ىرىكتەۋ سىنى ءوتتى, ەندى – فينال
سەنبى كۇنى ىرىكتەۋ سىنى وتكەن. قازاقستان جەڭىل اتلەتيكاسىنىڭ باستى ءۇمىتى ولگا رىپاكوۆا ءبىرىنشى مۇمكىندىگىندە-اق 14,57 مەترگە قارعىپ, بىردەن فينالعا شىقتى. ال باستى باسەكەلەستەرىنەن تەك كولۋمبيا قىزى, ريو وليمپياداسىنىڭ چەمپيونى كاترين يبارگۋەن دە ءبىرىنشى مۇمكىندىگىندە فينالدا باق سىناۋ قۇرمەتىنە يە بولدى. بىراق ونىڭ كورسەتكىشى تومەندەۋ بولىپ شىقتى (14, 21 مەتر عانا). قالعاندارى ەكىنشى, ءتىپتى ءۇشىنشى مۇمكىندىكتەرىندە ىرىكتەۋدەن وتە الدى.
سوڭعى ايدا اسا جوعارى ناتيجە كورسەتە الماي جۇرگەن رىپاكوۆا وسىلاي باسەكەلەستەرىنەن اسىپ ءتۇستى. بۇل وعان پسيحولوگيالىق تۇرعىدا باسىمدىق بەرە مە؟ باسەكەلەستەرى تاڭدانىپ, ۇدىرەيىسىپ قالعان جوق پا؟
– جو-جوق! و, نە دەگەنىڭىز. فينالعا ءبىرىنشى ورىنمەن شىققانى پسيحلوگيالىق تۇرعىدا ەشقانداي دا باسىمدىق بەرمەيدى. بارلىق باسەكە – الدا. ىرىكتەۋ سىننىڭ اتى – ىرىكتەۋ. وندا ءۇش-اق مۇمكىندىك بەرىلەدى. جازا باسىپ, ەكى رەت سەكىرۋ سىزىعىن باسىپ كەتىپ, سودان كەيىن قوبالجىپ-تولقىپ, دۇرىستاپ سەكىرە الماي قالۋلارى مۇمكىن. سوندىقتان تولقۋ باسىم بولادى. جاۋاپكەرشىلىك باسىپ تۇرادى. ال ولگانىڭ ءبىرىنشى مۇمكىندىگى وتە ءساتتى ورىندالدى. ەڭ باستىسى, قارعۋ سىزىعىن باسقان جوق. بيىل جوعارى ناتيجە كورسەتىپ جۇرگەن ۇزدىكتەردىڭ, ىعاي مەن سىعايلاردىڭ ءبارى فينالعا شىقتى. ىرىكتەۋ سىنى ارتتا قالدى. ەندى, فينال, – دەپ جاۋاپ بەردى باپكەر.
چەمپيون بولۋدان ۇمىتتىلەر از ەمەس
ريو وليمپياداسىنىڭ چەمپيونى, جاسى 33-تەن اسقان كاترين يبارگۋەن «مەن ءۇشىنشى رەت الەم چەمپيونى بولۋ ءۇشىن كەلدىم, ريوداعى جەڭىسىم تاماشا, ارينە, بىراق مەن ونىمەن توقتالىپ قالعىم كەلمەيدى» دەپتى, IAAF سايتىنا بەرگەن سۇحباتىندا.
ءيا, ول 2013 جىلى ماسكەۋدە, 2015 جىلى بەيجىڭدە وتكەن الەم چەمپيوناتتارىندا التىنمەن اپتالىپ, جەڭىمپاز اتانعان. 2012 جىلى لوندون وليمپياداسىندا كۇمىس جۇلدەگەر اتاندى. بيىلعى جىلعى ەڭ ۇزدىك كورسەتكىشى – 14,84 مەتر.
ال بيىلعى جىلعى ەڭ ۇزدىك كورسەتكىش ريو وليمپياداسىنىڭ كۇمىس جۇلدەگەرى, ۆەنەسۋەلا ارۋى يۋليمار روحاسقا تيەسىلى – 14,96 مەتر. بىراق ول ءوزىنىڭ تەك ەكىنشى مۇمكىندىگىن دە عانا فينالعا ىرىكتەلىپ شىققانىنا ىرزا ەمەس. پسيحولوگيالىق تۇرعىدا ىسىلا ءتۇسۋى كەرەك ەكەندىگىن بىلەتىنىن, ەرىنبەي تەر توگىپ جۇرگەندىگىن تىلگە تيەك ەتىپتى. الايدا بيىل 21 قازاندا 22-گە تولاتىن قىز ءسوز جوق, وتە تالانتتى.
جالپى, يامايكالىق قىز كيمبەرلي ۋيليامس تە, پورتۋگاليا ءۇمىتى پاستريسيا مامونا دا, فينالعا شىققان باسقالارى دا وسال ەمەس. بىراق ءبىزدىڭ ولگا – تاجىريبەلى, سابىرلى سپورتشى. بيىلعى ەڭ ۇزدىك كورسەتكىشى – 14,64 مەتر.
ايتپاقشى, فينالدا باق سىنايتىن 12 قىزدىڭ ءتىزىمى – تومەندەگىدەي. ءۇشىنشى باعاندا ارقايسىنىڭ 2017 جىلعى ەڭ ۇزدىك كورسەتكىشتەرى, ال سوڭعى باعاندا جەكە رەكوردتارى تۇزىلگەن: