مەملەكەتىمىز قىسقا مەرزىمدە حالىقارالىق قاتىناستاردىڭ جاۋاپتى سۋبەكتىسى رەتىندەگى بەدەلىن بەكىتتى. بۇگىندە ءبىز وزەكتى جاھاندىق ماسەلەلەردى شەشۋ جانە جاڭا الەمدىك ءتارتىپتى قۇرۋ ىسىنە بەلسەندى قاتىسىپ قانا قويماي, سول باعىتتاردا بىرقاتار باستامالار كوتەرىپ, ونىڭ وڭ شەشىلۋى جولىندا ناتيجەلى شارۋالار اتقارۋدامىز. وسىنداي بەلسەندى ءىس-ارەكەتتىڭ ارقاسىندا قازاقستان حالىقارالىق ارەنادا تۇراقتىلىقتىڭ, مەملەكەت دامۋىنىڭ قارقىندى جانە وركەندەگەن مودەلىنىڭ باستاۋشىسى رەتىندە لايىقتى باعاسىن الىپ وتىر.
ەلباسى ن.نازارباەۆتىڭ تابىستى جۇرگىزگەن كوپۆەكتورلى سىرتقى ساياساتى ناتيجەسىندە ەلىمىز ايماقتاعى جانە الەمدەگى ساياسي, قاۋىپسىزدىك, وركەنيەتتىك, ەكونوميكالىق, ەكولوگيالىق ماسەلەلەرگە قاتىستى باستامالارى وڭ قابىلدانۋدا. جاھاننىڭ جەتەكشى ەلدەرىمەن ستراتەگيالىق جاراسىمدى ارىپتەستىگى قازاقستاننىڭ ەكونوميكالىق قۋاتىنىڭ قارقىندى وسىمىنە, سىرتقى الەممەن ساۋدا-ەكونوميكالىق, سونداي-اق, ينۆەستيتسيالىق بايلانىستارىنىڭ دامۋىنا نەگىز بولۋدا.
بۇگىنگى تاڭدا قازاقستان قانداي باستاما كوتەرسە دە, ول الەمنىڭ جەتەكشى ەلدەرىنىڭ باسىم بولىگىنىڭ قولداۋىنا يە بولىپ كەلەدى. مۇنىڭ جارقىن دالەلدەرىنىڭ ءبىرى رەتىندە ەكسپو-2017 كورمەسىن استانادا وتكىزۋ مارتەبەسىن الەمدىك قوعامداستىقتىڭ قولداۋىمەن جەڭىپ الۋىمىزدى ايتۋعا بولادى. پاريج قالاسىندا 2012 جىلدىڭ 22 قاراشاسىندا وتكەن حالىقارالىق كورمەلەر بيۋروسىنىڭ ەكسپو حالىقارالىق بيۋروسى باس اسسامبلەياسىنىڭ 152-سەسسياسى بارىسىندا قازاقستان ۇسىنىسىن بيۋروعا مۇشە 147 ەلدىڭ 103-ءى قولداپ, داۋىس بەردى. ءبىزدىڭ باسەكەلەسىمىز بەلگيانىڭ لەج قالاسى 44 داۋىس جيناعان-دى. وسىلايشا, ەلىمىز ۇسىنعان, دۇرىس تاڭدالعان «بولاشاقتىڭ ەنەرگياسى» تاقىرىبى ساراپشىلاردىڭ كوپشىلىگىنىڭ كوڭىلىنەن شىعىپ, كورمەنى وتكىزۋ مارتەبەسىنە يە بولدىق.
كورمەنىڭ تاقىرىبى ءبىزدى عانا ەمەس, كۇللى الەمدى الاڭداتىپ وتىرعان ماسەلەگە جاتادى. ويتكەنى, قۋات كوزدەرىنىڭ جاڭا بالامالى تۇرلەرىن تابۋ مەن ونى كەڭىنەن قولدانىسقا ەنگىزۋ ماسەلەلەرىنە كۇللى دۇنيە نازارىن اۋدارۋدا. استانا وسى سالاداعى ەڭ ۇزدىك الەمدىك ازىرلەمەلەر مەن ترەندتەر كورسەتەتىن ءتيىمدى الاڭعا اينالۋدا. سونىمەن قاتار, كورمە ەلدىڭ وندىرىستىك قۋاتى مەن عىلىمي بازاسىن تەحنولوگيالىق جاڭعىرتۋ جانە ەكونوميكانى جۇيەلى ءارتاراپتاندىرۋ ءۇشىن وتە ماڭىزدى.
