اگەنتتىك توراعاسىنىڭ ورىنباسارى اليك شپەكباەۆ كەڭەستى اشا وتىرىپ, قازاقستان Doing Business-2017 حالىقارالىق رەيتينگتە 35-ورىندى يەلەنىپ, ىسكەرلىك ورتانى جاقسارتۋ بويىنشا كوپتەگەن شارالار قولعا الىنعانىنا توقتالدى. الايدا, ساۋالنامالار ناتيجەلەرى كورسەتكەندەي, كوپتەگەن كومپانيالار ءالى كۇنگە دەيىن اكىمشىلىك كەدەرگىلەر مەن سىبايلاس جەمقورلىق تاۋەكەلدەرى وزدەرىنىڭ جۇمىستارىنا نۇقسان كەلتىرىپ وتىر دەپ ەسەپتەيدى.
.شپەكباەۆتىڭ ايتۋىنشا, بۇل ماسەلە ءبىرىنشى كەزەكتە نۇسقامالاردا كورسەتىلگەن مىندەتتى تالاپتاردىڭ جانە اكىمشىلىك راسىمدەردىڭ كوپ بولۋىمەن بايلانىستى تۋىنداۋدا. ولاردىڭ قاتارىنا ۆەتەرينارلىق جانە سانيتارلىق-ەپيدەميولوگيالىق باقىلاۋ سالالارى جاتادى.
باسقوسۋدا ايتىلعانداي, اتالعان سالادا تىركەلگەن سىبايلاس جەمقورلىق قىلمىستاردىڭ سانى وسۋدە. ماسەلەن, 2016 جىلى مۇنداي ىستەردىڭ جالپى سانى 12 بولسا, ال 2017 جىلدىڭ تەك ءبىرىنشى جارتىجىلدىعىنىڭ قورىتىندىسى بويىنشا 14 فاكتى تىركەلگەن.
سونىمەن قاتار, جيىندا سىبايلاس جەمقورلىق تاۋەكەلدەرىن تۋىنداتاتىن وزگە دە جاعداياتتار ءسوز بولدى. ناقتىلاي ايتقاندا, ۆەتەرينارلىق جانە سانيتارلىق-ەپيدەميولوگيالىق باقىلاۋ سالالارىن رەتتەيتىن نورماتيۆتىك قۇقىقتىق اكتىلەر اراسىندا قاراما-قايشىلىقتار مەن ولقىلىقتار, تەكسەرىس قورىتىندىلارى بويىنشا نۇسقامالاردا كورسەتىلگەن بۇزۋشىلىقتاردى جويۋدىڭ ناقتى مەرزىمدەرىنىڭ بولماۋى سەكىلدى بىرقاتار ماسەلەلەر اتاپ ءوتىلدى.
كەڭەس قورىتىندىسى بويىنشا 49 ۇسىنىم ازىرلەندى, ونىڭ 55 پايىزى نورماتيۆتىك قۇقىقتىق اكتىلەردە سىبايلاس جەمقورلىق تاۋەكەلدەردى جويۋعا باعىتتالعان بولسا, ال 45 پايىزى ۇيىمداستىرۋشىلىق-باسقارۋ قىزمەتتەرىنە قاتىستى. سوڭىندا ا.شپەكباەۆ اتقارىلعان جۇمىستاردى قورىتىندىلاي كەلە, ەنگىزىلگەن ۇسىنىستاردىڭ ورىندالۋ بارىسى باقىلاۋدا بولاتىنىن جەتكىزدى.
«ەگەمەن-اقپارات»