ءدۇبىرلى دوداعا ەلىمىزدىڭ تۇپكىر-تۇپكىرىنەن ەسىمدەرى جۇرتقا ەتەنە تانىس مۇحيت تۇرسىنوۆ, رۋسلان ابدىرازاقوۆ, سايات شامشيەۆ, ايبات سەيتەن باستاعان, بەكزات احمەتبەكوۆ, نۇرداۋلەت جارىلعاپوۆ سىندى بالۋاندار قوستاعان 24 كۇرەس شەبەرى قاتىسىپ, جارىستىڭ كورىگىن قىزدىردى.
«تاريحى تەرەڭنەن تامىر تارتقان, قويناۋى قاراعايعا, القابى استىققا تولى كيەلى بەسقاراعاي وڭىرىنە قوش كەلدىڭىزدەر. بۇل ءدۇبىرلى دودانىڭ ايگىلى ايتىسكەر اقىن نۇرلىبەك بايمۇراتوۆ, كورنەكتى سازگەر تولەگەن مۇحامەدجانوۆ, بەلگىلى اكتەر مەڭتاي وتەپبەرگەنوۆتەي تۇلعالى ازاماتتاردى دۇنيەگە اكەلگەن بەسقاراعاي توپىراعىندا وتكىزىلۋى بەكەر ەمەس. ەسەنگەلدى يزاتوۆ, توعايبەك كيريباەۆ, قۇمار مۇقاشەۆ سىندى ەسىمدەرى ەلگە ءمالىم بالۋاندار شىققان وڭىردە مۇنداي بايراقتى باسەكەنىڭ ۇيىمداستىرىلۋى زاڭدى دەپ بىلەمىز. ەلىمىزدىڭ ەڭ بىلەكتى دە جۇرەكتى بالۋاندارىنىڭ باسىن قوسقان سايىستىڭ بەسقاراعاي جەرىندە جالاۋى جەلبىرەۋى – اۋدان ءۇشىن زور ابىروي, بيىك مارتەبە» دەدى چەمپيوناتتىڭ اشىلۋ سالتاناتىندا ءسوز العان بەسقاراعاي اۋدانى اكىمىنىڭ مىندەتىن اتقارۋشى ەربولات راحمەتۋللين.
حالىقارالىق ەكسپو كورمەسى جانە ەلباسىنىڭ «رۋحاني جاڭعىرۋ: بولاشاققا باعدار» ماقالاسىندا كورسەتىلگەن مىندەتتەردى جۇزەگە اسىرۋ اياسىندا,ءبىر جاعى ەل چەمپيوناتى, ەكىنشى جاعىنان حالىقارالىق «الەم بارىسى» تۋرنيرىنە قاتىساتىن بالۋانداردى ىرىكتەۋ ماقساتىندا ۇيىمداستىرىلعان جارىس وتە تارتىستى ءوتتى. بۇل سايىستا شىعىس قازاقستاننان 6 بىردەي بالۋان سىنعا ءتۇسىپ, ءبىر بالۋان عانا اقتىق سىنعا القىنباي جەتتى. مۇحيت تۇرسىنوۆ جارتىلاي فينالدا ەجەلگى قارسىلاسى رۋسلان ابدىرازاقوۆتان ايلاسىن اسىرىپ, فينالدا استانالىق ايبات سەيتەندى الىپ ۇرىپ, تۇيە بالۋاندار اراسىنداعى باسەكەنىڭ ءبىرىنشى ورىن جۇلدەسىن يەلەندى. ەكىنشى ورىن ايبات سەيتەنگە بۇيىرسا, ەكى ءۇشىنشى ورىندى - رۋسلان ابدىرازاقوۆ پەن ماڭعىستاۋلىق نۇرداۋلەت جارىلعاپوۆ ءوزارا ءبولىستى.
ازامات قاسىم,
«ەگەمەن قازاقستان»
شىعىس قازاقستان وبلىسى
سۋرەتتەر اۆتوردىكى