ەلباسى ن.نازارباەۆتىڭ ەل گازەتى «ەگەمەننىڭ» ءساۋىر ايىنداعى سانىندا جارىق كورگەن «بولاشاققا باعدار: رۋحاني جاڭعىرۋ» اتتى ماقالاسىندا ەرلەردىڭ ەسىمىن ەل جادىندا ساقتاۋعا ىقپالىن تيگىزەتىن ءبىر ماسەلە ايتىلعان-دى. مەملەكەت باسشىسى: «ۇلت ماقتانىشى ءبىزدىڭ بۇرىنعى وتكەن باتىر بابالارىمىز, داناگوي بيلەرىمىز بەن جىراۋلارىمىز عانا بولماۋعا ءتيىس. مەن بۇگىنگى زامانداستارىمىزدىڭ جەتىستىكتەرىنىڭ تاريحىنا دا نازار اۋدارۋدى ۇسىنامىن. بۇل يدەيانى «قازاقستانداعى 100 جاڭا ەسىم» جوباسى ارقىلى ىسكە اسىرعان ءجون. «قازاقستانداعى 100 جاڭا ەسىم» جوباسى – تاۋەلسىزدىك جىلدارىندا تابىسقا جەتكەن, ەلىمىزدىڭ ءار وڭىرىندە تۇراتىن ءتۇرلى جاستاعى, سان الۋان ەتنوس وكىلدەرىنىڭ تاريحى», دەگەن بولاتىن.
پرەزيدەنت پارمەن بەرگەننەن سوڭ كوپ ۇزاماي اقپارات جانە كوممۋنيكاتسيالار مينيسترلىگى قازاقستان حالقى اسسامبلەياسىمەن بىرلەسىپ «قازاقستاننىڭ 100 جاڭا ەسىمى» اتتى جوبانى قولعا الدى. بۇل جوبانى باسقالارىنان ەرەكشەلەيتىن تۇستارى جەتىپ-ارتىلادى. ونى ىرىكتەۋ تالاپتارىنا قاراپ-اق ايقىن اڭعارارىڭىز حاق. ماسەلەن, تۇزىلگەن تىزىمگە ەنەتىندەردىڭ جاس مولشەرىنە, ۇلتىنا, تۋىپ-وسكەن وڭىرىنە, قىزمەت سالاسىنا شەكتەۋ قويىلمايدى. سول سياقتى, سوڭعى شيرەك عاسىر ىشىندە جۇلدىزى جارق ەتىپ جانعان جاندار عانا نازارعا الىنادى. ەر ەسىمىن انىقتاۋعا ەلدىڭ ءوزى تىكەلەي قاتىسادى, ياعني ۇمىتكەر ازاماتتاردى حالىق «El.kz» پورتالىنداعى «100 esim.el.kz» ارنايى جوباسىنا ءوزى ۇسىنادى. ۇسىنىلعان جانداردىڭ اراسىنان «جۇزدەن جۇيرىك, مىڭنان تۇلپار» اتانۋعا لايىقتارىن تاڭداۋعا تانىمال قوعام قايراتكەرلەرىنەن, عالىمدار مەن شىعارماشىلىق وكىلدەرىنەن, مەملەكەتتىك ءھام بيزنەس قۇرىلىمدارداعى بەلگىلى ادامداردان جاساقتالعان جۇمىس توبى دا قاتىسۋدا.
وسى جولداردى جازىپ وتىرىپ, جوبانى جۇزەگە اسىرۋمەن تىكەلەي شۇعىلدانىپ جاتقان «El.kz» پورتالىنداعى ارىپتەستەرىمىزگە حابارلاسقان ەدىك. ولار وسى يگىلىكتى ىسكە جۇمىلعان جۇرتتىڭ قاراسى قالىڭ ەكەنىن ايتتى. قازىردىڭ وزىندە پورتالدا بەس جۇزگە تارتا ءومىربايان جاريالانىپتى. كۇن سايىن جاڭادان جاريالانىپ جاتقاندارىنىڭ ءوزى جۇزدەپ سانالادى ەكەن. ءومىربايانداردىڭ اراسىندا الەۋمەتتىك سالادا ەڭبەگى ەلەنگەن تۇلعالاردىڭ ەسىمى ءجيى كەزدەسەدى. سپورت, مادەنيەت سالاسىندا جۇلدىزى جارقىراي كورىنگەن جاندار دا جەتكىلىكتى. ۇمىتكەرلەردىڭ قاي وڭىردەن, قانداي سالادا نەندەي جەتىستىككە جەتكەنى تۋرالى دەرەكتەر بەرىلگەن. باسقا سايتتاردا جاريالانعان, كەيىپكەرلەردىڭ تابيعاتىن اشىپ, تۇلعاسىن تاني تۇسۋگە كومەكتەسەتىن دۇنيەلەردىڭ سىلتەمەسى دە توپتاستىرىلىپتى.
