تومومي ينادا وڭتۇستىك سۋدانداعى بىتىمگەرلەردىڭ كۇندەلىك جازبالارىن جۇرتشىلىقتان جاسىرۋ ماسەلەسى بويىنشا مينيسترلىك جۇرگىزگەن تەرگەۋ جۇمىستارىنىڭ ناتيجەلەرىن ءمالىم ەتىپ, قۇجاتتاردى جاريالاۋ جونىندەگى ەرەجەنىڭ بۇزىلعانىن راستادى.
«قورعانىس ءمينيسترى رەتىندە بولعان وقيعاعا جاۋاپكەرشىلىكتى ءوز موينىما الىپ, وتستاۆكاعا كەتۋ تۋرالى شەشىم قابىلدادىم. جاپونيا پرەمەر-ءمينيسترى سيندزو ابە ءوتىنىشىمدى قابىلدادى», – دەدى مينيستر.
سونداي-اق ول بۇدان بۇرىن مالىمدەگەندەي, اتالعان قۇجاتتار جونىندە حابارسىز بولعانىن جانە ولاردى جاسىرۋعا تاپسىرما بەرمەگەنىن اتاپ ءوتتى.
بىلتىرعى كۇزدە وپپوزيتسيا وكىلدەرى قورعانىس مينيسترلىگىنەن وڭتۇستىك سۋدانداعى كەڭ اۋقىمدى قاقتىعىستار كەزىندە جاپون بىتىمگەرلەرىنىڭ كۇندەلىك جازبالارىن كورسەتۋدى سۇراعان بولاتىن. مينيسترلىك ءوزىن-ءوزى قورعاۋ كۇشتەرىنىڭ قۇرلىق اسكەرى ول قۇجاتتاردى جويىپ جىبەرگەنىن ايتقان. كەيىننەن اتالعان قۇجاتتار ءوزىن-ءوزى قورعاۋ كۇشتەرىنىڭ بىرىككەن شتابىنان تابىلدى. كۇندەلىك جازبالاردى جۇرتشىلىققا جاريالاۋعا دايىندىق جۇرگىزىلگەنى دە بەلگىلى بولدى. الايدا, بۇل ارەكەت مينيسترلىكتىڭ ودان بۇرىن بەرگەن مالىمدەمەسىنە قايشى كەلەتىن بولعاندىقتان, قۇجاتتاردى جويۋ جونىندە تاپسىرما بەرىلگەن كورىنەدى. بىراق قورعانىس ءمينيسترى ونداي تاپسىرما بەرمەگەنىن العا تارتادى.
بىتىمگەرلەردىڭ جازبالارى جونىندەگى ماسەلە تومومي ينادا اينالاسىنداعى جالعىز داۋ ەمەس. ناۋرىز ايىندا ول 13 جىل بۇرىن جەكە ءبىلىم بەرۋ ۇيىمىندا قورعاۋشى بولعانى ءۇشىن سىنعا ۇشىراعان بولاتىن. اتالعان ءبىلىم بەرۋ ۇيىمىنىڭ جەر باعاسىنا بايلانىستى ايلا-ارەكەتتەر جۇرگىزۋگە, سونداي-اق مەملەكەتتەن زاڭسىز سۋبسيديا الۋ امالدارىنا قاتىسى بار ەكەنى انىقتالدى.
وپپوزيتسيا وكىلدەرى بىلتىر شىلدە ايىندا وڭتۇستىك سۋدانداعى قاقتىعىستار كەزىندە جاپون اسكەريلەرىنىڭ ومىرىنە تىكەلەي قاۋىپ تونگەن دەپ ەسەپتەيدى. جاپونيانىڭ باسقارۋشى پارتياسى بۇل اقپاردى جوققا شىعارعانىمەن, وڭتۇستىك سۋدانداعى اسكەريلەردىڭ قىزمەتىن توقتاتۋ جونىندە شەشىم قابىلدادى.