ۇيىمداستىرۋشىلاردىڭ ايتۋىنان, فين جيھازى قورشاعان ورتاعا ەشقانداي ەكولوگيالىق ءھام فيزيولوگيالىق زيانىن تيگىزبەيتىن كەرەمەت دۇنيە دەگەندى اڭعاردىق. جيھاز جاساۋشى «ISKU» كونتسەرنىنىڭ ۆيتسە-پرەزيدەنتى تاپيو سيەۆيلياينەن مىرزانىڭ پىكىرىنشە, استانادا ءوتىپ جاتقان ەكسپو-2017 كورمەسىنىڭ تاقىرىبى كەلەشەك ەنەرگياسىنا قاتىستى بولعاندىقتان, قورشاعان ورتاعا زيانسىز ساپالى ءوندىرىس ماتەريالدارى ارقىلى جاسالعان بۇل جيھاز كورمە يدەياسىمەن ۇشتاسىپ تۇر. سول سەبەپتى, تسيفرلى جابدىقتى جانە جاڭا تەحنولوگيالاردى پايدالانۋدى ءومىر سالتىنا اينالدىرعان قازاقستان ءۇشىن كومپانيا ءونىمى تۇتىنۋشىعا شابىت سىيلارى ءسوزسىز.
كۇللى فين مەكتەپتەرى مەن بارلىق دەنساۋلىق ءھام ءبىلىم بەرۋ قۇرىلىمدارى «ISKU» كونتسەرنىنىڭ ءونىمىن تۇتىنادى. كونتسەرن العاش 1928 جىلى لاحتي قالاسىندا وتباسىلىق كاسىپورىن نەگىزىندە قۇرىلعان. ۇزاق جىل جيھاز جوبالاۋ, ءوندىرۋ جانە ساتۋمەن اينالىسىپ كەلەدى. ءوز ونىمدەرىن فينليانديادان تىس سولتۇستىك ەۋروپا, بالتىق جاعالاۋى ەلدەرى, پولشا, رەسەي جانە تاياۋ شىعىس ەلدەرىندە وتكىزەدى. قارجىلىق اينالىمى − 134 ملن ەۋرو.
فينليانديانىڭ ءبىلىم بەرۋ جۇيەسىن زەرتتەۋشى عىلىمي قىزمەتكەر پاسي سيلاندەر مىرزا ءوزىنىڭ كەزەكتى بايانداماسىندا «فين جيھازى باكتەريالارعا قارسى قورعانىس جابىندىسىمەن جاراقتالعان الەمدەگى بىردەن-ءبىر ءونىم. ول قوعامدىق ءۇي-جايلاردا كەز كەلگەن جۇقپالى اۋرۋلاردىڭ جانە ينفەكتسيالاردىڭ پايدا بولۋىنا, تارالۋىنا جول بەرمەيدى. ءتىپتى ينفەكتسيالاردى ەمحاناىشىلىك جاعدايدا جۇقتىرۋ پروتسەسىن 60 پايىزعا, وقۋ مەكەمەلەرى مەن جۇمىس ورىندارىندا سىرقاتتانۋدى بولدىرماۋدى 20 پايىزعا دەيىن ازايتاتىن مۇمكىندىگى بار» ەكەنىن جەتكىزدى.
بەكەن قايرات ۇلى,
«ەگەمەن قازاقستان»
سۋرەتتى تۇسىرگەن
ورىنباي بالمۇرات
«ەگەمەن قازاقستان»