توراعا قازاقستان شۆەيتساريانى ەۋروپاداعى ماڭىزدى ارىپتەس رەتىندە قاراستىراتىنىن, ەلدەرىمىز اراسىندا سىندارلى ساياسي ۇنقاتىسۋ قالىپتاسقانىن اتاپ ءوتتى. توراعانىڭ پىكىرىنشە, پرەزيدەنت ن.نازارباەۆتىڭ شۆەيتساريا باسشىسىمەن الداعى كەلىسسوزدەرىنىڭ ەكى ەل اراسىنداعى ىنتىماقتاستىقتى ورىستەتۋدە ماڭىزى زور.
تاراپتار پارلامەنتارالىق ىنتىماقتاستىقتى تەرەڭدەتۋدىڭ كەلەشەگىن تالقىلادى. ق.توقاەۆ ف.ءلومبارديدى سەنات سايلاۋىنىڭ ناتيجەلەرىمەن تانىستىرىپ, ونىڭ بارىسىندا پارلامەنتتىڭ جوعارعى پالاتاسىنا 16 دەپۋتات سايلانعانى ايتىلدى. سايلاۋدى بايقاۋعا حالىقارالىق جانە وتاندىق 518 بايقاۋشى, ەلىمىزدەگى جانە شەتەلدىك بۇقارالىق اقپارات قۇرالدارىنىڭ 244 وكىلى قاتىستى.
كەزدەسۋگە قاتىسۋشىلار حالىقارالىق كۇن ءتارتىبىن, ساۋدا-ەكونوميكالىق جانە گۋمانيتارلىق ىنتىماقتاستىق ماسەلەلەرىن تالقىلادى.
سەنات توراعاسى ورتالىق ازياداعى سۋعا قاتىستى جوبالاردى قولداعانى ءۇشىن شۆەيتسارياعا ريزاشىلىعىن ءبىلدىردى. وسىعان بايلانىستى ق.توقاەۆ ەكسپو حالىقارالىق كورمەسى اياسىندا سۋ رەسۋرستارى جونىندەگى بىرلەسىپ ۇيىمداستىرىلعان ايماقتىق كونفەرەنتسيانىڭ ماڭىزدىلىعىنا توقتالدى. «شارا ورتالىق ازياداعى سۋ رەسۋرستارى جونىندەگى ۇنقاتىسۋلاردى ينستيتۋتتاندىرۋ مۇمكىندىكتەرىن زەردەلەۋ ءۇشىن ەرەكشە الاڭ بولدى», – دەپ اتاپ ءوتتى سەنات باسشىسى.
اڭگىمە بارىسىندا قازاقستان مەن شۆەيتساريا ايماقتارىنىڭ ىنتىماقتاستىعىن دامىتۋدىڭ كەلەشەگى دە تالقىلاندى. الماتى وبلىسى مەن تيچينو كانتونى اراسىندا قول قويىلعان ءوزارا تۇسىنىستىك تۋرالى مەموراندۋم ەكى مەملەكەت اراسىندا دوستىق قاتىناستاردى دامىتۋ ءۇشىن وڭ ىقپال ەتەدى.