدىك قوناقتارىمىزدىڭ دا زور قىزىعۋشىلىعىن تۋدىرادى, – دەلىنگەن نۇرسۇلتان نازارباەۆتىڭ قۇتتىقتاۋىندا.
سونداي-اق, كونفەرەنتسيادا قازاقستان جوعارعى سوتىنىڭ توراعاسى ق.ءمامي, ارمەنيا كونستيتۋتسيالىق سوتىنىڭ توراعاسى, جاڭا دەموكراتيا ەلدەرىنىڭ كونستيتۋتسيالىق باقىلاۋ ورگاندارى كونفەرەنتسياسىنىڭ توراعاسى گ.ارۋتيۋنيان, گرۋزيا جوعارعى سوتىنىڭ توراعاسى ن.گۆەنەتادزە, ۆەنەتسيا كوميسسياسىنىڭ وكىلى س.كۋزنەتسوۆ جانە ت.ب. قۇتتىقتاۋ ءسوز سويلەدى.
كونفەرەنتسياعا قاتىسۋشىلار قازاقستان پرەزيدەنتىنىڭ باستاماسىمەن ەلىمىزدە جۇرگىزىلگەن كونستيتۋتسيالىق رەفورما ناتيجەلەرىن ايرىقشا اتاپ ءوتتى. ولار رەفورمالاردىڭ قازاقستاندى ءۇشىنشى جاڭعىرتۋ ىسىنىڭ تابىستى ىسكە اسىرىلۋىنا سەپتىگىن تيگىزەتىنىنە سەنىم ءبىلدىردى.