ءدىن ماسەلەلەرى بويىنشا وتكەن سەمينار بارىسىندا ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ پرەزيدەنت ن.نازارباەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ولاردى قازاقستان رەسپۋبليكاسى كونستيتۋتسياسىنىڭ نورمالارىنا سايكەس كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا ۋاقتىلى قول قويعانىن حابارلادى. وعان سايكەس, تەررورلىق جانە باسقا دا اسا اۋىر قىلمىس جاساعان قازاقستاندىقتار ازاماتتىعىنان ايىرىلادى.
بۇگىنگى تاڭدا شەتەلدە لاڭكەستەر لاگەرىندە قازاقستاننىڭ 500 ازاماتى بار.
قازىرگى تاڭدا سيريا-يراك ايماعىندا تەرروريستىك توپتار ءۇشىن جاعدايدىڭ قيىنداپ جاتقانىن بىلەمىز. قىلمىسكەرلەر شەگىنۋ جولدارىن, سونىڭ ىشىندە وزدەرىنىڭ بۇرىنعى تۇرعان جەرلەرىنە قايتۋ مۇكىندىكتەرىن ىزدەستىرۋدە. الايدا, بۇل ولاردىڭ قىلمىستىق پيعىلدارىنان باس تارتقانىن بىلدىرمەيدى. سوندىقتان, قازاقستاندىقتاردىڭ ىشىنەن شىققان وسىنداي ادامدار قىلمىستىق تاجىريبە جيناقتاپ, ەلىمىزگە ارام نيەت-ويمەن ورالۋى مۇمكىن. وسىعان وراي, جاڭا تولىقتىرۋلاردا ازاماتتىقتان ايىرۋ مۇمكىندىگى قاراستىرىلۋدا.
«ماسەلە تەرروريزم اكتىلەرىن, تەرروريستىك توپتاردى قۇرۋ جانە باسقارۋ مەن ونىڭ قىزمەتىنە قاتىسۋ, سونداي-اق رەسپۋبليكامىزدىڭ ۇلتتىق جانە ومىرلىك ماڭىزى بار مۇددەلەرىنە اسا اۋىر زيان كەلتىرۋ تۋرالى بولىپ وتىر. سوت ءىستىڭ ءمان-جايىن, جاساعان ارەكەتىنىڭ اۋىرلىعىن, كەلتىرگەن زارداپتارىن تولىق زەردەلەۋ نەگىزىندە ەرەكشە جاعدايلاردا عانا ازاماتتىعىنان ايىرادى», – دەپ ناقتىلادى مينيستر.
تۋعان جەرىن تاستاپ, شەتەلگە تەررورلىق قۇرىلىمدارعا قاتىسۋعا كەتكەن ادامدار وتانىنا وپاسىزدىق جاساعاندارعا تەڭەلەدى.