قاۋىمداستىق قۇرامىنداعى 28 قالانىڭ 100-گە جۋىق وكىلى مەن 5 حالىقارالىق بىرلەستىك, 7 عىلىمي جانە ساراپتامالىق ۇيىمنىڭ مۇشەلەرى باس قوسقان جيىنعا جەتەكشىلىك ەتكەن استانا قالاسىنىڭ اكىمى اسەت يسەكەشەۆ مۇنداي سەسسيالاردىڭ قالا باسشىلارى ءۇشىن تاجىريبە الماسۋ مەن وزەكتى ماسەلەلەردى تالقىلاۋدا تيىمدىلىگى مول ەكەندىگىنە توقتالدى. سونداي-اق, ول ءوز سوزىندە شانحاي ىنتىماقتاستىق ۇيىمىنا مۇشە ەلدەردىڭ مەرلەر كەڭەسىن قۇرۋ قاجەتتىگىن وتىرىسقا قاتىسۋشىلاردىڭ قاپەرىنە سالدى.
«بۇگىنگى جيىن ارقىلى ءبىز رەسەي مەن قىتاي, ءۇندىستان مەن ورتالىق ازيا ەلدەرى اراسىندا شىۇ-عا مۇشە مەملەكەتتەر قالالارىنىڭ مەرلەر كەڭەسىن قۇرۋ باستاماسىن كوتەرىپ وتىرمىز. ونىڭ ماقساتى – ساۋدا سالاسىنداعى ىنتىماقتاستىق پەن قالالاردى دامىتۋ سالاسىنداعى تەحنولوگيالارمەن الماسۋعا, قالا قۇرىلىسى, ەنەرگيا تيىمدىلىگى, بالامالى ەنەرگيا كوزدەرى, سمارت-تەحنولوگيا, قوعامدىق كولىكتەر مەن ەلەكتروندى كوممەرتسيا- نى دامىتۋعا, ۋنيۆەرسيتەتتەر اراسىنداعى بايلانىستاردى بىرىزدەندىرۋگە باعىتتالادى. بۇل ماقساتتاردىڭ بارلىعى دا شىۇ يدەياسىنا ساي كەلەدى», دەدى ءا.يسەكەشەۆ.
ونىڭ سوزىنە قاراعاندا, مەرلەر كەڭەسى قىزمەتكە كىرىسكەن جاعدايدا, ول ناقتى جوسپارلار بويىنشا تۇراقتى ءىس-ارەكەتتەر جۇرگىزەتىن تاجىريبەلىك الاڭعا اينالعان قۇرىلىم بولۋى ءتيىس. سوندىقتان دا, مەرلەر كەڭەسىن قۇرۋ باستاماسى بۇگىنگى تاڭدا وزەكتى بولعاندىقتان, ونىڭ جۇمىسىن بيىلعى كۇزدەن باستاپ كەتۋگە مۇمكىندىكتەر دە جوق ەمەس.
ەكى كۇنگە سوزىلعان القالى جيىننىڭ كەزەكتى سەسسياسىنا جەتەكشىلىك ەتكەن «تمد-نىڭ ەكونوميكالىق دامۋى ىسكەرلىك ورتالىعى» كوممەرتسيالىق ەمەس سەرىكتەستىگىنىڭ باس ديرەكتورى ۆلاديمير ساۆچەنكو ەڭ الدىمەن حالىققا سىيلىق جاساپ, بۇقارا قاۋىمدى قۋانتۋدى قازاقستان پرەزيدەنتىنەن ۇيرەنۋ كەرەك دەپ مالىمدەگەنىن ايتا كەتەيىك.
