شاراعا بەلگىلى ديريجەر الان بورىباەۆ, مادەنيەت جانە سپورت ۆيتسە-ءمينيسترى اقتوتى رايىمقۇلوۆا, يتاليانىڭ گەنۋيا قالاسىنداعى «كارلو فەليچە» تەاترىنىڭ كوركەمدىك جەتەكشىسى دجۋزەپپە اكۋاۆيۆا, «استانا وپەرا» موبت ديرەكتورى عالىم احمەدياروۆ جانە «استانا وپەرا» ديرەكتورىنىڭ ءبىرىنشى ورىنباسارى تولەۋبەك الپيەۆ قاتىستى.
القالى جيىندا العىسوزدى العان اقتوتى رايىمقۇلوۆا جاھاندىق كورمەنىڭ ماڭىزدىلىعى مەن مينيسترلىك تاراپىنان جۇزەگە اسىرىلىپ جاتقان بىرقاتار مادەني شارالار تۋرالى ايتىپ ءوتتى.
– جاھاندىق كورمە كەزىندە مادەنيەت جانە سپورت مينيسترلىگى قازاقستاننىڭ ورىنداۋشىلىق ونەرىن الەمگە تانىتاتىن تىڭ جوبالار ازىرلەۋدى ماقسات ەتتى. مىنە, وسى جوسپار اياسىندا الان بورىباەۆپەن اقىلداسا كەلە گۋستاۆ مالەردىڭ «№8 سيمفونياسىن» ورىنداۋدى ءجون كوردىك, – دەدى اقتوتى رايىمقۇلوۆا.
الەمدىك مۋزىكادا گۋستاۆ مالەردىڭ «№8 سيمفونياسى» ەڭ بەلگىلى شىعارمالاردىڭ ءبىرى رەتىندە مويىندالعان. ال ونى ءوز دارەجەسىندە ورىنداۋ ءۇشىن مۋزىكانتتار سانى دا ايتارلىقتاي كوپ بولۋى قاجەت. ۇيىمداستىرۋشىلاردىڭ ايتۋىنشا بۇل جوباعا بارلىعى 1200 مۋزىكانت اتسالىسقان. ونىڭ 99%-ى – قازاقستاندىقتار. مۇنداي عالامات تۋىندىنى «استانا وپەرانىڭ» سيمفونيالىق وركەسترى, حورى جانە بالالار حورى, يتاليانىڭ ەڭ اتاقتى «كارلو فەليچە» تەاترىنىڭ, اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ وركەسترى مەن حورى, قازاقستان رەسپۋبليكاسى مەملەكەتىك اكادەميالىق سيمفونيالىق وركەسترى مەن «سوليستەر اكادەمياسى» مەملەكەتتىك كامەرالىق وركەسترى, سونداي-اق, ەلىمىزدەگى وزگە دە جەتەكشى حور ۇجىمدارى قاتىستى.
مۇنداي كولەمدى كونتسەرت وسىعان دەيىن ەشبىر جەردە بولماعانىن دا ەرەكشە اتاپ وتكەن ءجون. ياعني, اۋقىمدىلىعى جاعىنان الەمدىك رەكورد ورناتىلدى دەپ تە ايتۋعا بولادى. سونىمەن قاتار, بۇل كەشكە گولليۆۋدتىڭ اتاقتى اكتەرى, «وسكار» سىيلىعىنىڭ لاۋرەاتى ەدريەن بروۋدي ارنايى قاتىستى.
– بۇل جوبانىڭ جۇزەگە اسۋىنا مادەنيەت جانە سپورت ءمينيسترى ارىستانبەك مۇحامەدي ۇلى سەبەپشى بولدى. ول ءوزى دە كاسىبي مۋزىكانت, بىرنەشە رەت سيمفونيالىق شىعارمالاردى ورىنداعان. ال ەندى مالەردىڭ سيمفونياسىنا توقتالار بولسام, ونى تىڭداۋ سونداي جەڭىل بولعانمەن, ورىنداۋ وتە اۋىر. قىزىقتى ءبىر مالىمەت كەلتىرە كەتەيىن, بۇل شىعارما العاش رەت ورىندالعان كەزدە 1910 جىلدىڭ قىركۇيەگى, ياعني ەۋروپادا ەكسپو كورمەسى ءوتىپ جاتقان كەز بولىپتى. ال ەندى مۇنداي اسا ءىرى جوبانى جۇزەگە اسىرۋ – كەز كەلگەن ۇجىم ءۇشىن ۇلكەن سىن. دايىندىق كەزىندە ءوزىمنىڭ ءتىپتى, پەداگوگيكالىق قابىلەتىمدى دە وياتقان سەكىلدىمىن. سەبەبى, 1200 مۋزىكانتتىڭ ىشىندە جەتى جاسار بالادان ورتا جاستاعى ونەر يەلەرى دە بار, – دەدى الان بورىباەۆ.
ال ءوز كەزەگىندە يتاليالىق مامان دجۋزەپپە اكۋاۆيۆا قازاق تىلىندە امانداسىپ, وسىنداي اۋقىمدى شاراعا شاقىرىلعانى ءۇشىن مادەنيەت جانە سپورت مينيسترلىگىنە العىسىن ءبىلدىرىپ, كونتسەرتتىڭ ماڭىزدىلىعىن ايتا ءوتتى.
ءباسپاسوز كونفەرەنتسياسىنان كەيىن اراعا ءبىر ساعات ۋاقىت سالىپ ايگىلى كومپوزيتوردىڭ تۋىندىسى قويىلدى. زالعا جينالعان تۇرعىندار ساحنا تولىعىمەن اشىلىپ, 1200 مۋزىكانت تولىعىمەن كورىنگەن ساتتە ەرىكسىز تاڭ قالىپ, قوشەمەت ءبىلدىرىپ جاتتى. ال ءبىر جارىم ساعاتقا سوزىلعان كونتسەرت اياقتالعاننان كەيىن كورەرمەندەر كەش تاعى دا ۇزارا تۇسسە ەكەن دەگەن كۇيدە قالدى. شارانىڭ وتە جوعارى دەڭگەيدە وتكەنى تۋرالى سەنىممەن ايتۋعا بولادى. سەبەبى, كورەرمەننىڭ جانارىنداعى العىسىن ىستىق ىقىلاسىن بىردەن بايقاۋعا بولادى.
ال اكتەر ەدريەن بروۋدي بۇل كەشتەن العان اسەرىن بىلايشا بولىسكەن ەكەن.
– الان بورىباەۆتىڭ ديريجەرلىگىمەن 1200 مۋزىكانت ورىنداعان بۇل شىعارمانىڭ كەرەمەتىن سوزبەن ايتىپ جەتكىزە المايمىن. بۇرىن-سوڭدى مۇنداي اسەرگە بولەنبەگەن ەدىم. مۇنداي عاجايىپتى ەش جەردەن كورگەن ەمەسپىن. الان بورىباەۆتىڭ شابىت سىيلاعانى سونشالىق, الداعى ۋاقىتتا ديريجەردىڭ ءرولىن سومدايمىن دەپ ىشتەي بەكىندىم, – دەيدى اكتەر.
ونەر يەسى ءۇشىن حالىقتىڭ سۇيىسپەنشىلىگىنەن اسقان قانداي باقىت بار؟! تىڭدارماننىڭ العىسىن السا, شىن باعاسى سول ەمەس پە؟!
ايان ءابدۋالي, «ەگەمەن قازاقستان»