ءازىردىڭ وزىندە وبلىستىڭ بارلىق اۋدان, قالالارىندا 1630 وتباسىعا 445,0 ملن. تەڭگەگە شارتتى اقشالاي كومەك بەرىلىپ, ەڭبەككە قابىلەتتى وتباسى مۇشەلەرىنىڭ 95,2 پايىزى جۇمىسپەن قامتىلعان. بۇل تۋرالى وبلىس اكىمى ج: تۇيمەباەۆتىڭ توراعالىعىمەن وتكەن جيىندا وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى مۇحيت وتارشيەۆ ءمالىم ەتتى.
2018 جىلدىڭ 1 قاڭتارىنان باستاپ قازىرگى ءۇش ءتۇرلى الەۋمەتتىك تولەمدەر ورنىنا اتاۋلى الەۋمەتتىك كومەكتىڭ جاڭا فورماتى ەنگىزىلەتىن بولادى. قيىن جاعدايعا تاپ بولعان جانە وبەكتيۆتى سەبەپتەرگە (جاسى, دەنساۋلىق جاعدايى, مۇگەدەكتىك جانە وزگە الەۋمەتتىك وسالدىق) بايلانىستى ازاماتتارعا شارتسىز كومەك ۇسىنىلماق. ءبىر سوزبەن ايتقاندا, كۇنكورىس دەڭگەيىنىڭ 60 پايىزىنان تومەن تۇراتىن از قامتاماسىز ەتىلگەن ازاماتتارعا جۇمىسپەن قامتۋدىڭ بەلسەندى شارالارىنا قاتىسقان جاعدايدا شارتتى اقشالاي كومەك كورسەتىلەتىن بولادى.
«2015 جىلى "ورلەۋ" جوباسى ءبىزدىڭ وبلىستا پيلوتتىق جوبا رەتىندە 4 ايماقتا ياعني ارىس, تۇلكىباس, سارىاعاش, تولەبي اۋداندارىندا ەندىرىلىپ, 139 وتباسىعا 23,0 ملن. تەڭگەگە شارتتى اقشالاي كومەك كورسەتىلدى. وتباسى مۇشەلەرىنىڭ ەڭبەككە جارامدى 167 ادامى جۇمىسپەن قامتىلدى. 2016 جىلى «ورلەۋ» جوباسى وبلىستىڭ بارلىق اۋدان, قالالارىندا ەندىرىلىپ, 1630 وتباسىعا 445,0 ملن. تەڭگەگە شارتتى اقشالاي كومەك تاعايىندالدى», - دەيدى مۇحيت بايمۇحانبەت ۇلى.
وبلىستا شارتتى اقشالاي كومەكتىڭ بىرجولعى تولەمدەرىنە باسىمدىق بەرىلۋدە. شارتتى اقشالاي كومەكتىڭ بىرجولعى سوماسى جەكە قوسالقى شارۋاشىلىقتى دامىتۋ مەن جەكە كاسىپكەرلىك قىزمەتتى ۇيىمداستىرۋعا جۇمسالاتىن بولادى. «ورلەۋ» جوباسىنا قاتىسۋشىلاردىڭ قاتارىندا 454 ادام جەكە كاسىپكەر رەتىندە سالىق ورگاندارىنا تىركەلىپ, ءوز ءىسىن اشقان. اتقارىلعان جۇمىستارعا قانىققان ءوڭىر باسشىسى «ورلەۋ» جوباسىنىڭ حالىق اراسىندا ناسيحاتتالۋىنا كۇش سالىپ, شارتتى اقشالاي كومەكتى ەڭبەك پەن كاسىپكە بەيىمى بار ازاماتتارعا بەرۋدى تاپسىردى.
«تاياۋدا عانا وڭىرىمىزگە ەلىمىزدىڭ ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كەلىپ, «ورلەۋ» جوباسىنىڭ ىسكە اسۋ بارىسىن باعامداپ كەتتى. اتالعان پيلوتتىق جوبانىڭ ىسكە اسۋىنا اۋدان, قالا اكىمدەرى مەن ءتيىستى ءبولىم باسشىلارى جۇمىلا كىرىسۋى ءتيىس. ەڭ باستىسى, شارتى اقشالاي كومەكتەر شىنايى ناعىز كومەككە ءزارۋ ازاماتتارعا بەرىلىپ, جوبانى حالىققا كەڭىنەن ءتۇسىندىرۋ قاجەت», - دەدى ج. تۇيمەباەۆ.
ايتا كەتەيىك, «ورلەۋ» جوباسىن ىسكە اسىرۋ ناتيجەسىندە جىل سايىن ءوسىپ تۇراتىن 18 جاسقا دەيىنگى بالالارعا ارنالعان جاردەماقى الۋشىلاردىڭ سانى 7,8 پايىزعا تومەندەپ, 59 مىڭ وتباسىنى قۇراعان. شارتتى اقشالاي كومەك الۋشىلاردىڭ تابىستارى 3,3 ەسەگە ارتىپ وتىر.