ول – بولاتتان جاسالعان قىلىش. سۇيەكتەن جاسالعان تۇتقا-سابىنىڭ تومەنگى بولىكتەرى سىنعان. ەپتەپ توتىققان. قىلىشتىڭ جۇزىندەگى كوپتەگەن كەرتپە ىزدەرى ونىڭ اسكەري قاقتىعىستاردا پايدالانىلعاندىعىن كورسەتسە كەرەك. قايقىلانعان پىشىندەگى قىلىشتاردى «جاتاعان قىلىش» دەپ تە اتايدى. قىلىشتىڭ وتكىرلەنگەن جۇزىنە قارسى بەتىنىڭ جارتى تۇتىك ءپىشىندى بولىپ كەلۋى, قىلىشتىڭ اسكەري ارەكەتتەردە قارسىلاستى تەك شابۋ ءۇشىن عانا ەمەس, تۇيرەۋ ماقساتىنا دا ارنالعاندىعىن اڭعارتىپ تۇر. ءجۇزى مەن سابىنىڭ تۇيىسكەن جەرى جەزبەن كومكەرىلگەن.
بۇل قىلىشتى بىرەگەي جادىگەرلەر قاتارىنا جاتقىزۋعا مۇمكىندىك بەرەتىن وزگەشە بەلگىسى بار. ول – قىلىش سابىنىڭ تومەنگى بولىگىندەگى 1798 جىلدان 1809 جىلعا دەيىن قوقان حانى بولعان اليم حان نەمەسە بۇحارا امىرلىگىنىڭ سوڭعى بيلەۋشىسى سەيد ءمىر مۇحاممەد اليم حاننىڭ اتى جازىلعان جەكە ءمور بەدەرىنىڭ ءتۇسىرىلۋى بولىپ وتىر. بۇعان دەيىن حاندار ۇستاعان, تۇتىنعان زاتتار بۇل قورىق-مۇراجايدا كەزدەسپەگەن.
ءحىح عاسىر مەن حح عاسىردىڭ باسىنداعى قازاق تاريحىنا قاتىستى مالىمەت كوزى سانالاتىن مۇنداي جادىگەرلەر تاريح اقتاڭداقتارىن ايقىنداۋعا سەپ بولار تىڭ جاڭالىقتارعا قول جەتكىزۋگە مۇمكىندىك بەرۋى بەك مۇمكىن. ونىڭ ۇستىنە مۇنداي بەلگىلى ءبىر تاريحي تۇلعا ەسىمىنىڭ جادىگەر بەتىندە كەزدەسۋى ونىڭ ەكسپونات تۇرعىسىنداعى قۇندىلىعىن ارتتىرا تۇسەتىنى بەلگىلى.
«ەگەمەن-اقپارات»