ا.قىدىرباەۆا ءباسپاسوز ءماسليحاتىندا ۇلت جوسپارى شەڭبەرىندە كوزدەلگەن سوت رەفورمالارىنىڭ ءساتتى ىسكە اسىرىلعانىن اتاپ ءوتتى. اتاپ ايتقاندا, ول ۇلت جوسپارى شەڭبەرىندە جۇرگىزىلگەن رەفورمالاردىڭ سوت تورەلىگىن جۇزەگە اسىرۋدىڭ تيىمدىلىگىنە وڭ ىقپال ەتكەنىن جەتكىزدى.
«ايتالىق, ەسەپتى كەزەڭدە سوتتاردا ازاماتتىق ىستەردى قاراۋ مەرزىمى ەكى ەسەگە قىسقاردى. ىستەردىڭ 62,5 پايىزى جەڭىلدەتىلگەن ءىس جۇرگىزۋ تارتىبىندە قارالۋدا. سوت بۇيرىعى, داۋلاردى شەشۋدىڭ بالامالى تاسىلدەرى جانە مەدياتسيا تارتىبىندە قارالعان ىستەر سانى ەداۋىر ارتتى. كەلىسىمدىك تارتىپتەگى قىلمىستىق ىستەر سانى 43 پايىزعا, قىسقارتىلعان نەگىزدەگى ىستەر سانى 3,5 ەسەگە كوبەيدى», دەدى جوعارعى سوتتىڭ مامانداندىرىلعان سوت القاسىنىڭ ءتورايىمى.
سونىمەن قاتار ول سۋديالىققا كانديداتتاردىڭ جاسى 30-عا دەيىن ۇلعايتىلعانىن جەتكىزدى.
ءوز بايانداماسى بارىسىندا سپيكەر جوعارعى سوت جانىنداعى سوت تورەلىگى اكادەمياسىنىڭ العاشقى تۇلەكتەرى قانات قاققانىن دا ءسوز ەتتى.
«جوعارعى سوت جانىنداعى ايرىقشا مارتەبەگە يە سوت تورەلىگى اكادەمياسى 2016 جىلعى 18 اقپاندا پرەزيدەنت جارلىعىنا سايكەس قۇرىلدى. جۇمىس ىستەپ جۇرگەن سۋديالاردىڭ بىلىكتىلىگىن ارتتىرۋ جانە قوعامنىڭ سوت تورەلىگىنە سەنىمىن نىعايتۋعا قابىلەتتى جاڭا فورماتسياداعى سوت كادرلارىن دايارلاۋ جاڭا جوو-نىڭ نەگىزگى مىندەتتەرى بولىپ تابىلادى. بيىل سوت تورەلىگى اكادەمياسىن 51 تۇلەك ءبىتىرىپ شىقتى», دەپ اتاپ ءوتتى ا.قىدىرباەۆا.
سونىمەن قاتار, سپيكەر جاڭا ەرەجە بويىنشا 191 سۋديا ىرىكتەلگەنىن, ونىڭ ىشىندە 140 سۋديانىڭ كاسىبي قىزمەتى باعالانعانىن بايانداپ, جالپى العاندا, سۋديالار كورپۋسى وزدەرىنىڭ كاسىبي بىلىكتىلىكتەرىن راستاپ كەلە جاتقاندىقتارىن جەتكىزدى.
سوڭىندا ايگۇل قىدىرباەۆا ينۆەستيتسيالىق داۋلار بويىنشا سوت ءىسىن جۇرگىزۋدىڭ قورىتىندىلارىنا توقتالىپ, 2017 جىلدىڭ ءبىرىنشى جارتىجىلدىعىندا اتقارىلعان جۇمىستاردىڭ ناتيجەسىنە دە شولۋ جاسادى.
راۋان قايدار, «ەگەمەن قازاقستان»