ەكسپو-2017 حالىقارالىق كورمە جۇمىسى رەسمي اشىلعالى بەرى قارقىندى وتۋدە. بۇگىندە كەلۋشىلەردىڭ سانى 1 ملن ادامنان استى. بۇعان دەيىن كورمەنى 20-عا جۋىق مەملەكەت جانە ۇكىمەت باسشىلارى تاماشالادى, ءالى 10 شاقتى مەملەكەتتىڭ باسشىلارى كەلەدى دەپ كۇتىلۋدە. حالىقارالىق كورمەگە 100-دەن استام مەملەكەت پەن 20-عا جۋىق حالىقارالىق ۇيىمدار قاتىسىپ, ءوز پاۆيلوندارىن اشىپ, «بولاشاقتىڭ ەنەرگياسى» تاقىرىبىندا وزدەرىنىڭ وزىق تەحنولوگيالارى مەن جاڭا يننوۆاتسيالارىن كوپشىلىككە ۇسىنۋدا.
جالپى, قازاقستاننىڭ حالىقارالىق دارەجەدەگى ماڭىزدى ءىس-شارالاردى وتكىزۋدەگى تاجىريبەسى جەتكىلىكتى. بۇعان دەيىن ءبىز ەقىۇ-نىڭ استانا ءسامميتىن, شىۇ, يىۇ باسشىلارىنىڭ كەڭەستەرىن, استانا ەكونوميكالىق فورۋمىن, الەمدىك جانە ءداستۇرلى دىندەر ليدەرلەرىنىڭ سەزىن جوعارى دارەجەدە وتكىزگەن بولاتىنبىز. ەندى حالىقارالىق كورمەنىڭ رەسمي جابىلۋىنا وراي يسلام ىنتىماقتاستىعى ۇيىمىنىڭ عىلىم جانە تەحنولوگيالار بويىنشا 1-ءشى ءسامميتى وتپەك. بۇل باستامانى ەلباسىمىز بىلتىر يىۇ ءحىىى سامميتىندە كوتەرگەن بولاتىن. سامميتكە ۇيىمعا مۇشە 55 ەلدىڭ جانە حالىقارالىق ۇيىمداردىڭ وكىلدەرى كەلىپ قاتىسادى دەپ كۇتىلۋدە.
وسىنداي قىرۋار ەڭبەكتىڭ ارقاسىندا, تاۋەلسىزدىك جىلدارى قازاقستان ەكونوميكاسىنا 130-دان استام ملرد دوللار ينۆەستيتسيا تارتىلعان. قازاقستان – ورتالىق ازياعا كەلگەن بارلىق سىرتقى ينۆەستيتسيالاردىڭ 80%-دان استامىنىڭ قابىلداۋشىسى. ءاربىر ىسكە اسىرىلعان ينۆەستيتسيالىق جوبا – قازاقستاندىقتاردىڭ ءال-اۋقاتىن ارتتىرۋعا مۇمكىندىك بەرەدى. ينۆەستيتسيالار مەن يننوۆاتسيالار جاڭا مىڭجىلدىقتاعى جاڭا قازاقستاننىڭ قوزعالتقىش كۇشتەرى بولىپ تابىلادى. ەل ەكونوميكاسىنا ينۆەستيتسيالاردى, يننوۆاتسيالاردى جانە جاڭا تەحنولوگيالاردى تارتۋ ماقساتىندا وتاندىق ديپلوماتيا ايتۋلى ناتيجەلەرگە قول جەتكىزىپ, تابىستى جۇمىستى جالعاستىرۋدا.
العاشقى كۇننەن باسىمدىق بەرىلىپ, دۇرىس تاڭدالعان كوپقىرلى سىرتقى ساياساتىمىزدىڭ ارقاسىندا, ەلىمىز حالىقارالىق قوعامداستىقتا ايتۋلى تابىستارعا قول جەتكىزىپ كەلەدى. وسىناۋ جەتىستىكتەرىمىز ءوز كەزەگىندە قازاقستاننىڭ جاڭا ساپالى دەڭگەيگە كوتەرىلۋىنە جانە الەمنىڭ باسەكەگە قابىلەتتى, دامىعان 30 ەلىنىڭ قاتارىنا قوسىلۋىنا مۇمكىندىك بەرەتىن بولادى.
نۇرلان سەيدىن, ساياساتتانۋشى