الماتى قالاسى اكىمدىگى جانە قازاقفيلم اق قولداۋىمەن ىسكە اسىپ كەلە جاتقان يگى ءىس وسىمەن جيىرماسىنشى رەت ۇيىمداستىرىلىپ وتىر. قايىرىمدىلىق كورسەتىلىمدى تاماشالاۋعا كەلگەن ءجۇز قوناقتىڭ ءجۇزى جادىراپ بۇگىنگى شارادان رۋحاني ءنار الىپ قايتتى. ۇلتتىق ونەردى ناسيحاتتاپ, ءداستۇرلى ونەردى دامىتۋ ماقساتىندا اشىلعان تەاتردىڭ كينوزالىندا وتاندىق كينوتۋىندىلارعا ەرەكشە باسىمدىلىق بەرىلگەن. ۇيىمداستىرۋشىلار بۇل كورسەتىلىمنىڭ باستى ماقساتى – قاريالارعا كوتەرىڭكى كوڭىل-كۇي سىيلاۋمەن قاتار, وسكەلەڭ ۇرپاقتى قايىرىمدىلىققا, ۇلكەندى قۇرمەتتەۋگە, جاقسىلىق جاساۋعا شاقىرۋ ەكەنىن ايتادى.
– دانا حالقىمىز «قالتىلدايدى ەكەن دەپ قارتتىقتى سوكپە, ءبارىڭنىڭ بارار جەرىڭ سول» دەپ تەگىن ايتپاسا كەرەك. ۇلكەنگە قۇرمەت كورسەتۋ بابامىزدان جالعاسىپ كەلە جاتقان قانىمىزعا سىڭگەن قاسيەت. ونى جوعالتىپ الماۋ, ۇرپاقتان-ۇرپاققا جەتكىزۋ ءبىزدىڭ بورىشىمىز. بۇگىنگى شارادا باس قوسقان قاريالار ءبىر-بىرىمەن شۇيىركەلەسىپ, ويلارىنداعىسىن ورتاعا سالىپ كوڭىلدەنىپ قايتتى. ولاردىڭ جۇزدەرىنەن جىلىلىق كورگەندە ءبىزدىڭ دە كوڭىلىمىز كوكجيەككە كوتەرىلەدى. سەبەبى قارتتاردا بالا سياقتى. اسىرەسە, كۇن ساناپ سانى ازايىپ ساپتان شىعىپ جاتقان ارداگەر اتالارعا, تىل ارداگەرلەرىنە مورالدىق قولداۋ ءبىلدىرۋ اۋاداي قاجەت. مەملەكەتىمىز ول كىسىلەرگە ۇنەمى قامقورلىق تانىتىپ كەلەدى. سول ءداستۇردى جالعاپ جاستارعا ۇلگى ەتۋىمىز كەرەك, – دەيدى «الاتاۋ» ءداستۇرلى ونەر تەاترى كينوبولىمىنىڭ جەتەكشىسى ريتا حالەلقىزى.
شارا سوڭىندا قاريالار ۇيىمداستىرۋشىلارعا شىنايى ريزاشىلىعىن ءبىلدىرىپ, ەلىمىزدىڭ مارتەبەسى اسقاقتاپ كەلەر ۇرپاقتىڭ بولاشاعى جارقىن بولۋىن تىلەپ تارقاستى. ۇلكەنگە قۇرمەت كورسەتۋ كىشىنىڭ مىندەتى. قازىنالى قارتىن سىيلاعان ەلدىڭ بولاشاعى قاي كەزدە دە داڭعىل بولماق. قارتتارعا دەمەۋ, ۇرپاققا ۇلگى بولارلىق وسىنداي يگى ىستەردىڭ كوپتەپ ءوتۋى كوڭىل قۋانتادى.
ارمان وكتيابر,
«ەگەمەن قازاقستان»
الماتى