پولشانىڭ ەكونوميكالىق دامۋ ۆيتسە-ءمينيسترى يادەۆيكا ەميلوۆيچ قازاقستاننىڭ دامۋ قارقىنىن جوعارى باعالاپ, ارىپتەستىكتىڭ ەكى ەلگە دە ءتيىمدى ەكەنىنە توقتالدى.
«قازاقستان نارىعى ‒ ءبىز ءۇشىن وتە ۇلكەن ءارى قىزىقتى. پولياكتاردىڭ قازاق جەرىنە بۇرىننان كەلگەنىن تاريحتان بىلەمىز. الايدا, قازىرگى تاڭدا قازاقستان ‒ تاريحي عانا ەمەس, بولاشاقتىڭ مەكەنى. سوندىقتان, ءبىز ءوزىمىزدىڭ كاسىپكەرلەردى قازاقستانعا ينۆەستيتسيا قۇيۋعا شاقىرامىز», دەدى يادەۆيكا ەميلوۆيچ.
پولشادان كەلگەن دەلەگاتسياعا ينۆەستورلارعا جاسالعان جەڭىلدىكتەر تۋرالى تانىستىرىلدى.
«Astana Invest» ۇلتتىق كومپانياسىنىڭ ينۆەستورلارعا قىزمەت كورسەتۋ ورتالىعىنىڭ ديرەكتورى اباي قوجامجاروۆتىڭ ايتۋىنشا, جەڭىلدىك الۋعا مۇددەلى ينۆەستوردىڭ ۇسىنىسى قاناعاتتاندىرىلسا, ول استاناداعى ارنايى ەكونوميكالىق ايماققا مۇشەلىككە قابىلدانادى. سونداي-اق, ينۆەستورلاردىڭ ءونىمىن سىرتقا ەكسپورتتاۋ ماسەلەسى دە قارالعان.
دەلەگاتسيانىڭ مالىمەتىنە سۇيەنسەك, پولشا تاراپى حيميالىق ءونىم شىعارۋ, جيھاز جاساۋ سەكىلدى وزدەرىنىڭ وڭ جامباسىنا كەلەتىن سالالارعا دەن قويۋدى جوسپارلاپ وتىر. يادەۆيكا ەميلوۆيچتىڭ ايتۋىنشا, پولشالىق ونىمدەردىڭ ساپاسى جوعارى, باعاسى دا ەكى تاراپقا قولايلى ەكەن.
«Selena Group» وندىرىسىمەن تانىسقاندار ينۆەستورعا جاسالعان جاعدايدى جوعارى باعالادى. جالپى, بۇل كومپانياعا ينۆەستيتسيا قۇيۋ جۇمىسى 2013 جىلى باستالعان-دى. جوبا قۇرىلىسى 2014 جىلى قولعا الىنىپ, وعان 6 ميلليون اقش دوللارى سالىنعان ەدى. بىلتىردان بەرى زاۋىت حيميالىق قۇرىلىس قوسپالارىن شىعارىپ كەلەدى. جوبانىڭ ءوندىرىس قۋاتى وراسان. ماسەلەن, زاۋىت جىلىنا 120 مىڭ توننا قۇرعاق قۇرىلىس قوسپاسىن جانە 10 مىڭ توننا ديسپەرسيالىق قوسىندى وندىرۋگە قابىلەتتى. جوبا ىسكە قوسىلعالى بەرى جاڭا 70 جۇمىس ورنى اشىلدى. «Selena Group»-تىڭ قۋاتى قازاقستانداعى قۇرىلىس نارىعىنىڭ 20 پايىزىن قوسپامەن قامتاماسىز ەتۋگە جەتكىلىكتى. سونىمەن قاتار, ەلىمىزدىڭ 8 قالاسىنا جەتكىزۋ جۇيەسى اشىلعان.
اباي اسانكەلدى ۇلى, «ەگەمەن قازاقستان»