ءوزىنىڭ كىرىسپە سوزىندە «ۋاقىپ» قايىرىمدىلىق قورىنىڭ باعىتتارىن ايتقان ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ ساۋاپتى ءىس جاساۋعا تالپىنعاندار كوبىنە مەشىت سالىپ بەرۋمەن شەكتەلەتىنىن جەتكىزدى. ونىڭ پىكىرىنشە, مەكتەپ, اۋرۋحانا, جول, كوپىر سالۋ سەكىلدى حالىق يگىلىگى ءۇشىن جاسالاتىن جۇمىستاردى ساۋاپتى ىسكە جاتقىزۋعا بولادى.
«ساۋاپ ءۇشىن ادامدار ءوز ەركىمەن اقشالاي نەمەسە م ۇلىكتەي قايىرىمدىلىق جاساي الادى. بىراق مۇنىڭ ءبارى وركەنيەتتى ۇلگىدە جانە قوعامعا ءتيىمدى بولۋى ءتيىس. وسى ورايدا, قولى اشىق, كوكىرەگى وياۋ اتىمتاي جومارتتارعا بۇكىل مۇمكىنشىلىك جاساپ بەرۋ قاجەتتىگى تۋىندايدى. قوردى قۇرۋداعى باستى ماقسات تا وسى», – دەدى نۇرلان ەرمەكباەۆ.
ءمينيستردىڭ ايتۋىنشا, «ۋاقىپ» قايىرىمدىلىق قورى وزدىگىنەن تابىس تابۋمەن دە اينالىسادى. ول ءۇشىن «ۋاقىپ» قارجى اكتيۆتەرىمەن, جىلجيتىن جانە جىلجىمايتىن م ۇلىك ساۋداسىمەن اينالىسادى. قمدب نايب ءمۇفتيى ناۋرىزباي قاجى تاعان ۇلىنىڭ سوزىنە سۇيەنسەك, قور جۇمىسى كەزىندە «پايىز» ماسەلەسىنىڭ ارالاسىپ كەتۋىن باقىلايتىن ارنايى توپ بار. ولار قور تورالقاسىنا كەڭەس بەرىپ, ۇسىنىستارىن ءبىلدىرىپ وتىرادى.
سونىمەن قاتار, «ۋاقىپ» قايىرىمدىلىق قورى ەلدەگى تاتۋلىق پەن تۇراقتىلىقتى قامتاماسىز ەتۋ باعىتىندا دا جۇمىس اتقارىپ, ماڭىزدى الەۋمەتتىك سالالاردى ىسكە اسىرا وتىرىپ, ءدىن سالاسىنداعى وزەكتى پروبلەمالاردى شەشۋگە اتسالىسادى. «قور الەۋمەتتىك جاعىنان از قامتىلعان جانە مۇمكىندىگى شەكتەۋلى ازاماتتارعا كومەك كورسەتەدى. سونداي-اق, ءدىني قىزمەتكەرلەردىڭ جالاقىسى مەملەكەتتەن بولىنبەيتىنى ءمالىم. ولاردىڭ ەڭبەكاقىسى قايىرىمدىلىقتان تۇسەتىن قارجىعا تىكەلەي بايلانىستى», – دەگەن ناۋرىزباي قاجى شالعاي اۋىلدارعا ءبىلىمدى يمام اپارۋدىڭ قيىندىعىن دا تىلگە تيەك ەتتى.
نايب ءمۇفتي قور جۇمىسى اتالعان ولقىلىقتىڭ ورنىن تولتىرىپ, وڭ شەشىم قابىلداۋعا ۇلەس قوساتىنىنا سەنىم ءبىلدىردى. ناۋرىزباي قاجى تاعان ۇلىنىڭ اقپاراتىنا سۇيەنسەك, بۇگىنگى تاڭدا قازاقستانداعى 2500-گە جۋىق مەشىتتىڭ 500-دەيى عانا قمدب تاراپىنان قارجىلاي قولداۋ كورىپ وتىر. قالعان عيبادات ۇيلەرى جەكە كاسىپكەرلەردىڭ دەمەۋشىلىگىنە مۇقتاج.
ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ تا بۇل دەرەكتەردى راستاپ وتىر. ونىڭ مالىمەتىنشە اۋىلدىق جەرلەردە يمامداردىڭ جالاقىسى 20-30 مىڭ تەڭگە ارالىعىندا. ال اۋداندىق جەردە ءدىن جولىندا قىزمەت ەتەتىندەر 40-50 مىڭ تەڭگە ەڭبەكاقى الاتىن كورىنەدى. نۇرلان ەرمەكباەۆ شالعاي جەرلەردە يمامدارعا جالاقى تولەۋ بىرىزدىلىككە تۇسپەگەنىن, جۇيەسىز جۇرگىزىلەتىنىن مالىمدەدى.
بريفينگتە ءدىني راديكاليزم مەن ەكسترەميزمنىڭ الدىن الۋ ماسەلەسى دە ءسوز بولدى. نۇرلان ەرمەكباەۆتىڭ پىكىرىنشە, بۇل ولقىلىقتى جويۋ ءۇشىن يمامداردىڭ بىلىكتىلىگى جوعارى بولۋى ءتيىس. «ۋاقىپ» قورىنىڭ قۇرىلىپ, شالعاي ايماقتاعى ءدىني قىزمەتكەرلەرگە قارجىلاي قولداۋ كورسەتۋى يمامداردىڭ دەڭگەيىن ارتتىرىپ, ەكسترەميزممەن كۇرەسۋگە جاعداي جاسايدى.
سونداي-اق, نايب ءمۇفتي ساداقا جاشىكتەرىنە تۇسەتىن قاراجاتقا دا توقتالدى. ونىڭ ايتۋىنشا, ساداقانى ەسەپتەيتىن 10 ادامنان تۇراتىن ارنايى توپ بار. ولار تۇسكەن قارجىنى ساناپ, ءبىر تيىنىن قالدىرماي ءمۇفتياتتىڭ بانكتەگى شوتىنا اۋدارادى. سودان كەيىن عانا يمامداردىڭ جالاقىسى, مەشىتتەرگە قاجەتتى شىعىندارعا اقشا بولىنەدى. «جىل سايىن ءدىني باسقارما قارجىلىق ەسەپ بەرىپ وتىرادى. بۇكىل جۇمىس اشىق تۇردە جۇرگىزىلەدى. قالاعان ادام ءمۇفتياتتان ساداقاعا قاتىستى مالىمەتتى الۋىنا مۇمكىندىك بار», – دەدى ناۋرىزباي تاعان ۇلى.
«ۋاقىپ» كورپوراتيۆتىك قايىرىمدىلىق قورى 2017 جىلدىڭ مامىرىندا قۇرىلعان بولاتىن. ونىڭ قىزمەتىنە الەۋمەتتىك جوبالاردى قارجىلاندىرۋ, ءبىلىم جانە اعارتۋشىلىق شارالارىن جۇرگىزۋ, ءدىني بىرلەستىك قىزمەتكەرلەرى مەن ءدىني مەكەمەلەر قىزمەتىن قولداۋ كىرەدى. «ۋاقىپتىڭ» پرەزيدەنتى قايرات ايتباي قوردىڭ ءبىر دىنگە باسىمدىق بەرمەيتىنىن, قازاقستاندا رەسمي تىركەۋدەن وتكەن كەز كەلگەن ءدىني بىرلەستىكتىڭ جۇمىسىنا قولداۋ كورسەتۋگە ءازىر ەكەنىن جەتكىزدى.
اباي اسانكەلدى ۇلى, «ەگەمەن قازاقستان»