استانا كۇنى – كوپشىلىكتىڭ اسىعا كۇتەتىن ايتۋلى مەرەكەسى. تاۋەلسىزدىكتىڭ شىنايى ايشىعى رەتىندە بەلگىلى ەلوردانىڭ ەڭسەلى كەيپى, بيىك تۇعىرى ءاردايىم ۇلتتىڭ اسقاق رۋحىن ەسكە سالىپ تۇرادى. اركىم-اق استانا تۋرالى ماقتانىشپەن وي تولعاپ, سىر بولىسەدى.
استانا كۇنىنە وراي تاراز قالاسىنداعى «بالاۋسا» اۋلا كلۋبىندا «استانا – بالالار كوزىمەن!» اتتى بايقاۋ ۇيىمداستىرىلعان بولاتىن. بايقاۋعا «بوتاقان», «اراي», «بالاۋسا», «جاس بالعىن» اۋلا كلۋبتارىنىڭ جاسوسپىرىمدەرى مەن اۋلا كلۋب جەتەكشىلەرىنەن قۇرالعان بارلىعى وتىزعا جۋىق ادام قاتىستى.
بۇل كۇنى جاسوسپىرىمدەر استانا تۋرالى ويلارىن قاعاز بەتىندە ورنەكتەپ, سۋرەت سالدى. ارقايسىسى ەلوردامىز جايلى ويىن ءبىلدىرىپ, استانانىڭ نەگىزگى ايشىقتارىن سۋرەت تۇرىندە بەدەرلەدى. ماسەلەن, باس شاھاردا ورنالاسقان بايتەرەك, حان شاتىر, كەرۋەن ورتالىقتارى دا بالالار قيالىنا قانات ءبىتىرىپ, ولاردى ەرەكشە ءبىر كۇيگە بولەدى. اسىرەسە, تالاپكەر جاستار قازىرگى كەزەڭدە استانا قالاسىندا ءوتىپ جاتقان حالىقارالىق ەكسپو – 2017 مامانداندىرىلعان كورمەسىن دە بەينەلەدى.
شىعارماشىلىققا باعىت العان بالالاردىڭ ويى مەن قيالىنان تۋعان استانا سۋرەتتەرى كوپشىلىككە تانىستىرىلىپ, لايىقتى باعالارىن الدى. استانا – بۇگىندە ەلىمىزدەگى عانا ەمەس, الەمدەگى دە ءىرى مادەني-رۋحاني كەلىسىمنىڭ ورداسى رەتىندە قالىپتاستى. بالالار ءوز شىعارمالارىندا ەلوردامىزدىڭ وسى ءبىر ەرەكشەلىگىن دە ەسكەرىپ, ءوز تۋىندىلارىنا ارقاۋ ەتتى. قازاقتىڭ بويىندا قالىپتاسقان يگى قاسيەتتەردى استانا بولمىسىمەن ۇشتاستىرا وتىرىپ سالعان سۋرەتتەرى كوپشىلىككە جاقسى اسەر قالدىردى.
استانا كۇنىنە وراي تاراز قالاسىنداعى ت.رىسقۇلوۆ اتىنداعى ورتالىق ساياباقتا ء«ان-جىرىم ساعان, استانا!» اتتى فەستيۆال ءوتىپ, فەستيۆال اياسىندا بايقاۋ قورىتىندىسى جاريالاندى. ناتيجەسىندە ءبىرىنشى ورىندى «جاس بالعىن», ەكىنشى ورىندى «بالاۋسا», ال جۇلدەلى ءۇشىنشى ورىندى «اراي» اۋلا كلۋبتارى يەلەندى. جاس سۋرەتشىلەرگە قالا اكىمىنىڭ ورىنباسارى كەنجەبەك ولجاباي ساتتىلىك تىلەپ, سىي-سياپات كورسەتتى. ءوڭىر ونەرپازدارى اننەن شاشۋ شاشىپ, اۋليەاتا اسپانىن اسەم كۇيگە بولەدى.
حاميت ەسامان,
«ەگەمەن قازاقستان»
جامبىل وبلىسى