ايتالىق, بىلتىر ءبىر گەكتاردان 14 تسەنتنەر استىق جينالعان. ال بيىل استىق ونىمدىلىگى ءار گەكتارىنان 7-8 تسەنتنەردى قۇرايدى. اتالعان كورسەتكىش ورتاشا جىلدىق نورمانىڭ شەگىندە بولىپ وتىر. مول جاڭبىردىڭ بولماۋى استىقتىڭ وسىمىنە كەرى اسەرىن تيگىزگەن.
سونداي-اق, بيىل ايماقتا كارتوپ باعاسى شارىقتاپ كەتكەن بولاتىن. ناننان كەيىنگى ماڭىزدى اس سانالاتىن ول ءونىمنىڭ دە قۇنىن قاداعالاپ وتىرۋ اسا ماڭىزدى. وسى ماقساتتا قاراعاندى وبلىسى بيىلعى جىلى كارتوپ ءوندىرۋشى شارۋاشىلىقتار جيناعان ونىمدەرىنىڭ ءبىر بولىگىن رەزەرۆكە ساقتاماق. سونىمەن قاتار, ايماق باسشىسى ەرلان قوشانوۆتىڭ تاپسىرماسى بويىنشا اۋىل شارۋاشىلىعى باسقارماسى كاسىپورىندارمەن مەموراندۋم قۇرۋدى كوزدەيدى. باستى ماقسات – كوكونىس ونىمدەرىنىڭ باعاسىن تۇراقتى ساقتاپ قالۋ. نۇرا اۋدانىنا جۇمىس ساپارى بارىسىندا وبلىس اكىمى «شاحتەرسكوە» جشس-ءنىڭ كوكونىس قويماسىن قاراپ شىقتى. ەرلان قوشانوۆ مەملەكەت تاراپىنان قولداۋ الىپ وتىرعان اۋىلشارۋاشىلىق ونىمدەرىن وندىرۋشىلەرگە جاۋاپكەرشىلىك تۋرالى ەسكەرتتى. كاسىپورىن جەتەكشىسى گەورگي پروكوپ ولاردىڭ تاراپىنان قاجەتتى مىندەتتەمەلەر ورىندالاتىنىن جەتكىزدى. – كەيبىر كاسىپورىندار جيناعان ونىمدەرىن سىرتقا تولىقتاي ساتىپ جىبەرەدى. ءبىز ءوز ايماعىمىزدىڭ مۇددەسىن, وبلىس تۇرعىندارىنىڭ جاعدايىن ويلاۋىمىز قاجەت, – دەپ اتاپ ءوتتى ەرلان قوشانوۆ.
بيىلعى جىلى وبلىستا 14 مىڭ گا جەرگە كارتوپ ەگىلگەن. ايماقتا بۇل كوكونىس ءتۇرىن اۋىلشارۋاشىلىق ءونىمىن ءوندىرۋشى 38 كاسىپورىن وسىرەدى. – ءبىز اۋىلشارۋاشىلىق ونىمدەرىن وندىرۋشىلەرمەن ونىمدەرىنىڭ 5%-ىن قورعا ساقتاپ قويۋ تۋرالى كەلىسىم جاسادىق. سونان سوڭ دۇكەندەردە ول ءونىم تۇراقتى باعامەن ساتىلاتىن بولادى. ەكى نۇسقا بار – تىكەلەي جانە تۇراقتاندىرۋ قورى ارقىلى. قازىرگى تاڭدا شارۋاشىلىقتاردىڭ 60 پايىزىمەن مەموراندۋم قابىلداندى. جانە ول جۇمىستار جالعاسۋدا, – دەپ حابارلادى وبلىستىق اۋىل شارۋاشىلىعى باسقارماسىنىڭ باسشىسى يۋرجان بەكقوجين.
ميراس اسان,
«ەگەمەن قازاقستان»
قاراعاندى وبلىسى,
نۇرا اۋدانى