قاراعاندى وبلىسىنىڭ اكىمى ەرلان قوشانوۆ 9 تامىزدا قاراجال قالاسى جانە جايرەم كەنتىنە جۇمىس ساپارىمەن بارىپ قايتقان بولاتىن. بۇل ەلدى مەكەندەردىڭ باستى پروبلەماسى اۋىز سۋدىڭ تاپشىلىعىمەن بايلانىستى. الايدا جيىنعا باس قوسقان اقساقالدار تەك بۇل ماسەلەمەن قوسا باسقا دا قيىندىقتارعا قاتىستى شاعىمدارىن جەتكىزدى. ولار ونسىز دا تاپشى اۋىز سۋمەن باقشاداعى كوكونىس, جەمىستەرىن سۋارۋ تىرشىلىك ءنارىن قورلاۋمەن بىردەي دەدى. قاراجال مەن جايرەم تۇرعىندارى وبلىس باسشىلىعىن شارۋاشىلىق قاجەتتىلىكتەرگە كەرەكتى تەحنيكالىق سۋدى جەتكىزۋ ماسەلەسىن شەشىپ بەرۋدى ءوتىندى.
بۇگىنگى تاڭدا قاراجال قالاسى مەن جايرەم كەنتىندە جالپى ەسەپتەگەندە 18 مىڭعا جۋىق ادام تۇرادى. تۇرعىندارعا اۋىز سۋ اششىلى جانە تۇزكول كەن ورىندارىنىڭ جەر استى سۋىنان تارتىلادى. الايدا سۋ قۇبىرلارى تىم ەسكى, بۇل نەگىزگى پروبلەما. وسىعان دەيىن تۇرعىندارعا اۋىز سۋ كەستە بويىنشا اپتاسىنا ەكى رەت, تاۋلىگىنە 1,5 ساعاتتان كوپ ەمەس ۋاقىت ارالاعىندا جىبەرىلەتىن. سۋ سورعىسىن جوندەۋدەن وتكىزگەن سوڭ سۋ تاراتۋ ۋاقىتى قاراجال قالاسىنىڭ تۇرعىندارى ءۇشىن تاۋلىگىنە 12 ساعاتقا دەيىن, ال جايرەمدىكتەرگە 13 ساعاتقا ۇزارتىلدى.
2007 جىلى قۇرىلىسى باستالعان تۇزكول سۋ بوگەتى وسى كۇنگە دەيىن ىسكە قوسىلماعان. جوندەۋ, ورناتۋ جۇمىستارى 2012-ءشى جىلدىڭ قاراشاسىندا اياقتالعان, الايدا گيدراۆليكالىق زەرتتەمەلەر جۇرگىزىلگەندە سۋ تاراتقىشتا جارىلىستار انىقتالعان. اۋىز سۋ تاپشىلىعىن تولىقتاي شەشۋ ءۇشىن قاراعاندى وبلىستىق اكىمدىگى «كازتسينك» اق-مەن 15 شاقىرىم پلاستيك قۇبىرلار بەرۋ تۋرالى كەلىسىم جاساعان. سونىمەن قاتار بيىلعى جىلى ايماقتاردى دامىتۋ مەملەكەتتىك باعدارلاماسى شەڭبەرىندە جايرەم كەنتىندە جالپى سوماسى 900 ملن تەڭگەنى قۇرايتىن سۋ قۇبىرلارىن جوندەۋ جۇمىستارى باستالعان. ول جۇمىستار 2018-ءشى جىلى اياقتالۋى ءتيىس, دەپ مالىمدەدى قاراعاندى وبلىسى اكىمىنىڭ ورىنباسارى اناتولي شكارۋپا.
سونداي-اق جوسپاردا «قاراجال-جايرەم» سۋ تاراتقىشىن قايتا قالىپقا كەلتىرۋ تۇر. بۇل جوبا رەسپۋبليكالىق بيۋدجەتتەن قارجىلاندىرىلۋى ءۇشىن جاريا ەتىلگەن. الايدا ونى وسى جىلدان باستاپ كەتۋ كوزدەلىپ وتىر. ناتيجەسىندە 2020-شى جىلعا قاراي قاراجال جانە جايرەم ەلدى مەكەندەرىندە سۋمەن قامتۋ ساپالى, ءارى تولىققاندى بولۋى ءتيىس.