Astana Pro Team ءباسپاسوز قىزمەتىنىڭ جەتەكشىسى دينا يبراەۆانىڭ ايتۋىنشا, رەسەيلىك تەلەجۇرگىزۋشى استاناعا كەلمەگەن, ول جاي عانا ۆەلوسپورتپەن شۇعىلداناتىنىن جانە جاتتىعۋ كەزىندە «استانا» كومانداسىنىڭ جەيدەسىن كيەتىنىن كورسەتتى.
«يۆان ۆەلوسيپەدپەن ءجۇرۋدى جاقسى كورەدى. ول الەكساندر ۆينوكۋروۆپەن جاقسى قارىم-قاتىناستا. مەنىڭ ويىمشا, ول جاي عانا قازاقستاندىق كوماندانىڭ جەيدەسىن كيگىسى كەلدى. «استانا» كومانداسىنىڭ, الەكساندر ۆينوكۋروۆتىڭ جانە جالپى ۆەلوسپورتتىڭ جانكۇيەرى بولعاندىقتان, وسى جەيدەنى العان بولۋى كەرەك, – دەيدى Astana Pro Team ءباسپاسوز قىزمەتىنىڭ جەتەكشىسى. – مۇندا تاڭ قالارلىق ەشتەڭە جوق. ول جاي عانا جاتتىعۋلارىنىڭ بىرىندە تۇسكەن سۋرەتىن جەلىگە جاريالاعان. يۆان جاتتىعۋ جاساپ جۇرگەندە وسى جەيدەنى كيىپ, سول ارقىلى ءبىزدىڭ كومانداعا قولداۋ بىلدىرەدى».
ەسكە سالا كەتەيىك, «ۆەچەرني ۋرگانت» باعدارلاماسىنىڭ جۇرگىزۋشىسى يۆان ۋرگانت ءوزىنىڭ ينستاگرامداعى پاراقشاسىنا «استانا» ۆەلوكومانداسىنىڭ جەيدەسىندە تۇسكەن سۋرەتىن جاريالاپ, استىنا «قازاق كۆاتروچەنتوسى #اۆتوبۋس كۇتىپ وتىرمىن» دەپ جازدى. بۇل سۋرەت ەكى ساعاتتىڭ ىشىندە 100 مىڭنان استام لايك جيناپ, ونىڭ استىنا 500-گە جۋىق پىكىر جازىلدى.