«اۆتوۆوكزال» دەپ اتالاتىننان شىعا سالىسىمەن اۆتوبۋستاردىڭ بىرىنە وتىرۋ ءۇشىن ەڭ قوزعالىسى كوپ كوشەلەردىڭ ءبىرى رايىمبەك داڭعىلىنا بەت الامىز. ايالداماعا جاقىنداي بەرە قاي اۆتوبۋستىڭ بولسىن كوندۋكتورلارىنىڭ «پريامو پو تاشكەنتسكوي, التىن-وردا!» «باراحولكا, باراحولكا!» «پو تاشكەنتسكوي! دۋمان!» دەگەن ايقايلارىنا تاپ بولامىز. ارالارىندا توقتايتىن ورىندارعا, جولاۋشىلارعا تالاسىپ, كەرىلدەسىپ جاتقان جۇرگىزۋشىلەر دە بايقالادى.
قاي باعىتتاعى اۆتوبۋستارعا وتىرساڭ دا كوشەلەر اتاۋلارى «كومسومولسكايا, تاشكەنتسكايا, سوۆەتسكايا, لەنينا» دەپ ەسكى اتاۋلارمەن اتالىپ جاتادى. ءوزىڭ قايتا-قايتا سۇراپ تىقاقتاماساڭ ايالداماڭنان ءوتىپ, اداسىپ قالۋىڭ عاجاپ ەمەس. جۇرگىزۋشىلەردىڭ جولاۋشىدا جۇمىستارى جوق. قالتا تەلەفوندارىمان ۇزاق سونار اڭگىمەلەسىپ بارا جاتادى. نەمەسە ءبىر باعىتتاعى اۆتوبۋستار جولاۋشىلاردى تەزىرەك قامتۋ ءۇشىن جارىسىپ بارا جاتادى. ءبىر باعىتپەن ءجۇرىپ وتكەننىڭ وزىندە جۇرگىزۋشى دە, كوندۋكتور دا وزدەرىنە «اقشا جاساپ» بارا جاتقاندارىن انىق بايقاۋعا بولادى.
تەمىر جول ۆوكزالىنا كەلسەڭ دە كاسسالاردا «بيلەت جوق» دەگەن حابارلاندىرۋلار جازۋلى تۇرعانىمەن, پويىز جۇرۋگە جاقىنداعاندا ءار جولسەرىكتىڭ اياق استىنان تابىلعان بيلەتتەرمەن 3-4 ادامنان جەتەكتەپ جۇرگەنىن كورەمىز. جول-جونەكەي بوساعان ورىندارعا دا جولسەرىكتەر ءوز قالتالارىن ويلاپ بيلەتسىز ادامدار الىپ جاتادى.
ۆوكزال قىزمەتكەرلەرى بولسىن, انىقتاما قىزمەتى بولسىن ءجون سۇراعان جولاۋشىلارعا ءجوندى جاۋاپ تا بەرمەيدى. كەۋدەلەرىن كەرە سويلەپ, كەكەسىنمەن دورەكىلىك تانىتۋعا دايىن تۇرادى. پويىزبەن ۇنەمى ساپار شەگىپ جۇرمەگەن ادامداردىڭ اۋرە-سارساڭعا ءتۇسىپ قالارى ابدەن مۇمكىن. پويىز جۇرەتىن كەزدە ۆاگوننان, پلاتفورمادان اداسىپ جۇرگەن ادامداردى بايقاۋعا بولادى.
اتاقتى ەكسپو-2017 كورمەسىن تاماشالاۋ ءۇشىن استانا قالاسىنىڭ تەمىر جول ۆوكزالىنا جەتكەنىمىزدە مادەنيەت دەڭگەيى دە, قىزمەت كورسەتۋ ساپاسى دا الدەقايدا جوعارى وركەنيەتتى ەلدەردىڭ قالاسىنا كەلگەندەي سەزىمدە بولدىق. انىقتاما بيۋروسى دا, ۆوكزال قىزمەتكەرلەرى دە, قىزمەتتە جۇرگەن ساقشىلار دا بارلىق سۇراقتارىمىزعا تازا قازاق تىلىندە قاناعاتتانارلىق جاۋاپ بەردى. ءوزىمىزدى نازار اۋدارۋعا تۇرارالىق تەڭ دارەجەدەگى ادام سەزىندىك. الماتىعا قايتاردا دا جول-جونەكەي پويىزدارعا مىنگەن ادامداردىڭ بيلەتتەرمەن قامتاماسىز ەتىلگەنىن بايقادىق.