وسى ورايدا, «قازاقستاننىڭ 100 جاڭا ەسىمى» دەگەن مارتەبەلى اتقا لايىق دەگەن تۇلعالاردىڭ قاتارىنان ورىن الۋعا ابدەن لايىق دەگەن ازاماتتاردىڭ ەسىمىن كوكەيىمىزدە جاڭعىرتىپ كورگەن ەدىك. الدىمەن التى قۇرلىققا ەلدىڭ ابىرويىن شىعارعان ەرماحان ىبىرايىم, سەرىك ساپيەۆ, گەننادي گولوۆكين, ولگا رىپاكوۆا, دەنيس تەن, قانات يسلام سىندى ساڭلاق سپورتشىلار ءتىل ۇشىنا ورالدى. جەتىمدەردىڭ جەبەۋشىسى, ەمىنە شيپا ىزدەپ تالاي ادامنىڭ العىسىن ارقالاعان ارۋجان ساين سىندى ارۋدى دا اينالىپ وتە الماسىمىز انىق. تارازداعى تەررورلىق وقيعا كەزىندە ەرلىكتىڭ ەرەن ۇلگىسىن كورسەتىپ, جانىن قيعان «حالىق قاھارمانى» عازيز بايتاسوۆتىڭ ەسىمى دە «100 ەسىمنىڭ» قاتارىندا قاشالۋعا ابدەن لايىق دەگەن سەنىمدەمىز.
سول سياقتى, بەلگىلى جۋرناليست, تەلەجۇرگىزۋشى, « ۇلى قازاقتاردىڭ تاعدىرى مەن قۇپياسى» تۋرالى دەرەكتى فيلمدەر توپتاماسىنىڭ جۇرگىزۋشىسى مايا بەكباەۆانىڭ ەڭبەگىنە, كاسىبي ءبىلىم-بىلىگىنە ەشكىم داۋ ايتا الماس. بەلگىلى كاسىپكەر, تالاي سپورتشىنىڭ تىنىسىن اشقان مەتسەنات باۋىرجان وسپانوۆ سىندى اتىمتاي جومارتتاردىڭ دا ءجونى بولەك. الەمنىڭ تەاترلارىندا ونەر كورسەتىپ, تالعامپاز تىڭدارماندارىن ءتانتى ەتكەن, ونەرىمەن ۇيىتقان مارات بەيسەنعاليەۆ, الان بورىباەۆ, ماريا مۋدرياك سىندى جۇلدىزدارىمىز جانە بار. جالپاق الەمدى تالانتىمەن جاۋلاعان, ەرەكشە داۋىسىمەن باۋراعان ديماش قۇدايبەرگەنوۆتى بۇل تىزىمگە لايىق ەمەس دەپ كىم ايتا الار؟!
ايتا بەرسەك, «100 جاڭا ەسىمگە» سۇرانىپ, ءا دەگەننەن كوكەيگە تىرەلەتىن جاندار از ەمەس ەكەن. ءتىزىم شەكتەۋلى ەكەنىن تۇسىنەمىز, ارينە. بىزدىكى – حاس تالانتتار تاسادا قالماسا دەگەن تىلەك. جارقىراي كورىنىپ جۇرگەندەر عانا ەمەس, «ەل دەگەندە ەمىنىپ, جۇرت دەگەندە جۇگىنىپ قىزمەت» قىلعان, سول قىزمەتىنىڭ قايتارىمىن كۇتپەيتىن قانشاما قاراپايىم جاندار بار. بۇگىنگىدەي ۋاقىت كوز بەن ويدى ىلەستىرمەس قارقىنمەن زاۋلاعان كەزەڭدە ەلىمىزدىڭ «ەڭ, ەڭ..» دەگەن جاقسى مەن جايساڭى «100 جاڭا ەسىم» جوباسىنىڭ ارقاسىندا جۇرت جادىندا جاتتالىپ قالسا يگى.