«وسىدان 25 جىل بۇرىن الماتى قالاسىندا تاۋەلسىز مەملەكەتتەر دوستاستىعىن قۇرۋ تۋرالى شارتقا قول قويىلعانىن ءبارىمىز بىلەمىز. ال بۇگىن ءبىز سالىنعانىنا نەبارى 19 جىل عانا بولعان قالادا باس قوسۋدامىز. بۇل قالا قازاقستان پرەزيدەنتىنىڭ يدەياسىمەن جانە باسشىلىعىمەن سالىندى جانە نۇرسۇلتان ءابىش ۇلى قىسقا عانا ۋاقىتتىڭ ىشىندە ءوز مەملەكەتىنىڭ بەدەلىن الەمدىك بيىككە كوتەرگەن تۇلعا. سونداي-اق, بىرىككەن ۇلتتار ۇيى- مى 29 تامىزدى جىل سايىن يادرولىق سىناقتارعا قارسى ءىس-قيمىلدىڭ حالىقارالىق كۇنى رەتىندە اتاپ وتەتىنى بارشامىزعا ءمالىم. ادامزات بالاسى ءۇشىن يگىلىگى مول وسى ىستە دە قازاقستان پرەزيدەنتىنىڭ ەڭبەگى ەرەن. ءتىپتى, تاياۋدا عانا ەلىمىزدە تمد ەلدەرىنىڭ زياندى قالدىقتاردى جويۋ ماسەلەلەرىنە ارنالعان سەسسياسى وتكەنى ەسىمىزدە. ال بۇگىن قالالاردى باسقارۋ بويىنشا جاڭا باسقارۋشىلىق قۇرىلىمداردى قۇرۋ, حالىق ءۇشىن زاماناۋي جايلى باسپانالار سالۋ ماسەلەلەرىن تالقىلاۋدامىز. ءبىز قازاقستان پرەزيدەنتىنەن حالىققا, مەملەكەتكە قالاي سىيلىق جاساۋعا بولاتىنىن ۇيرەنۋىمىز كەرەك», دەدى ۆ.ساۆچەنكو.
سونىمەن قاتار, «قالانىڭ تۇراقتىلىعىن قامتاماسىز ەتۋ ءۇشىن اقىلدى تەحنولوگيالاردى ەنگىزۋ» جانە «زاماناۋي ۋربانيزاتسيا جاعدايىندا كولىك جۇيەسىن باسقارۋ» سىندى تاقىرىپتىق سەكتسيالارمەن جالعاسقان جيىندا ەلوردا اكىمدىگى استانادا بوي كوتەرىپ جاتقان جاڭا اكۆاپارك پەن ساۋدا, ويىن-ساۋىق ورتالىعىنىڭ جوباسىن جۇرتشىلىققا تانىستىردى. ءوزىنىڭ سوزىندە ءا.يسەكەشەۆ «سيتي پالاس» دەپ اتالاتىن كوپبەيىندى ساۋدا, ويىن-ساۋىق ورتالىعىنىڭ قۇرىلىسى قالانىڭ وڭ جاعالاۋىندا سالىنىپ جاتقانىن تىلگە تيەك ەتتى.
«بۇل عيمارات رەسپۋبليكا داڭعىلى مەن ا.يمانوۆ كوشەسىنىڭ قيىلىسىندا ورنالاسقان. سونداي-اق, «نۇرلى جول» گۇلزارىنىڭ بويىندا «كەرۋەن-2» ساۋدا, ويىن-ساۋىق ورتالىعىن سالىپ, جاڭا اكۆاپاركتىڭ قۇرىلىسىن قازاق ەلى الاڭى اۋدانىندا جۇرگىزۋ جوسپارلانىپ وتىر», دەدى ول. ايتا كەتەيىك, 1998 جىلدىڭ 3 قىركۇيەگىنەن بەرى قىزمەت ەتىپ كەلە جاتقان قاۋىمداستىق تمد-نىڭ 9 مەملەكەتىندەگى 19 ءىرى قالا اكىمدىكتەرىنىڭ باستاماسىمەن قۇرىلعان بولاتىن. بۇگىندە ۇيىم قۇرامىنا 87 قالا قابىلدانعان بولسا, وعان قازاقستاننىڭ 9 قالاسى كىرەدى.
نۇرلىبەك دوسىباي, «ەگەمەن قازاقستان»