استانا ۆوكزالىنان شىعا سالىپ اۆتوبۋستار ايالداماسىنا بەت الدىق. بار سۇراقتارىمىزعا جۇرگىزۋشىلەر دە, كوندۋكتورلار دا تۇشىمدى جاۋاپ بەردى. اسىرەسە اۆتوبۋستارداعى ءتارتىپ ۇنادى. بار ايالدامالار اۆتوبۋس راديوتورابى ارقىلى الدىمەن قازاق تىلىندە, ودان سوڭ ورىس تىلىندە حابارلانىپ وتىرىلدى. راديو تورابى بولماعان جاعدايدا كوندۋكتورلار تازا قازاق تىلىندە حابارلاندىرىپ وتىرادى ەكەن. الماتىداعىداي «پريامو پو تاشكەنسكوي, التىن-وردا!» دەگەن سياقتى كەلەڭسىز ايقايلار بايقالمادى. ءبارى رەتتەلىپ, جولعا قويىلعان.
حالىققا قىزمەت كورسەتۋ ورىندارىندا, كوشەلەردە بارلىعىنىڭ قازاقشا سويلەپ تۇرعانىنا قاراپ, استانا حالقىنىڭ ۇلتتتىق ساناسىنىڭ اناعۇرلىم جوعارى ەكەنىنە كوز جەتكىزگەندەي بولدىق. قالانى ارالاۋ كەزىندە دە مەكتەپ وقۋشىلارىنىڭ, ءتىپتى سلاۆيان ۇلتى وكىلدەرىنىڭ مەملەكەتتىك ءتىلدى مەڭگەرگەنىنە تاڭداي قاقتىق. الماتىداعىداي ءوز بالارىمەن, نەمەرەلەرىمەن ورىسشا شۇلدىرلەسىپ تۇرعانىن كورمەدىك. كوشەدەگى كەزدەيسوق قالا تۇرعىندارىمەن سىر تارتىپ, سويلەسە قالعاندا دا حالىقتىڭ مەملەكەتتىك تىلگە دەگەن قۇرمەتى انىق سەزىلىپ تۇردى. «قازاق ءتىلى تۇرمىستىق اس بولمە ءتىلى» دەپ, نەمەرەلەرىن ءدال ءۇيىنىڭ جانىنداعى قازاق مەكتەبىنە بەرمەي, ونسىز دا ءتىل بىلمەيتىن جاندى الىستاعى ورىس مەكتەبىنە سۇيرەلەپ جۇرگەن بەيشارا اتا-انالاردى كەزدەستىرمەدىك. كەزدەسكەن ستۋدەنت جاستارمەن سۇحباتتاسۋ بارىسىندا استاناداعى جوو-لاردا دا الماتىداعىداي ستۋدەنتتەردىڭ اقشاعا باعالارىن ساتىپ الىپ جۇگەندەرى جوق كورىنەدى.
استانا − قازاق حالقىنىڭ, قازاقستاننىڭ بەت-بەينەسى. بۇرىنعى تسەلينوگراد كەزىندە كورگەنىمىزدەن مۇلدەم بولەك وسى زامانعى مەگاپوليسكە اينالعان. ەكسپو-2017 حالىقارالىق كورمەسىن ارالاۋ كەزىندە دە جەر ءجۇزى حالىقتارىنىڭ قازاق ەلىنە دەگەن قۇرمەتى مەن ءىلتيپاتى بارىنشا سەزىلىپ تۇردى. كورمە وتە كەرەمەت ۇيىمداستىرىلعان ەكەن.
شومىشكە سۋ تولتىرىپ الىپ, قۇلاعىنان قاراۋىل قارايتىن ادەتىمىزبەن بارلىق جەتىستىكتەرىمىزدى وتىرىككە شىعارىپ, قىڭىرلانىپ قىرسىعا سويلەگەندى قويىپ, ەلىمىزدى العا باستىرۋ ءۇشىن وركەنيەتتى ەلدەردەي بارلىعىمىز ءبىر ماقساتقا بىرىگىپ, العا ۇمتىلاتىن كەز كەلدى دەپ ويلايمىز. ارينە, الماتى تۇرعىندارىنىڭ كوپەتنوستىعى, مەنتاليتەتى بولەك شىعار. دەسەك تە استاناداعى ءتارتىپ الماتىعا دا جەتەر دەپ ويلايمىز.
نۇربەرگەن امىرە-شوعان
الماتى وبلىسى, قاپشاعاي قالاسى